Ալիևին «գլուխ գովալ» սովորեցնողները

ՀԱՊԿ գլխավոր քարտուղարի պաշտոնից հեռացող Նիկոլայ Բորդյուժան, ինչպես հայտնի է, դեկտեմբերի 29-ին տեղի ունեցած միջադեպի վերաբերյալ մի դիրքորոշում էր արտահայտել, որը խիստ ոգևորել էր պաշտոնական Երևանին: Նա օգտագործել էր ԼՂՀ ձևակերպումը, ինչը Հայաստանում համարեցին ՀԱՊԿ-ի կողմից հստակ դիրքորոշում... Դեկտեմբերի 29-ին Հայաստանի Տավուշի մարզի Չինարի գյուղի մերձակայքում տեղի ունեցած միջադեպի վերաբերյալ հայտարարությամբ, որը հրապարակվել էր կազմակերպության պաշտոնական կայքէջում, ՀԱՊԿ այժմ արդեն նախկին գլխավոր քարտուղար Նիկոլայ Բորդյուժան սադրիչ էր գնահատել` «ՀԱՊԿ անդամ երկրի տարածքում տեղի ունեցած այդ գործողությունները՝ հատկապես այս տարվա ապրիլին Լեռնային Ղարաբաղի Հանրապետությունում ծանր սպառազինության և զրահատեխնիկայի կիրառմամբ տեղի ունեցած բավական լուրջ միջադեպի ֆոնին»: Այդ ձևակերպումները բուռն վրդովմունք էին հարուցել Ադրբեջանում, որտեղ նաև Բորդյուժայի պաշտոնանկության կոչեր հնչեցին: Հունվարի 1-ից ՀԱՊԿ գլխավոր քարտուղարի պարտականությունները փոխանցվեցին Բորդյուժայի տեղակալ Վալերի Սեմերիկովին, դեկտեմբերի 29-ի հայտարարությունն էլ ՀԱՊԿ պաշտոնական կայքում ներկայումս գտնել հնարավոր չէ: Իհարկե, բոլորը մոռացել էին, որ ԼՂՀ ձևակերպումն արել էր պաշտոնից հեռացող Բորդյուժան, նրա պաշտոնավարումը 2 օր անց ավարտվում էր: Բայց սա դեռ ամբողջը չէ: Երեկ ՀԱՊԿ-ն հարկ է համարել լրացուցիչ «պարզաբանումներով» հանդես գալ... ՀԱՊԿ մամուլի քարտուղարը հաղորդագրություն է տարածել՝ վստահեցնելով, թե լրատվամիջոցների՝ կազմակերպության շուրջ վերջին շրջանի շատ հրապարակումներ «ոչ այնքան օբյեկտիվ բնույթ են կրում, իսկ երբեմն էլ չեն համապատասխանում իրականությանը»: «Մասնավորապես, զանգվածային լրատվամիջոցները մեծ ուշադրություն են հատկացնում հայ - ադրբեջանական սահմանին 2016թ. դեկտեմբերի 29-ին տեղի ունեցած միջադեպի վերաբերյալ Ն․Ն․ Բորդյուժայի մեկնաբանությանը: ՀԱՊԿ քարտուղարությունը Ն․Ն․ Բորդյուժայի մեկնաբանության էության պարզաբանում ավելի վաղ տվել է, որտեղ ընդգծված ուշադրություն էր դարձվում այն բանին, որ Կազմակերպության Գլխավոր քարտուղարը հատուկ անհանգստություն և լուրջ մտահոգություն է արտահայտել այն կապակցությամբ, որ զինված միջադեպը տեղի է ունեցել ՀԱՊԿ անդամ պետության սահմանին», - ասված է հաղորդագրությունում: Ապա` ՀԱՊԿ մամուլի քարտուղար Վլադիմիր Զայնետդինովը հստակեցնում է. «Ինչ վերաբերում է Լեռնային Ղարաբաղի հակամարտության կարգավորման