«Ես չեմ ճանաչում Սեյրան Օհանյան քաղաքական գործչին». Արամ Սարգսյան
«Հանրապետություն» կուսակցության ղեկավար Արամ Սարգսյանը այսօրվա «Ելք» դաշինքի համաժողովից հետո պատասխանեց լրագրողների հարցերին: Խոսելով Պաշտպանության նախկին նախարար Սեյրան Օհանյանի՝ քաղաքականություն մտնելու մասին՝ նշեց, որ հարգում է նրան որպես զինվոր, որպես մարդ: «Ես շատ-շատ հարգում եմ Սեյրան Օհանյան մարդուն, ով եղբորիցս հետո իմ ծնողներին վերաբերվել է հարազատի նման, բայց ես չեմ ճանաչում Սեյրան Օհանյան քաղաքական գործչին»,- ասաց Արամ Սարգսյանը: Նրա խոսքով՝ Օհանյանը մինչ այս հանդես է եկել Facebook-յան հայտարարություններով, որոնք բավարար չեն քաղաքական գնահատական տալու համար: Անդրադառնալով ընտրություններին՝ նշեց, որ ժողովուրդը չի հավատում արդար ընտրությանը, որովհետև իշխանությունը նրանց համոզել է, որ ընտրությամբ ոչինչ չի փոխվի, սակայն, միաժամանակ նշում է նաև, որ բոլորը չէ, որ փողով են գնում ընտրության: Ըստ նրա՝ եթե ոտքի ելնի այն 30 տոկոսը, որը ընտրություններին չի մասնակցել, իշխանությունների վիճակը կբարդանա:
Հետևեք մեզ Viber-ում
