Էդմոն Մարուքյան. Ծառուկյանի դաշինքի հետ միավորման հարց «Ելքում» չի քննարկվել
Այսօր տեղի կունենա «Ելք» դաշինքի անդրանիկ համագումարը: «Ելքի» անդամ «Լուսավոր Հայաստան», «Հանրապետություն» և «Քաղաքացիական պայմանագիր» կուսակցությունները կքննարկեն ապրիլին կայանալիք խորհրդարանական ընտրությունների հետ կապված գործընթացները: «Լուսավոր Հայաստան կուսակցության խորհրդի նախագահ Էդմոն Մարուքյանը «168 ժամի» թղթակցի հետ զրույցում նշել է, որ համաժողովում կլինեն ելույթներ, կներկայացվեն մոտեցումներն ու ծրագրերը, որը նախընտրական ծրագրի հիմքն է լինելու, իսկ բուն նախընտրական ծրագիրն ավելի ուշ և ավելի մանրամասն կլինի: Համատեղ ցուցակ համաժողովում չի ներկայացվելու: Ըստ Էդմոն Մարուքյանի՝ ընտրացուցակ ներկայացնելը դեռ վաղ է: Նա հայտնել է, որ Գագիկ Ծառուկյանի դաշինքի հետ միության հարց «Ելքում» չի քննարկվել: «Բանակցությունները շարունակվում են «Ժառանգություն» կուսակցության հետ: Մենք հույս ունենք, որ «Ժառանգությունը», դեռ հնարավոր է՝ միանա մեզ: Այդ ուղղությամբ քննարկումներ կան և այս պահին ես ավելի բնական ու հնարավոր եմ համարում «Ժառանգության» միացումը ՝ նաև արժեքային համակարգի տեսլականի առումով»,- ասել է Մարուքյանը:
Հետևեք մեզ Viber-ում
