«Չզիջեն, ոնց որ թշնամի ենք իրենց»․ Քրիստ Մարուքյանը՝ Կառավարությանը

Վանաձորի ավագանու «Լուսավոր Հայաստան» խմբակցության ղեկավար Քրիստ Մարուքյանն այն կարծիքին է, որ եթե կառավարությունը մտահոգ է քաղաքի ճակատագրով, ապա պետք է լուծարի ավագանին։ Այս մասին Hayeli.am-ի հետ զրույցում ասաց Մարուքյանը։ Հիշեցնենք, որ Վանաձորի ավագանու ընդդիմադիր խմբակցությունները՝ Լուսավոր Հայաստանը, Հայկական վերածնունդը եւ Բարգավաճ Հայաստանը, ավագանին լուծարելու պահանջով դիմել են կառավարությանը։ Գործադիրը, սակայն, դեռ պատասխան չի հղել։ Մեր դիտարկմանը, որ Վանաձորի ՀՀԿ-ական քաղաքապետ Մամիկոն Ասլանյանը հակադարձում է, թե ընդդիմության պահանջը հիմնավոր չէ, քանի որ հոկտեմբերի 10-ին կայացել է ավագանու նիստ, Քրիստ Մարուքյանը զարմացավ, թե ինչպես կարելի է այդ օրը համարել հերթական նիստ։ Ընդգծենք, որ ընդդիմությունը դիմել է գործադիրին այն հիմանավորմամբ, որ երեք ամիս ավագանին նիստ չի գումարել, ինչը նշանակում է, որ այն պետք է լուծարվի՝ համաձայն գործող օրենքի։ Մարուքյանի կարծիքով, եթե վարչապետին հետաքրքրում է Վանաձոր քաղաքի ճակատագիրը, ապա վերջինս պետք է հարցին լուծում տա, քանի որ ավագանին «անգործունակ է»։ Մեր ճշտող հարցին՝ խորհրդարանական ընտրությունների շեմին իշխանությունը կզիջի՞ հանրապետության՝ մեծությամբ երրորդ քաղաքը, Քրիստ Մարուքյանն ասաց․ «Չզիջեն, ոնց որ թշնամի ենք իրենց․․․Չեն զիջում թող ճիշտ կառավարում իրականացնեն»։ Տեղեկացնենք, որ կառավարությունը դիմումին պետք է պատասխանի 15-օրյա ժամկետում, այն լրանում է հունվարի 26-ին։ Սեդա Ղուկասյան