ՀՀԿ-ի ներսում լինելու է մրցակցություն․ ՀՀԿ-ականի խոստովանությունը
ՀՀԿ-ական պատգամավոր Լեռնիկ Ալեքսանյանը կարծում է, որ հիմա ռեալ իրավիճակ է փոխվել ու Գագիկ Ծառուկյանի վերադարձն այդ համատեքստում իշխանության համար ընկալելի է․«Նախկինում ինքը արյունահեղության կոչեր էր անում եւ այլն, իսկ հիմա հայտարարության մեջ բոլորովին այլ ուղղվածություն ունի»։
-Պարոն Ալեքսանյան, Ծառուկյանի շրջապատից հայտարարում են, որ իշխանությունն այնքան է թուլացել, որ չկարողացավ կանխել Գագիկ Ծառուկյանի վերադարձը։ Համաձայն եք։
-Ամենեւին էլ ՀՀԿ-ն այսօր թուլացած չէ ու ավելի կուժեղանա, երբ մենք ուժեղ ընդդիմություն ունենանք, դաշտն ավելի կզգոնանա եւ ավելի կմաքրվի։
-ՀՀԿ-ականների համար Ծառուկյանի քաղաքական գործունեությունն անընդունելի էր, ինչու դարձավ ընդունելի, ուժեղ ընդդիմություն։
-Գիտեք այն ժամանակ ուրիշ էր, կոչերն էին ուրիշ, արյունահեղության էին տանում, հիմա ըստ հայտարարության ուրիշ է, թե հետագայում ինչ կլինի, կտեսնենք։
-Եթե Ծառուկյանը հայտարարի, որ իշխանափոխության է գնում, ապա նորից կկասեցնեք նրա գործունեությունը։
-Կասեցնելու խնդիր չկա, բայց ուրիշ կլինի, չեմ ուզում...հիմա հաստատ չեմ ուզում ինչ-որ բաներասել։ Բայց ասում եմ, ինքան ընդդիմությունը ուժեղ լինի, այնքան ՀՀԿ-ականը ուժեղ կլինի։ Տեսեք ռեյտինգային քվեարկության մասին տեսակետ կա, թե իբր դա ամբողջովին իշխանության օգտին է, բոլորը ՀՀԿ-ի ձայներին են նպաստելու։ Այո, էլի դրական է, բայց ոչ ձայներ բերելու իմաստով։ Դուք պատկերացրեք, որ ներքին օղակներում կգնա մրցակցություն եւ այդ փող բաժանել, կաշառքներ եւ այլն, եւ այլն...Հանրապետականների մեջ կան մարդիկ, որոնք հակված են գնալ մաքուր ընտրությունների, իրենք իրենց հետ կմրցեն, որ ինչքան հնարավոր է մաքուր ընտրություն գնա։
-Միեւնույն է, փող տվողը կտա։
-Չէ, որ ՀՀԿ-ականների միջեւ, եթե լինի այդ մրցակցությունը, շատ ավելի կնվազի, մրցակցությունը ներքին խոհանոցում շատ ավելի ուժեղ կլինի։ Նախագահը եւ կուսակցությունը դեմ է այդ ամենին, կողմ են մաքուր ընտրություններին, բայց միշտ էլ արջի ծառայություններ մատուցողներ լինում են։ Համենայն դեպս, եթե ՀՀԿ-ականները իրար դեմ մրցակցեն, դա ինքնամաքրման պրոցես է։
-Հատկապես, որ շարունակ տեղեկություններ են տարածվում, որ ՀՀԿ-ում միասնականություն չկա, կա Սամվել ու Կարեն Կարապետյանների թիմ, Հովիկ Աբրահամյանն է ըստ մամուլի ցանկանում հեռանալ ՀՀԿ-ից, այս մրցակցությունը վտանգավոր չէ իշխանության համար։
-Դրանք ընդամենը խոսակցություններ են։Պայքարն ուրիշ բան է, մրցակցությունը՝ ուրիշ բան։Մենք ուրիշ կուսակցությունների հետ պայքարելու ենք, իսկ մեր ներսում լինելու է մրցակցություն, որը նպաստելու է, որ ընտրություններն ավելի մաքուր լինեն։
-Մամուլը գրում է, որ Հովիկ Աբրահամյանը Մոսկվա է մեկնել, իր դիրքերն է ճշգրտում, կարող է դուրս գալ ՀՀԿ-ից եւ այլն։
-Ճանաչելով իրեն, ես չեմ կարծում։
-Իշխանության ներսում իշխանափոխություն չեք կանխատեսո՞ւմ։
-Իհարկե, ոչ, կրկնում եմ լինելու է մրցակցություն դիրքերի ամրապնդման համար, որը շատ բնական է։
Անի Սահակյան