Ազատամարտիկ Խաչիկ Ավետիսյանն առերեսվել է «հանցավոր» խմբի ղեկավար Արթուր Վարդանյանի հետ

2015 թվականի նոյեմբերի 25-ին ԱԱԾ-ի կողմից վնասազերծված «հանցավոր» խմբի գործով կալանավորված ազատամարտիկ Խաչիկ Ավետիսյանի եւ սույն գործով երեք մեղադրյալների մասնակցությամբ առերես հարցաքննություններ են կատարվել: Մասնավորապես՝ Խաչիկ Ավետիսյանն առերեսվել է «զինված» խմբի ղեկավար Արթուր Վարդանյանի, Արա Պողոսյանի եւ օրերս ազատության մեջ հայտնված Ավետիս Բարեյանի հետ: Այս մասին, ի պատասխան armtimes.com-ի հարցին ասել է Ավետիսյանի պաշտպան Գիվի Հովհաննիսյանը: Նշենք, որ քրեական դատավարության օրենսգրքի 216 հոդվածի համաձայն՝քննիչն իրավունք ունի կատարել նախօրոք հարցաքննված երկու այն անձանց առերեսում, որոնց ցուցմունքներում էական հակասություններ կան: Հարցին, թե ի՞նչ հակասություններ են եղել Խաչիկ Ավետիսյանի եւ մասնավորապես Արթուր Վարդանյանի ցուցմունքներում, Գիվի Հովհաննիսյանը չպատասխանեց՝ նշելով, որ նախաքննական գաղտնիք է: Հիշեցնենք, որ ազատամարտիկին մեղադրանք է առաջադրվել ՀՀ քրեական օրենսգրքի 223-րդ հոդվածի 1-ին եւ 2-րդ մասերով՝ հանցավոր համագործակցություն ստեղծելը կամ հանցավոր համագործակցությանը մասնակցելը եւ ՀՀ ՔՕ 235 հոդվածի 1-ին մասով (ապօրինի զենք պահելը, կամ կրելը): Երեւանի Կենտրոն եւ Նորք-Մարաշ վարչական շրջանների դատարանի որոշումը, ըստ որի՝ նոյեմբերի 25-ի գիշերը վնասազերծված զինված խմբի կալանավորված որպես խափանման միջոց էր ընտրվել երկամսյա կալանքը։