Գիտենք, թե ով ոնց է հարստացել, եթե մեկին կարելի է, մյուսին ինչո՞ւ չի կարելի
Վարդան Օսկանյանի գլխավորած «Համախմբում» կուսակցությունը ամենայն հավանականությամբ առաջիկա օրերին կհայտարարի ապրիլի 2-ի խորհրդարանական ընտրություններին մասնակցելու ձեւաչափի մասին։ Այս մասին մեծ հետ զրույցում հայտնեց կուսակցության վարչության անդամ, ազատամարտիկ, «Արաբո» ջոկատի հրամանատար Մանվել Եղիազարյանը։ Նշենք, որ տեւական ժամանակ է լուրեր են շրջանառվում, որ «Համախմբում» կուսակցությունը նախընտրական բանակցություններ է վարում տարբեր ուժերի հետ՝ ընտրություններին դաշինքով կազմվելու վերաբերյալ։ Բայց ամենահավանականը Համախմբում-Սեյրան Օհանյան-Վիկտոր Դալլաքյան պլատֆորմն է, որին կարող են միանալ «Ժառանգությունը», ինչպես նաեւ Դմեկուսը՝ Արամ Սարգսյանի ղեկավարած։ Մանվել Եղիազարյանը վստահեցրեց, որ ինքը բանակցություններին ներգրավված չէ ու չի կարող այդ մասին մանրամասնել հայտնեց, բայց ընդգծեց, որ իշխանություններին տապալելու համար հարկավոր է լայն կոնսոլիդացիա։ -Պարոն Եղիազարյան, «Համախմբումը» որ ուժերի հետ է բանակցություննե վարում , որ ուժերից է հնարավոր դաշինք ուրվագծվում, առհասարակ իշխանություններին տապալելու ինչ մարտավարություն պետք է որդեգրի ընդդիմությունը։ -Ես այդ բանակցությունների մասին չեմ կարող խոսել, որովհետեւ նոր եմ վերադառնում Երեւան, այո, գիտեմ, որ բանակցություններ են ընթանում ու կարծում եմ, որ ընտրություններին պետք է լայն միավորմամբ մասնակցել։ Գիտեք, եթե դժբախտությունը բոլորին է վերաբերում, բոլորին է պատուհասել, ապա պետք է բոլորը միասին պայքարեն, առանց հարցնելու, թե ով ով է։ Գիտեք ոչ մեկս էլ հրեշտակներ չենք, բայց այսօր այնպիսի իրավիճակ է մեր առջեւ ծառացած, որ այս իրավիճակը պետք է կարգավորենք, իսկ այդ կարգավորելու համար ես կարծում եմ, որ բոլորը պետք է միավորվեն։ Իսկ եթե չեն փորձում միավորվել, ուրեմն այս իրավիճակն իրենց ձեռք է տալիս, թող չբողոքեն, ասեն՝ վայ վատ ենք ապրում, վայ թալանում են, այս են անում․․․ -Իսկ իրատեսակա՞ն եք համարում, որ ընդդիմադիրները բոլորը միավորվեն մի հարկի տակ, կան ամբիցիաների, ֆինանսական եւ բազում խնդիրներ։ -Բանակցությունները գնում են, ես հիմա չեմ կարող ասել՝ ռեալ է, թե ռեալ չէ, սպասենք մի քանի օր եւ տեսնենք բանակցությունների արդյունքը։ -Առաջին նախընտրական դաշինքը ձեւավորվել է, դա Ելք դաշինքն է, որը նաեւ հայտարարեց, թե բաց են այլ ուժերի համար, «Համախմբումը» այդ դաշինքին դիմել է, թե՞ դաշինքում չեն ընդունում։ -Ես շրջանում եմ եղել եւ տեղեկություններ չունեմ վերջին բանակցություններից,հենց ունենամ, անպայման կներկայացնեմ։ Ես կարող եմ ասել միայն ու ասացի, որ այսպիսի դժվարությունը հաղթահարելու համար պետք է ամբողջ ուժերը համախմբել։ -Պաշտպանության նախկին նախարար Սեյրան Օհանյանն է մտել ընդդիմադիր դաշտ, քաղաքական հայտ է ներկայացրել ու մամուլում տեղեկություններ կան Համախմբման ու Օհանյանի հնարավոր համագործակցության մասին։ Դուք Օհանյանի քայլը ինչպես եք գնահատում, ինչով է նա տարբերվում Հայաստանի մյուս քաղաքական գործիչներից, նրա շանսերն ինչպես եք գնահատում, չեք կարծում, որ նախկին իշխանավորին հեշտ է ճնշել, կես ճանապարհից հետ պահել։ -Հայաստանը հրաշքների երկիր է, այնպիսի մարդիկ են մտնում Ազգային ժողով, այնպիսի մարդիկ են քաղաքական դաշտում հաղթանակ տանում, որ այնպես բացառել ինչ որ մեկի հաղթանակը, ես դժվարանում եմ ասել։ Մենք գիտենք, թե ով ոնց է հարստացել եւ այլն, բայց եթե մյուսները շանս ունեն քաղաքական դաշտում հայտնվելու, ինչու մեկ ուրիշը չպետք է հայտնվի։ -Սեյրան Օհանյանը ամիսներ առաջ իշխանության հետ պատասխանատվություն էր կիսում, նրան ինչպես կընդունեն։ -Իշխանություններն այսօր այնքան խոցելի են, որ ամեն մի մարդ կարող է հայտնվել քաղաքական դաշտում, շատ խոցելի են: Անի Սահակյան