Անհասկանալի և ապսուրդային որոշում. մահացած ծննդկանի գործը նոր զարգացումներ է ստանում

Դատախազությունը բողոքարկել է բժշկական կենտրոնում մահացած 26 ամյա ծննդկան Մերի Մարգարյանի գործով մեղադրյալ, բժշկուհի Շուշանիկ Բախշյանին գրավի դիմաց ազատ արձակելու որոշումը: Այս մասին Հայելի.am-ին տեղեկացրեցին ՀՀ գլխավոր դատախազության հանրային կապերի բաժնից: Շուշանիկ Բախշյանի պաշտպան Ալեքսանդր Սիրունյանը այս բողոքարկումը ապսուրդ է համարում: «Անհասկանալի որոշում է»,-մեկնաբանեց Սիրունյանը: «Ծիծաղել է պարզապես , բողոքարկում են մի որոշում, որն արդեն քննարկվել է: Ինչ ուզում են թող անեն, հիմա ես վերաքննիչ դատարանի նիստին եմ  սպասում»,-ասաց Սիրունյանը: Հիշեցնենք, որ հունվարի 30-ին Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանը գրավի դիմաց ազատ էր արձակել Շուշանիկ Բախշյանին: Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ:2 015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը: Շուշանիկ Բախշյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Աստղիկ Ավագյան