Հաջորդ պատերազմի օրն ու ժամն էլ կորոշի Մոսկվան

ՌԴ ԱԳ նախարար Սերգեյ Լավրովը Մոսկվայում բանակցում է ԵԱՀԿ–ում նախագահող Ավստրիայի ԱԳ նախարար Սեբաստիան Կուրցի հետ։ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ արտգործնախարարների հանդիպմանը, ի թիվս այլ հարցերի, կքննարկվի Լեռնային Ղարաբաղի հարցը: Ռուսաստանը կարող է վճռորոշ դեր խաղալ ԵԱՀԿ տարածությունում ճգնաժամերի լուծման հարցում, նշել է ԵԱՀԿ գործող նախագահ, Ավստրիայի ԱԳ նախարար Սեբաստիան Կուրցը Մոսկվայում Ռուսաստանի ԱԳՆ ղեկավար Սերգեյ Լավրովի հետ հանդիպումից հետո: Սեբաստիան Կուրցը, որի երկիրը 2017թ. հունվարի 1-ից ստանձնեց ԵԱՀԿ-ում նախագահությունը, ծավալուն հարցազրույց է տվել ադրբեջանական ԱՊԱ-ին, որտեղ անդրադարձել է ԼՂ կարգավորմանը։ Նա շեշտել էր, որ լարվածության նվազեցումը առկա հակամարտություններում Ավստրիայի հիմնական առաջնահերթություններից է ԵԱՀԿ-ում նախագահության ժամանակ։ «Որպես ԵԱՀԿ գործող նախագահ՝ ես անձամբ կայցելեմ այդ իրադարձություններից տուժած շրջաններ։ Նախագահությունը կաջակցի առկա հակամարտությունների խաղաղ կարգավորման համար գոյություն ունեցող ձևաչափերին, ինչպես նաև համանախագահների գործունեությանը։ Մենք մշտական շփում ենք պահպանում կողմերի հետ։ Այդ պատճառով ուշադիր հետևում ենք իրավիճակին և ավելի լավ ենք հասկանում տարբեր դիրքորոշումները։ Մենք ԵԱՀԿ-ի մեր միջազգային գործընկերների հետ վստահ ենք, որ այդ հակամարտությունը կարող է կարգավորվել խաղաղ ճանապարհով»,- ասել է Կուրցը։ Ավստրիան միացել է 2016թ. ապրիլի 5-ին ԵԱՀԿ ՄԽ համանախագահների ընդունած հայտարարությանը, որտեղ դատապարտվել է ապրիլին շփման գծում էսկալացիան։ «Մենք նշել ենք, որ ԼՂ հակամարտությունը կարող է կարգավորվել խաղաղ ճանապարհով։ Ես դա բազմիցս կրկնել եմ։ Ցանկանում եմ նշել, որ հակամարտությունից տառապող բնակչության անվտանգությունն ու պաշտպանությունը պետք է առաջնային լինեն։ Այդ մարդիկ մյուսներից ավելի շատ են տառապում։ Մենք հիշում ենք այդ մասին, երբ աշխատում ենք հակամարտության կարգավորման ուղիների վրա։ Ավստրիայի նախագահությունը ամբողջությամբ գիտակցում է իր պատասխանատվությունն ու աջակցում է Մինսկի խմբի միջնորդական ջանքերին, մտադիր է ակտիվորեն մասնակցել այդ գործընթացին»,- ասել է Ավստրիայի ԱԳ նախարարը։ «Մենք կանենք ամեն ինչ, որպեսզի ապագայում էսկալացիան կանխվի։ Դրան կարելի է հասնել համատեղ աշխատանքով։ Այդ պատճառով մենք մեծ ուշադրություն կհատկացնենք դիվանագիտությանը, ավելի ակտիվ երկխոսությանը և նրան, թե ինչ հերթական քայլեր են ձեռնարկվելու առկա առաջարկների իրականացման համար», հավելել է Սեբաստիան Կուրցը։ Միջազգային հանրության` ԼՂ խնդիրը խաղաղ կարգավորելու և էսկալացիա թույլ չտալու կոչերի ֆոնին Ալիևն էլ վերջին օրերին ակտիվորեն հոխորացել է: