Ծառուկյանի վերադարձը խառնում է գրեթե բոլոր խոշոր խաղացողների խաղաքարտերը

Քաղաքագետ Գագիկ Համբարյանի կարծիքով՝ Օսկանյան-Օհանյան-Դալլաքյան-Հայրիկյան դաշինքի՝ ընդդիմադիր դաշտում գործունեությունը խնդրահարույց է մի քանի պատճառներով․ «Սեյրան Օհանյանը դեռ մի քանի ամիս առաջ իշխանության մաս էր, ու միանգամից քաղաքական  դաշտ մուտք գործելը հասարակության մոտ այլ կերպ է ընկալվում․ տպավորություն է, որ նեղսրտած է իշխանություններից»,-Hayeli.am-ի հետ զրույցում ասաց քաղաքագետը։ Անդրադառնալով Սեյրան Օհանյանի վերջին ելույթի վերաբերյալ հասարակական տրամադրություններին՝ քաղաքագետն ասաց․ «Սեյրան Օհանյանն ասում է հերիք է երազանքներով ապրենք, այսինք երկար տարիներ լինելով իշխանության մեջ՝ թե՛ Արցախում, թե՛ ՀՀ-ում, Սեյրան Օհանյանը ջուր է լցրել այն քաղաքական գործիչների ջրաղացին, որոնք ՀՀ-ի բնակչությանը խոստումներով են կերակրել եւ խաբել են։ Հիմա պաշտոնը կորցնելուց հետո հասկացավ, որ իրականություն պետք է վերադառնանք»։ Խոսելով Վիկտոր Դալլաքյանի մասին քաղաքագետը հիշեցրեց, որ Դալլաքայնը ստորագրել է իր հրաժարականի դիմումը, ապա 15 րոպե  անց «ամենավերջին որակումներն է տվել Սերժ Սարգսյանին ու նրա իշխանությանը»։ Հիշեցնենք, որ դաշինքին միանալու մասին երեկ հայտարարեց նաեւ ԱԻՄ առաջնորդ Պարույր Հայրիկյանը։ Քաղաքագետ, սակայն, մեծ ակնկալիքներ չունի ԱԻՄ-ի առաջնորդից, քանի որ վերջինս «իրեն չի գտել երրորդ հանրապետության մեջ եւ չունի հնարավորություն քաղաքական պրոցեսների մեջ նրգրավվելու համար»։ Ինչ վերաբերում է ԲՀԿ հիմնադիր Գագիկ Ծառուկյանի վերադարձին մեծ քաղաքականություն եւ դրանով պայմանավորված քաղաքական թոհուբոհին, Գագիկ Համբարյանն ասաց․ «Ինչքան էլ Գագիկ Ծառուկյանին հեգնեն, նրան անվանեն իշխանական պրոեկտ, ուզում են, թե չեն ուզում, միեւնույն է, Գագիկ Ծառուկյանն ունի բավական մեծ ընտրազանգված։ Չեմ կարող ասել, որ իր երկրպագուների թիվն այն նույն նշաձողին է, որ ունեցել է մինչ 2015 թվականի փետրվարի 12-ը, բայց այն, որ նրա վերադարձը խառնում է գրեթե բոլոր խոշոր խաղացողների խաղաքարտերը ՀՀ-ում, դա փաստ է»։   Սեդա Ղուկասյան