Ծիկրակող պաշտոնյայի հրաշքն ուշանում է

Նախկին ոստիկանապետ Ալիկ Սարգսյանը, որն այժմ ՀՀ նախագահի խորհրդականն է պարզվում է՝ ունիվերսալ պաշտոնյա է, որին, սակայն, չեն նկատում։ Ոստիկանապետի պաշտոնից ազատվելուց հետո բազում պաշտոնների է նա հավակնել ու արտահոսքն անմիջապես տարածվել է լրատվամիջոցներում։ Ալիկ Սերգեյիչն էլ ամեն անգամ ծիկրակել է ու նորից անցել ընդհատակ։ Հիմա էլ մամուլը գրել է ԱԻՆ պաշտոնի համար, որ Սերգեյիչը տենչում է դառնալ արտակարգ իրավիճակների նախարար.«Ես այդ ուղղությամբ չեմ աշխատում: Ես հերքում եմ դա: Ես իմ տեղում աշխատում եմ: Եթե երկրի նախագահը կորոշի, որ ես պիտի տեղափոխվեմ, կտեղափոխվեմ: Չի որոշի, ես իմ տեղում շարունակում եմ հաճույքով աշխատել: Առանձնապես տրամադրություններ չունեմ տեղափոխությունների»,-միեւնույն ժամանակ իրեն ուղղված հարցը սրտապատառ հերքել է նա, հո, չէր ասելու՝ այո, ուզում եմ, էն էլ ոնց եմ ուզում։ «Երկրի ղեկավարը կորոշի՝ ով որտեղ կաշխատի: Դա իմ որոշելիքը չէ: Դուք ուզում եք, որ ասեմ՝ համաձա՞յն եմ, թե չէ, որ աշխատեմ: Դա մի քիչ անհամեստություն էլ կլինի, բայց ես ասում եմ, որ ցանկացած տեղ, ուր կորոշի երկրի նախագահը, ես կաշխատեմ: Բայց էս պահին, ԱԻՆ նախարարի պաշտոնի համար ինձ ոչ մի առաջարկ չի եղել», -շտապել է ասել համեստ Սարգսյանը։ Եւ որ նախկին ոստիկանապետը անհամեստություններ չի սիրում, կարելի է չկասկածել։ Օրինակ նա պաշտոնանկությունից հետո արդեն մի քանի տարի է համեստաբար լռում է ոստիկանական համակարգում տիրող իրավիճակի մասին, լռում է ոստիկանության շուրջ ծավալվող աղմուկի դեպքում, նա ծիկրակում է միայն այն ժամանակ, երբ թափուր պաշտոն կա։ Օրինակ ընդամենը երկու շաբաթ է, ինչ թեւակոխել ենք նոր տարի, բայց աղմկահարույց չորս սպանությունների ու մի քանի ինքնասպանությունների դեպքեր են արձանագրվել։ Ինչու, կա՞ արդյոք ոստիկանության թերացումը,նա կտրականապես հրաժարվում է համակարգի ու նրա շուրջ ընթացող իրադարձությունների մասին կարծիք հայտնելուց՝ ՊՊԾ գնդի գրավում, կարմիր գծերի ու արագաչափերի տուգանքների անարդյունավետ տնօրինում եւ այլն։ Գոնե կարելի է խոսել գողականների մասին։ Վերջին տարիներին Հայաստանը տրանզիտ է դարձել որոշ գողականների համար, էլ չենք ասում, որ Հայաստանում են կազմակերպվում նրանց սխոդկաները։ Իսկ շատերը չեն մոռացել Ալիկ Սարգսյանի հայտնի ելույթն այն մասին, որ Հայաստանում օրենքով գողեր չկան ու ընդհանրապես դա պատմության գիրկն անցած հասկացողություն է։ «Այսօր ինչ օրենքով գող կարող է իմ կողքին կանգնի, կամ իմ ոստիկանի, օպերի: Ոչ մեկի կողքին, ընդամենը շլինքից վերցրած շուռ կտան, կշպռտեն մի կողմ, որովհետեւ դա ով է, ինչ օրենքով գող, ինչ ասել է օրենքով գող: Օրենքով գող չկա, այդպիսի հասկացություն չկա: Վերցրեք պատմությունը կարդացեք ոնց են ստեղծվել օրենքով գողերը, սովետական առաջին տարիներին, ինչի համար են ստեղծվել, ում դեմ եւ ինչ նպատակով, որից հետո այդ անունը մնաց՝ օրենքով գող: Ես այդ բառը սկսում եմ կամաց-կամաց իմ լեքսիկոնից հանել »,- ասում էր Ալիկ Սարգսյանը:Իսկ ուր մնաց այդ թեկուզ անհամեստ, բայց համարձակ Ալիկ Սարգսյանը, հատկապես, որ նա լրատվամիջոցների նկատմամ հանդուրժողականությամբ է աչքի ընկել, անկաշկանդ շփվել լրագրողների հետ։ Մինչդեռ նախկին իշխանավորների պես նա էլ դարձել է մեկ անձի կամքից կառչած մարդ, ով չունի ինքնադրսևորվելու անգամ երեւակայություն: Եվ այսպես էլ պիտի շարունակի ապրել՝ սպասելով հրաշքի, որը կարող է երբեք չգալ, քանի որ կյանքը սիրում է համարձակներին։ Անի Սահակյան