Գագիկ Ծառուկյանն ու Սերժ Սարգսյանը հանդիպել են ու պայմանավորվել

  Սերժ Սարգսյանի հետ առճակատումից երկու տարի անց՝  հանդես գալով հեռուստաուղերձով «Բարգավաճ Հայաստան» կուսակցության նախկին առաջնորդը վերջապես հրապարակեց որոշումը՝ վերադառնում է քաղաքականություն: Գագիկ Ծառուկյանը մասնակցելու է առաջիկա ընտրություններին՝ ձևավորելով լայն դաշինք: «2017 թվականի խորհրդարանական ընտրությունները ճակատագրական են լինելու Հայաստանի ապագայի համար: Նկատի ունենալով մեր երկրի առջև ծառացած ներքին և արտաքին մարտահրավերները, ինչպես նաև իմ քաղաքականություն վերադառնալու հանրային պահանջը, ես հայտարարում եմ, որ բացում եմ քաղաքական գործունեության փակված էջը և մասնակցելու եմ 2017 թվականի խորհրդարանական ընտրություններին՝ ձևավորելով լայն դաշինք», որոշումը հիմնավորեց  Ծառուկյանը: Երկու տարի առաջ տեղի ունեցածից հետո  Ծառուկյանի վերադարձը խիստ անհավանական էր թվում, քանզի կողմերը  սպառել էին վիրավորանքի ողջ պաշարը, հատել թուլյատրելիի սահմանը: Ու չնայած նույն թափով էլ երկու տարում վերականգնվել էր Ծառուկյան-Սերժ Սարգսյան հարաբերությունները, նախկինից էլ   ավելի ջերմ դարձել, բայց խոսքերն արդեն ասված էին, ու քաղաքականության էջը թվում էր՝ փակված: Մեզ հայտնի է դարձել սակայն, որ օրերս Սերժ Սարգսյանն ու Գագիկ Ծառուկյանը հանդիպել են ու վերջնական զրույց է ընթացել Ծառուկյանի վերադառնալ-չվերադառնալու հարցի շուրջ, որը ծավալվում էր արդեն ամիսներ շարունակ: Մի քանի ժամ տեւած զրույցի ընթացքում յուրաքանչյուրն  իր փաստարկներն է ներկայացրել: Ծառուկյանը հետաքրքրվել է, թե ապագա խորհրդարանում ՀՀԿ-ի ներկայացվածության հարցում ինչ պլաններ  ունի Սերժ Սարգսյանը, լսելով պատասխանը, որ ՀՀԿ ղեկավարը մեծամասնությանը տիրանալու նպատակ ունի, Ծառուկայնը հետաքրքրվել է նաեւ մնացած տեղերի ճակատագրով, թե ում համար է նախատեսել:  Սերժ Սարգսյանը  հայտնել է, թե բաշխելու է մնացյալի մեջ,որից հետո Ծառուկյանը ներկայացրել է իր  փաստարկները, թե ինչու է ցանկանում, որ ինքն էլ հնարավորություն ունենա հայտնվելու քաղաքական դաշտի դերակատարների շարքերում: ԲՀԿ նախկին առաջնորդի ու Սերժ Սարգսյանի միջեւ հարցուպատասխանից հետո որոշումն առաջինի օգտին է կայացել: Սերժ Սարգսյանը համաձայնել է Ծառուկյանի հետ, որ վերջինը իր խոսքի տերն է եղել ու չի անցել թույլատրելի սահմանը, չի տարել ժողովրդին իշխանության դեմ առճակատման,մշտապես մնացել է  խաղի կանոնների թույլատրելի սահմանում եւ ի վերջո, Սերժ Սարգսյանի բնորոշմամբ երկրի խոշոր բարերարներից է, եւ ուրեմն, տարակուսել է Ծառուկյանը՝ եթե մյուսներին թույլատրվում  է բավարարել