«Ցանկանում եմ, որ փաստաբանների պալատում խաղաղություն լինի»․Ռուբեն Սահակյանը վերադառնում է

Փետրվարի 11-ին Փաստաբանների պալատում խորհրդի ընտրություններ են, որոնք խոստանում են լինել աննախադեպ, թեժ ու ինտրիգային։ Մի կողմից պալատում առկա հակասությունները, վերջին շրջանում այստեղ կարծես երկու ճամբարների են բաժանվել՝ Պալատի գործող նախագահ Արա Զոհրաբյանի կողմնակիցներ եւ նախկին նախագահ Ռուբեն Սահակյանի հետեւորդներ, որոնք ամեն ինչ անում են պալատի գործունեությունը կաթվածահար անելու ուղղությամբ, ինտրիգներ հրահրում։ Եւ հիմա վերադառնալու ցանկություն ունի նաեւ Ռուբեն Սահակյանը։ Հունվարի 14-ից սկսվել են առաջադրումները եւ ավարտվել հունվարի 19-ին։ Ընտրությանը կմասնակցի ավելի քան 1700 փաստաբան։ Տարբեր հաշվարկներով ընտրվելու համար անհրաժեշտ է մոտ 500 ձայն։ Այս ընտրություններին հիմնական մրցակցությունը լինելու է ՓՊ ներկա նախագահ Արա Զոհրաբյանի եւ նախկին նախագահ Ռուբեն Սահակյանի ու նրանց համախոհների միջեւ։ ՓՊ նախկին նախագահ Ռուբեն Սահակյանը օրեր առաջ առաջադրման փաստաթղթեր է ներկայացրել։ Հիշեցնենք, որ Ռուբեն Սահակյանը Սյունիքի նախկին մարզպետ Սուրիկ Խաչատրյանի՝ Լիսկայի տան մոտ տեղի ունեցած սպանության գործով պաշտպանում էր նրա որդու շահերը: Ռուբեն Սահակյանը թեպետ Հայաստանի ամենապրոֆեսիոնալ իրավաբաններից է,սակայն այդ գործի ընթացքում մեղմ ասած հեղինակազրկվեց։ Լիսկայի որդու գործի վերջում Ռուբեն Սահակյանը սկսեց նյարդային հարցազրույցներ տալ ու ասել բաներ, որոնք նախկինում նրան բնորոշ չէին:Օրինակ, դատավճռի հրապարակումից հետո նա հայտարարել էր. «Բոլոր այն վայնասունները, վայրահաչումները, որ գրված էին մամուլում, հատկապես մի քանի ժուռնալիստների կողմից, որոնք ոչինչ չէին ուզում տեսնել, բացի մի բանից՝ պատժել Սուրիկ Խաչատրյանին, թող գնան և մոմ վառեն, որ էս պետությունում վերջապես արդարադատություն կա»: Մենք փորձեցինք Սահակյանից պարզել վերադառնալու որոշման պատճառների մասին, քանզի հեռանալուց հետո նա հայտարարում էր, թե հոգնել է ու էլ չի ցանկանում ՓՊ նախագահի պաշտոնում մնալ։ «Կազդուրվեցի, հանգստացա եւ հիմա էլ որոշել եմ մասնակցել, հայտ ներկայացնել», մեզ հետ զրույցում ասաց ՓՊ նախկին նախագահ Ռուբեն Սահակյանը։ Պարզվում է, որ Սահակյանը վերադառնում է պալատում վերջին տարիներին տիրող անհաշտ մթնոլորտը հաշտեցնելու նպատակով, ինչպես նաեւ հին ու բարի ժամանակների խաղաղ մթնոլորտը վերականգնելու համար․«Այո, նաեւ դրա համար», -մեր դիտարկում-հարցին պատասխանեց Սահակյանը։ Խնդրեցինք իր կարծիքը հայտնել ոչ համերաշխ մթնոլորտի պատճառների մասին․«Նկատի ունենալով, որ ցանկանում եմ պալատում խաղաղություն լինի, ճիշտ չի լինի նախապես կարծիք հայտնել, ավելի լավ է աշխատանք կատարեմ, որպեսզի արդյունքը լինի»,-ասաց Սահակյանը։ Նա ի պատասխան հարցի, թե կստանա վստահության քվե առհասարակ հանրության կողմից՝ հաշվի առնելով գորիսյան հայտնի պատմությանը իր աջակցության փաստը, Սահակյանը հարցի կեսը լսելիս նախ պատասխանեց, որ «Ժամանակը ցույց կտա», շարունակեց․«Գորիսյան դեպքերը նորմալ դեպքեր էին, սովորական դեպքեր։ Ձեր սարկազմը հասկանում եմ, չեմ կիսում»։ Ռուբեն Սահակյանը չցանկացավ գնահատական տալ Արա Զոհրաբյանի գործունեությանը։ Անի Սահակյան