Ալիևին` զինելու, Սարգսյանին` ապշեցնելու արվեստը
Երեկ Մոսկվայում Հայաստանի արտգործնախարար Էդվարդ Նալբանդյանը հանդիպել է Ռուսաստանի արտգործնախարար Սերգեյ Լավրովին: Հանդիպմանը նախարարները քննարկել են հայ-ռուսաստանյան դաշնակցային փոխհարաբերությունների օրակարգի հարցերի լայն շրջանակ, երկու երկրների ղեկավարների միջև ձեռք բերված պայմանավորվածությունների կատարման ընթացքը։ Հայաստանի արտգործնախարարության մամուլի և տեղեկատվության վարչության փոխանցմամբ, զրուցակիցներն անդրադարձել են ղարաբաղյան հիմնախնդրի վերաբերյալ Վիեննայում և Սանկտ Պետերբուրգում կայացած գագաթնաժողովներին ձեռք բերված պայմանավորվածությունների կատարմանն առնչվող հարցերին: Հայաստանի և Ռուսաստանի արտաքին քաղաքական գերատեսչությունների ղեկավարները մտքեր են փոխանակել տարածաշրջանային և միջազգային հրատապ խնդիրների շուրջ։ Թվում է, թե Ռուսաստանը խաղաղ կարգավորման շուրջ հետևողական աշխատանք է տանում: Հայաստանում նույնիսկ դեռ ոգևորված են օրեր առաջ Լավրովի` ամփոփիչ ասուլիսի ընթացքում ադրբեջանցի լրագրողին «շշելուց»: Ու մինչ մերոնք ոգևորված «օդերի» մեջ են` երեկ ստացվեց հերթական տեղեկությունը ռուս-ադրբեջանական սպառազինության գործարքի մասին: Պաշտոնական Բաքուն Մոսկվայի հետ բանակցություններ է վարում նոր սպառազինության մատակարարումների շուրջ, հետաքրքրված է պաշտպանության նորագույն համակարգերով, ռուսաստանյան «Նովոստի» լրատվական գործակալության հետ զրույցում հայտարարել է Ադրբեջանի նախագահ Իլհամ Ալիևը, որը Դավոսում մասնակցում է Համաշխարհային տնտեսական համաժողովին: «Այո, մենք բանակցություններ ենք վարում նոր գնումների շուրջ: Ձեզ ավելի լավ է հայտնի, թե որքան զարգացած է ռուսաստանյան ռազմական արդյունաբերությունը: Մենք հետաքրքրված ենք, հիմնականում, ամենաարդիական պաշտպանական մշակումներով: Դա վերաբերում է թե՛ ուղղաթիռային տեխնիկային, թե՛ պաշտպանության համակարգերին՝ ամբողջ համալիրը: Դա մշտական գործընթաց է», - ասել է Ալիևը՝ Ադրբեջանի և Ռուսաստանի միջև նոր պայմանագրերի հեռանկարները գնահատելով որպես «լավ»: «Դուք գիտեք պատմությունը, թվերը հրապարակված են, ստորագրված են շուրջ 5 միլիարդ դոլարի պայմանագրեր, դրանց մեծ մասը արդեն իրականացվել է», - ասել է Ադրբեջանի նախագահը: Փաստորեն ռուս-ադրբեջանական 5 միլիարդ դոլարի սպառազինության վաճառքի պայմանագրերը դեռ վերջը չեն. Ադրբեջանը Ռուսաստանի հետ բանակցում է նոր սպառազինությունների մատակարարման շուրջ: Ապրիլի քառօրյա պատերազմից հետո իսկական «նվեր»` ռազմավարական դաշնակցի կողմից Հայաստանին ու Արցախին: Ի դեպ, երեք օր առաջ էլ ադրբեջանական գործակալությունները հայտնեցին, որ Ռուսաստանն Ադրբեջանին «Տոր» զենիթա-հրթիռային համալիրներ է տրամադրել: Daily Star բրիտանական պարբերականի վերլուծաբան Փիթեր Թրումենը իր` «Պուտինի վերջին զենքը երկնքից «փչելու է» ամերիկյան հրթիռները» հոդվածում գրում է ռուսաստանյան «Տոր» զենիթա-հրթիռային համալիրի մասին, որը հակահրթիռային և հակաօդային պաշտպանության խնդիրներ է լուծում, և այն, ըստ հեղինակի, բացի ռուսական բանակից, ներկայումս ունի նաև Ադրբեջանը: Ադրբեջանական haqqin.az-ն էլ իր հերթին հավելել է, որ ռուսաստանյան ԶԼՄ-ներն էլ են հայտնել, որ Ադրբեջանին տրամադրվել է «Տոր» զենիթա-հրթիռային համալիրի 8 միավոր: Մի խոսքով, զինել, զինել` մինչև վերջ: Ղարաբաղում խաղաղություն հաստատելու կոչված միջնորդ Ռուսաստանն, այսպիսով, նախանձելի հետևողականությամբ է շարունակում զինել Հայաստանի ու Արցախի հակառակորդին: Թամար Բագրատունի