քաղաքական նկրտումները, ապա ինչո՞ւ չի կարելի ինձ: Սերժ Սարգսյանի հետ պայմանավորվածություն է ձեռք բերվել, որ սահմանահատման դեպքեր չեն լինելու, պահպանվելու է նաեւ կոռեկտության  չափը: Անկախ պայմանավորվածությունների ինչ-որ պահից անվերահսկելիության վտանգը հաստատ կանխատեսում է նաեւ Սերժ Սարգսյանը, բայց նրան այլընտրանք թերեւս չի թողել Ծառուկյանի շուրջ վերջին շրջանում ընթացող պրոցեսները: Մեզ տեղեկություններ են հասել, որ մասնավորաբար, վերջերս Կարապետյանները Ծառուկյանին երկընտրանքի առջեւ են կանգնեցրել:  Սամվել եւ Կարեններ Կարապետյանները ինչպես գիտենք ոչ միայն տնտեսական, այլեւ քաղաքական հետաքրքրություններ են ցուցաբերում, որոնց մասին մենք գրել ենք: Տաշիր գրուպի սեփականատեր Կարեն Կարապետյանը մի քանի հոգու հետ հանդիպման ժամանակ Ծառուկյանին  վերջնագիր է ներկայացրել՝ ընտրիր, մեզ հետ ես, թե՞ Սերժ Սարգսյանի: Ամենայն հավանականությամբ  Սարգսյանը տեսնելով քաղաքական մուտքի հարցում Ծառուկյանի շահագրգռվածությունը, միեւնույն ժամանակ Կարապետյանների հետաքրքրությունը , որոշում է կայացրել Ծառուկյանի օգտին, ինչից կարելի է եզրակացնել Կարապետյանների նկատմամբ Սերժ Սարգսյանի անվստահության մասին: Նկատենք, որ Սարգսյան-Ծառուկյան փոխպայմանավորվածությունների մասին է վկայում նաեւ ՀՀԿ-ականների մեղմ արձագանքը ԲՀԿ նախկին առաջնորդի վերադարձի կապակցությամբ: Ծառուկյանի հասցեին ամենաթունոտն արտահայտված Արմեն Աշոտյանը երկու տարի անց այդ առիթով դրական է արձագանքել «Ես դրական եմ վերաբերում քաղաքական ուժերի ու գործիչների, այդ թվում՝  Գագիկ Ծառուկյանի ու ԲՀԿ-ի մտադրություններին մասնակցելու 2017 թվականի խորհրդարանական ընտրություններին։ Նախաձեռնելով սահմանադրական բարեփոխումները` մենք ստեղծեցինք բոլոր հիմքերը Հայաստանի քաղաքական համակարգը դարձնելու առավել բաց և առավել ճկուն։ Այժմ քաղաքական համակարգը կբարեփոխվի և կբարելավվի առաջին հերթին քաղաքական միավորումների մրցակցության շնորհիվ: Այս տեսանկյունից գալիք ընտրությունները կարևորագույն նշանակություն ունեն մեր կողմից առաջ քաշված զարգացման ուղեգծի իրականացման համար։ Հետևաբար, յուրաքանչյուր քաղաքական թիմ, որ ասելիք ունի ժողովրդին և կարող է պատշաճ ներկայանալ տրամաբանված ծրագրով, իրավունք ունի փորձել իր ուժերը գալիք ընտրություններում, և դա ողջունելի է»: Իսկ ՀՀԿ-ական պատգամավոր Գագիկ Մելիքյանը անգամ հայտարարել ԲՀԿ-ՀՀԿ հնարավոր համագործակցության մասին: Թե ինչ էին երկու տարի առաջ այս մարդիկ ասում Ծառուկյանի հասցեին,կխնայենք մեր ընթերցողին, որովհետեւ ցանկացողները այդ ամենը վերհիշելու բազում տարբերակ ունեն:   Անի Սահակյան