Նա մեկ հիշեցնում է, որ Ադրբեջանը տիրապետում է ժամանակակից գերճշգրիտ զենքերի, մեկ հայտնում է, որ Ադրբեջանը կշարունակի ավելացնել իր ռազմական ներուժը, այդ թվում` նաև գերժամանակակից զենքի մատակարարումը, ապա չի մոռանում հիշեցնել, որ «ադրբեջանական բանակը աշխարհի ուժեղագույն բանակների թվում է»: «Մենք տիրապետում ենք բարձր ճշգրտություն և ավերիչ ուժ ունեցող ժամանակակից զենքերի: Դրանց մի մասը ցուցադրվել է, մյուս մասը չի ցուցադրվել: Դրանք կցուցադրվեն հարկ եղած ժամանակ և հարկ եղած տեղում», սպառնացել է Ալիևը: Ապա` Ալիևն անդրադառնալով ապրիլյան ագրեսիային, ասել է. «Հակագրոհի արդյունքում մեր բանակը թշնամուն ջախջախիչ պարտություն է հասցրել: Հազարավոր հեկտարներ են ազատագրվել օկուպացիայից: Ապրիլյան մարտերը մեր փայլուն հաղթանակն է: Բացի այդ, մենք մեկ անգամ ևս ցույց տվեցինք ադրբեջանական պետության ուժը: Դա ևս մեկ անգամ ապացուցում է, որ մենք չենք հաշտվելու ստեղծված իրավիճակի հետ: Արժանի պատասխան կտանք ցանկացած սադրանքի: Միաժամանակ, ապրիլյան մարտերն ամբողջովին փարատեցին Հայաստանի հորինած առասպելը: Իրենք էլ են խոստովանում, որ առանց արտաքին օգնության մեզ նույնիսկ մեկ շաբաթ էլ չեն կարող դիմակայել»: Բաքվի հոխորտանքները, սակայն ուղեկցվում են` Մոսկվայի հետ «խաղն» ու «առևտուրը» առաջ տանելու մղումով: Եթե ԵԱՀԿ Մինսկի խմբից, միջազգային հանրությունից ընդգծված դժգոհություն կա Բաքվում, որ Ադրբեջանի «տարածքային ամբողջականության» պահպանումն անտեսում են, ապա` ամեն ինչ հարթ է Մոսկվայի վստահության հարցում: Լավրովի վերջին «աղմկահարույց» հայտարարությունները, այո՛, ոչ այլ ինչ էին, քան կոնկրետ մեսիջ Հայաստանին ու Ադրբեջանին, որ առանց Ռուսաստանի ոչ խաղաղություն կարող է հաստատվել Ղարաբաղում, ոչ էլ պատերազմ բռնկվել ու շարունակվել: Մոսկվան բաց է խաղում, իհարկե` կարևորելով խաղաղ կարգավորումը: Բայց պարզ է Մոսկվայի հետին միտքը` ԼՂ խնդրում ոչ հայկական, ոչ ադրբեջանական կողմից «ինքնագործունեություն» Մոսկվան չի հանդուրժելու: Այդ է պատճառը, որ Բաքուն անընդմեջ հարկ է համարում շեշտել Ռուսաստանի դերն ու ազդեցությունը ԼՂ խնդրում, ինչպես դա արեց օրերս արեց Ադրբեջանի ԱԳ նախարար Էլմար Մամեդյարովը. «Մենք բարձր ենք գնահատում Ռուսաստանի այն ջանքերը, որոնք գործադրվել են՝ նախորդ տարվա ապրիլի 5-ին Մոսկվայում Հայաստանի ու Ադրբեջանի զինված ուժերի գլխավոր շտաբների պետերի հանդիպման ժամանակ հասնելու համար հրադադարի ռեժիմին։ Վստահ եմ, որ եթե Ռուսաստանը հարցով զբաղվի ողջ լրջությամբ, այդ ժամանակ կփոխվի ստատուս քվոն, տարածաշրջանում կվերականգնվի կայունությունը»։ Այնպես որ` հաջորդ հնարավոր պատերազմի օրն ու ժամն էլ Ռուսաստանն է որոշելու, քանի որ և՛ խաղաղությունը, և՛ պատերազմը Ղարաբաղում Մոսկվայի ձեռքում է: Թամար Բագրատունի