Ինչ հաշվարկ ունեն գեներալ Մանվելի դեմ
ՀՀ քննչական կոմիտեն հաղորդագրություն էր տարածել, որում մանրամասներ էր ներկայացրել Էջմիածնի քաղաքապետ Կարեն Գրիգորյանի, քաղաքապետի թեկնածու Արթուր Թումանյանի եւ այլ անձանց մասնակցությամբ աղմկոտ միջադեպի մասին: Ըստ քննչական կոմիտեի, 2016թ. սեպտեմբերի 16-ին` ժամը 23:30-ից 23:55-ն ընկած ժամանակահատվածում, անձնական հարցեր պարզաբանելու նպատակով, Էջմիածին քաղաքի Սպանդարյան փողոցում հետապնդման են ենթարկվել նույն քաղաքի բնակիչներ Արթուր Թումանյանը և Ստեփան Աբգարյանը: Այդ ընթացքում վերջիններս «Վազ 21-06» մակնիշի ավտոմեքենայով փորձել են դիմել փախուստի, սակայն չեն կարողացել և Էջմիածին քաղաքի Սպանդարյան և Մեխակ Մեխակյան փողոցների խաչմերուկում` թիվ 6-րդ մանկապարտեզի դիմաց, ենթարկվել ֆիզիկական բռնության։ Նշանակված դատաբժշկական փորձաքննությունների եզրակացություններով՝ Ա.Թումանյանին պատճառվել է միջին, իսկ Ս.Աբգարյանին թեթև մարմնական վնաս։ Կոմիտեն ապացուցված չի համարել Կարեն Գրիգորյանի դեմ կազմակերպված մահափորձի վարկածը: Այնինչ Էջմիածնի քաղաքապետի ընտրությունների նախօրեին լուրեր տարածվոցին, թե մահափորձ է իրականացվել գեներալ Մանվել Գրիգորյանի որդու, գործող քաղաքապետ Կարեն Գրիգորյանի նկատմամբ: Այս տեղեկությունը բավականին դրամատիկ մանրամասներով ներկայացվեց հանրությանը, իբր գնացել են գեներալի որդու դեմ, փորձել վերացնել նրան, ինչի արդյունքում գեներալի հրոսակախումբը ինքնապաշտպանության է անցել եւ այդ ամենի ընթացքում վնասվածներ են ստացել Արթուր Թումանյանն ու կողմնակիցները: Ու չնայած Թումանյանի կողմնակիցները հակառակն էին պնդում, համացանցն էլ լցվել էր Թումանյանի դեմքն ամբողջությամբ կապտուկներով ծածկված լուսանկարներով, այդուհանդերձ գեներալի կողմնակիցներն էլ պնդում էին, որ ատրճանակով կրակել են «Լեքսուս» մակնիշի ավտոմեքենայի ուղղությամբ, որի մեջ գտնվել են Էջմիածնի քաղաքապետ Կարեն Գրիգորյանը և նրա եղբայրը: Հետո ընտրություններ եղան, Կարեն Գրիգորյանը հաղթեց, իսկ այսօր արդեն ՀՀ քննչական կոմիտեի ՀԿԳ քննության գլխավոր վարչությունը ներկայացնում է կատարվածի իրական պատկերը՝ պարզաբանելով, որ ոչ մի մահափորձ էլ տեղի չի ունեցել: Ավելին, եղել է ճիշտ հակառակը, հետապնդման են ենթարկվել Արթուր Թումանյանը և Ստեփան Աբգարյանը ու ենթարկվել ֆիզիկական բռնության:Հիմա քրեական գործի նյութերով հարուցվել է նոր քրեական գործ, որի շրջանակներում մեղադրանքներ են առաջադրվել գեներալի որդու երեք կամակատարներին: Թեպետ օրենքը հանցագործության կազմակերպիչների նկատմամբ նույնպես պատասխանատվություն է սահմանում ու առնվազն տարակուսելի է, թե ինչու է գեներալի որդին դուրս մնացել այդ շրջանակից, այդուհանդերձ փաստն ինքնին արտասովոր է ու անհավանական: Իրավապահները, վերջապես, փորձում են հասնել մի տեղ, որի իրավունքը տարիներ շարունակ չեն ունեցել: Չի բացառվում, որ կախված հանգամանքներից օղակն էլ ավելի կսեղմվի գեներալի շուրջ՝ հասնելով ընդհուպ նրան կամ տղային: Այս համատեքստում թերեւս պատահականությունների շարքից չէր նաեւ հայկական հեռուստաեթերով ցուցադրվող քրեական հեղինակություն Արման Ասատրյանի՝ Դոն Պիպոյի <<փառահեղ>> կյանքն ու կատարած ազգանվեր գործունեությունը: Դոն Պիպոյի եւ Գրիգորյանների թշնամական հարաբերությունների մասին բոլորին է հայտնի, Պիպոյի նկատմամբ վերաբերմունքը տեղի տվեց եզրահանգումների, թե գեներալին զսպելու, նրա ճանապարհը գողականով փակելու անհրաժեշտություն է առաջ եկել ու այդ պատճառով էլ ուժեղացվում է մրցակիցը: Առջեւում խորհրդարանական ընտրություններ են ու ով գիտե, թե ինչ պլաններ են գծվել Գրիգորյանների համար, ինչ հաշվարկ է այս ամենի հիմքում ընկած, մի բան կարելի է կանխատեսել, Գեներալ Մանվելի կլանի դեմ կամ այսկերպ նախազգուշական կրակոց են բաց թողնում՝ ընտրություններին լիակատար վերահսկելի դարձնելու նպատակով, կամ էլ որոշել են նրանց իսկապես դուրս մղել ասպարեզից ու հիմա հնարավոր ընդվզումը կանխելու գործիքներ են ասպարեզ նետվում: Անի Սահակյան