հարցին, պետք է նշենք, որ ՀԱՊԿ դիրքորոշումն արտացոլված է Կազմակերպության անդամ պետությունների հայտարարությունում, որը ընդունվել է 2016թ. հոկտեմբերի 14-ին Երևանում՝ Հավաքական անվտանգության խորհրդի նստաշրջանում: Քարտուղարությունն իր աշխատանքում հետևողականորեն և խստիվ մնում է այդ դիրքորոշմանը»: Փաստորեն, ՀԱՊԿ-ը «անթույլատրելի է համարում Ն. Բորդյուժայի հրաժարականը 2016թ. դեկտեմբերի 29-ի միջադեպի վերաբերյալ մեկնաբանության հետ կապելը», պնդելով, որ նրա՝ որպես գլխավոր քարտուղարի լիազորություններն ավարտվել են 2016թ. դեկտեմբերի 31-ին՝ «2015թ. դեկտեմբերին Մոսկվայում կայացած Հավաքական անվտանգության խորհրդի նստաշրջանում պետությունների ղեկավարների ընդունած որոշմանը խստորեն համապատասխան»: Հիշեցնենք նաև, որ ՀԱՊԿ գլխավոր քարտուղարի պաշտոնը դեռևս մեկ տարի առաջ ռոտացիոն կարգով պետք է փոխանցվեր Հայաստանի ներկայացուցչին, ինչը, սակայն, տարբեր պատճառաբանություններով նույնպես տեղի չի ունենում, և բոլորին պարզ է, թե ինչու... Որոշ երկրներ չեն ցանկանում Հայաստանի ներկայացուցչի նշանակումը ՀԱՊԿ-ում` դարձյալ Ադրբեջանի քմահաճությունների պատճառով: Ինչպես տեսնում ենք, Հայաստանի անդամակցությունը թե՛ ՀԱՊԿ-ում, թե՛ ԵԱՏՄ-ում գրոշի արժեք էլ չունի: Այդ կազմակերպություններում Հայաստանի «դաշնակիցներն» են պետություններ, որոնք իրենց ամեն քայլն ու հայտարարությունն անելուց առաջ մտածում են Ադրբեջանի դիրքորոշման մասին: Թերևս, այս առումով` միանգամայն «հասկանալի» է այն տոնայնությունը, որն օրեր առաջ գործածեց Իլհամ Ալիևը` խոսելով ՀԱՊԿ-ի մասին... Կառավարության ընդլայնված նիստում, որը նվիրված էր 2016թ․ սոցիալ-տնտեսական զարգացման արդյունքների ամփոփմանը, նա անդրադարձել էր նաև Ղարաբաղյան հակամարտության կարգավորմանը և դեկտեմբերին Չինարիի վրա ադրբեջանական դիվերսիոն հարձակմանը։ Խոսելով այդ միջադեպի առիթով ՀԱՊԿ-ի արձագանքի մասին՝ Ալիևն ասել էր. «ՀԱՊԿ-ի նախկին ղեկավարները քաղաքական մեծ սխալ են գործել՝ որդեգրելով հայամետ դիրքորոշում և կիրառելով անընդունելի ձևակերպումներ (ԼՂՀ)։ Այսօր մենք գիտենք նրանց ճակատագիրը։ Մենք ցանկանում ենք վերականգնել մեր տարածքային ամբողջականությունը և մեր դրոշը պարզել կորսված բոլոր հողերում։ Մենք կլուծենք խնդիրը։ Ապրիլյան բախումները զգալի քայլ դարձան այդ ուղղությամբ։ Մենք ունակ ենք յուրաքանչյուր պահի հարցը լուծել ռազմական ճանապարհով։ Ստատուս- քվոն անընդունելի է, և պետք է փոխվի»։ Ահա, թե ովքեր են Ալիևին «գլուխ գովալու» հիմքեր տալիս... Թամար Բագրատունի