«Կարմիր բերետներ»-ը միանում է «Համախմբում», «Երրորդ հանրապետություն» եւ ՀԴԿ-ի դաշինքին
«Կարմիր բերետներ» կազմակերպությունը հայտարարություն է տարածել գալիք խորհրդարանական ընտրությունների վերաբերյալ։ «Հանուն Հայաստանի եւ Արցախի անվտանգության ամրապնդման, եւ հանուն մեր երկրի քաղաքացիների բարեկեցիկ կյանքի ապահովման՝ մեզ քաղաքական ու տնտեսական կյանքի առաջընթաց է պետք։ Դա է հանրության ճնշող մեծամասնության պահանջը։ Շատ լավ հասկանալով, որ այդ պահանջն իրականացնելու պատմական պահը առաջիկա խորհրդարանական ընտրություններն են՝ «Կարմիր բերետներ» ռազմահայրենասիրական կազմակերպությունը կոչ է անում հասարակական ու քաղաքական ուժերին գնալ լայն համախմբման և հասնել դրական փոփոխությունների։ Մենք ողջունում ենք և միանում «Համախմբում» կուսակցության, «Երրորդ հանրապետություն» կուսակցության և Հայաստանի դեմոկրատական կուսակցության ստեղծած դաշինքին և հույս հայտնում, որ դաշինքն այդ կընդլայնվի՝ ստանձնելով փոփոխությունների դրոշակակրի դերը։ Ապրիլի 2-ին նշանակված ընտրություններն իրենց մեջ խորհուրդ են պարունակում։ Մեր զինվորների ու սպաների թափված արյունը պարտավորեցնում է բոլորիս։ Քառօրյա մարտերից մեկ տարի անց մենք ներքին կյանքում հաղթանակ պետք է տանենք և տեր կանգնենք մեր անկախությանը։ «Կարմիր բերետներ» ռազմահայրենասիրական կազմակերպության խորհուրդ»,-նշվում է հայտարարության մեջ։ Հիշեցնենք, որ կազմակերպության նախագահն է Արթուր Ալեքսանյանը՝ Ամարասի Արթուրը :
Հետևեք մեզ Viber-ում
