Դատախազությունը որոշել է.Լապշինին կարտահանձնեն Ադրբեջանին

Բելառուսի Գլխավոր դատախազի տեղակալը որոշում է կայացրել բավարարել Ադրբեջանի գլխավոր դատախազության խնդրանքը՝ Ռուսաստանի և Իսրայելի քաղաքացի, բլոգեր Ալեքսանդր Լապշինին Ադրբեջանին արտահանձնելու վերաբերյալ: Հայտնի բլոգերը, հիշեցնենք, Արցախ այցելելուց հետո հայտնվել էր Ադրբեջանի «սև ցուցակում», ապա 2-րդ անգամ էր այցելել Բաքու՝ ուկրաինական անձնագրով: Լապշինը նաև իր բլոգում հրապարակումներ էր կատարել Ադրբեջանի մասին՝ ներկայացնելով խնդիրները, որոնց ինքը բախվել էր այցելության ժամանակ, քննադատել քաղաքականությունը: Որոշումը դեռ չի տրամադրվել Լապշինի փաստաբաններին։ Բելառուսի գլխավոր դատախազի տեղակալ Ալեքսեյ Ստուկը նշել է, որ որոշման հիմք են հանդիսացել Ադրբեջանի գլխավոր դատախազության ներկայացրած լ դիմումը. « Ալեքսանդր Լապշինը, ով ունի մի շարք երկրների քաղաքացիություն,նախապես նախնական հանցավոր համաձայնության մեջ է մտել Ադրբեջանի գրավյալ տարածքներում բնակվող հայկական զինված ուժերի հետ, խախտել է «Ադրբեջանի պետական սահմանների մասին» եւ «Անձնագրի մասին» օրենքները: 2011 և  2012 թվականներին  նա Ադրբեջանի պետական սահմանները հատել է հսկիչ-անցագրային կետերից դուրս գտնվող տարածքից եւ առանց որոշակի փաստաթղթերի ներթափանցել է գրավյալ տարածքներ: Նա իրեն պատկանող «http//puerrtto.livejournal.com» կայքում իր այցելած երկրների շարքում Հայաստանի ու Ադրբեջանի հետ մեկտեղ թվարկել է նաեւ Լեռնային Ղարաբաղը՝ այն ներկայացնելով որպես անկախ պետություն: Բացի այդ, նա 2016 թվականի ապրիլի 6-ին եւ հունիսի 29-ին արած գրառումներում աջակցություն է հայտնել անջատական վարչակարգի անկախությանը եւ Ադրբեջանի տարածքային ամբողջականությունը պառակտող կոչեր հնչեցրել»: