«Քարոզչական հնարք է»․ քաղաքագետը՝ Լելե Թեփեի հարեւանությամբ գտնվող գյուղի վերաբնակեցման՝ Ալիեւի հայտարարության մասին

Քաղաքագետ Աղասի Ենոքյանը լուրջ չի ընդունում Ադրբեջանի նախագահ Իլհամ Ալիեւի այն հայտարարությունը, որ Լելե Թեփե բարձունքի հարեւանությամբ գտնվող  Ջոջուք Մարջանլի գյուղը պետք է վերաբնակեցվի։ «Ակնհայտ է, որ քարոզչական հնարք  է, որովհետեւ ռազմաճակատի թիկունքում գտնվող գծից հիմնականոմ արտագաղթում են, ոչ թե վերաբնակեցնում»,-Hayeli.am-ի հետ զրույցում ասաց քաղաքագետը։ Ենոքյանի կարծիքով՝ այդ խոսքերի պատճառով լայնածավավալ պատերազմական գործողություններ պետք չէ սպասել, «քանի որ երկու կողմն էլ չունի անհրաժեշտ ռեսուրսներ երկարատեւ պատերազմի համար»։ Տեղեկացնենք, որ Ադրբեջանի նախագահը 2017 թվականի պահուստային ֆոնդից  4 միլիոն մանաթ է տրամադրել վերոնշյալ գյուղի վերաբնակեցման համար։ Քաղաքագետը զուգահեռներ իրականացրեց ԼՂՀ-ի կողմից Թալիշի վերաբնակեցման ծրագրի հետ՝ համոզմունք հայտնելով, որ սա եւս քարոզչական հնարք է։ Շփման գծում վերջին օրերի լարվածությունն էլ քաղաքագետը պայմանավորում է հերթական սրացմամբ։ Ըստ մեր զրուցակցի կանխատեսումների՝ լուրջ սրացումներ կլինեն խորհրդարանական ընտրություններից հետո․ «Մեր պատերազմն ունի իր մենեջերը՝ ՌԴ-ն  եւ դրանով պայմանավորված  կառավարելի ընտրություններ են հարկավոր»,-ասաց նա։