Մենք բանալի չունե՞նք Ղարաբաղի «դռան» համար
Լեռնային Ղարաբաղի հակամարտության լուծման բանալին գտնվում է կողմերի ձեռքում, երեկ ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ պատասխանելով դեկտեմբերի 29-ին Հայաստան-Ադրբեջան սահմանին տեղի ունեցած միջադեպի վերաբերյալ հարցին: «Հայաստանի և Ադրբեջանի միջև տեղի է ունեցել ողբերգական միջադեպ: Մենք ելնում ենք նրանից, որ երկու կողմերը կարող են իրենց մեջ գտնել ուժ և խելամտություն, և, անկասկած, դիվանագիտական հնարավորություններ… այս բարդ իրավիճակին լուծում տալու համար: Լուծման բանալին գտնվում է երկու կողմերի ձեռքում»,- ասել է Զախարովան: Այսպիսով, դեկտեմբերի 29-ին Տավուշի մարզի Չինարի գյուղի մոտ ադրբեջանական ուժերի ձեռնարկած դիվերսիոն ներթափանցման փորձը, ինչի հետևանքով զոհվել էր 3 հայ զինվոր, որևէ մեկը նպատակահարմար չի գտնում ներկայացնել այնպես, ինչպես հարկան է: Այսինքն` հասցեական չի նշվում, որ Ադրբեջանն է ձեռնարկել դիվերսիոն ներթափանցման փորձ, խախտվել է Հայաստանի սահմանը... Եթե ԵԱՀԿ Մինսկի խմբի համանախագահների հայտարարությունում չեզոքությունը կարելի էր բացատրել, որ նրանք մշտապես են բալանսավորված հայտարարություններ տարածում, որպեսզի չվնասեն բանակցային գործընթացին, այն էլ` գոյություն չունեցող գործընթացին, ապա այլ է պատկերը Հայաստանի ռազմավարական դաշնակցին` Ռուսաստանի դեպքում: Բայց այստեղ էլ արդեն զարմանալի ոչինչ չկա: Չէ՞ որ արդեն բոլորի համար պարզ է, որ Ռուսաստան-Ադրբեջան հարաբերություններն այն մակարդակի վրա են, որ Մոսկվան չի կարող դրանք մի կողմ դնել ու քննադատել Ադրբեջանին` Հայաստանի սահմանը խախտելու համար: Այս իրավիճակը, իսկապես, լուրջ է այն առումով, որ Հայաստանը պետք է մտորի, թե ինչպես է այսուհետ հակադարձելու Արցախի ու Հայաստանի դեմ այս արշավին: Ռուսաստանը ստանձնել է ԼՂ կարգավորման ղեկը, և թույլ չի տալու դա խլեն այլ շահագրգիռ կողմեր: Թե ինչով դա կավարտվի, պարզ է բոլորին` կամ պատերազմ, կամ խաղաղության պարտադրանք` հայկական կողմին: Ռուսաստանն արդեն անթաքույց «ղեկավարի» դերի մեջ է մտել: ԵԱՀԿ գործող նախագահ, Ավստրիայի արտաքին գործերի նախարար Սեբաստիան Կուրցը Լեռնային Ղարաբաղի հակամարտության կարգավորման հարցում լիակատար աջակցություն կցուցաբերի ԵԱՀԿ Մինսկի խմբի համանախագահների միջնորդական ջանքերին: Սեբաստիան Կուրցն այս մասին ասել էր որպես ԵԱՀԿ գործող նախագահ երդմնակալության արարողության ժամանակ: Սեբաստիան Կուրցը խոստացել է աջակցել Մինսկի խմբի համանախագահներին ԼՂ հակամարտության կարգավորման հարցում` այդ գործում կարևորելով իր անձնական ներկայացուցիչ Անջեյ Կասպրշիկի, ինչպես նաև պլանավորման խմբի ղեկավար Հանս Լամպալզերի դերը: Այս հայտարարությունից հետո հայտնի դարձավ, որ Սեբաստիան Կուրցը Մոսկվայում ՌԴ ԱԳ նախարար Սերգեյ Լավրովի հետ կքննարկի Լեռնային Ղարաբաղի հակամարտության կարգավորման հարցը: ՌԴ ԱԳՆ պաշտոնական ներկայացուցիչ Մարիա Զախարովան հայտնել է. «Հունվարի 18-ին Ավստրիայի ԱԳ նախարարը հանդիպում կունենա Ռուսաստանի ԱԳ նախարարի հետ: Քանի որ Սեբաստիան Կուրցը ԵԱՀԿ գործող նախագահն է, անդրադարձ է կատարվելու նաև այդ կազմակերպության շրջանակներում համագործակցությանը: Նախատեսվում է նաև քննարկել ԵԱՀԿ տարածքում առկա հակամարտությունների հետ կապված հարցեր` ներառյալ Լեռնային Ղարաբաղի հակամարտությունը և իրավիճակն Ուկրաինայում»,- ասել է Զախարովան: Ինչպե՞ս է հայկական կողմը հակազդելու ռուս-թուրք-ադրբեջանական ձգտումներին` Ղարաբաղի հարցում, առայժմ, պարզ չէ: Չի նշմարվում որևէ ուղի, որով Հայաստանի իշխանությունները կշարժվեին` Ղարաբաղի շուրջ վտանգները չեզոքացնելու ուղղությամբ: Թամար Բագրատունի