Ալիևին հերթական անգամ երես տալու օքեյը

ԵԱՀԿ Մինսկի խմբի համանախագահները հունվարի 9-ին հայտարարություն են տարածել, որում ասվում է. «Երևանն ու Բաքուն շարունակում են միմյանց մեղադրել 2016թ. դեկտեմբերի 29-ին հայ-ադրբեջանական սահմանին գրանցված ներխուժման փորձի կապակցությամբ, որի հետևանքով զոհեր գրանցվեցին։ Հայաստանի զինված ուժերը դեռ պահում են մարտում սպանված ադրբեջանցի զինծառայողի դիակը։ Հրադադարի ռեժիմի խախտումը անընդունելի է և հակասում է կողմերի ստանձնած պարտավորություններին, որոնք լիովին պատասխանատվություն են կրում ուժ չկիրառելու համար»։ Համանախագահները Հայաստանի ու Ադրբեջանի առաջնորդներին կոչ են անում խստապես պահպանել պայմանավորվածությունները, որոնք ձեռք են բերվել 2016թ. բարձր մակարդակով Վիեննայում ու Սանկտ Պետերբուրգում անցկացված հանդիպումների ժամանակ՝ ներառյալ կարճ ժամանակում միջադեպերի հետաքննման ԵԱՀԿ մեխանիզմի ստեղծման վերաբերյալ պարտավորությունները։ Համանախագահները նաև կոչ են անում անհապաղ վերադարձնել աճյունները՝ 2010թ. բարձր մակարդակով Աստրախանում ձեռք բերված պայմանավորվածություններին համապատասխան՝ հաշվի առնելով տվյալ հարցի բացառապես հումանիտար բնույթը։ «Մենք կողմերին կոչ ենք անում դադարեցնել փոխադարձ մեղադրանքներն ու ձեռնարկել անհրաժեշտ բոլոր միջոցները տեղում իրավիճակը կայունացնելու համար»։ Սա, կարելի է ասել, վերջին ժամանակներին հայկական կողմի համար ամենաանբարենպաստ հայտարարությունն է, որովհետև միջնորդները` առանց նշելու դեկտեմբերի 29-ին հայ-ադրբեջանական սահմանին գրանցված ներխուժման փորձի հեղինակին` նշում են, որ Հայաստանի զինված ուժերը դեռ պահում են մարտում սպանված ադրբեջանցի զինծառայողի դիակը: Եվ կրկին ոչ մի խոսք այն մասին, թե ո՞ւմ պատճառով չի հաջողվում սահմանային միջադեպերի ուսումնասիրության առաջարկներն արդեն 8-9 ամիս կյանքի կոչել: Եվ իհարկե, Ադրբեջանի կողմից այդ առաջարկները տապալելու վերաբերյալ` ոչ մի խոսք: Համանախագահների վերջին հայտարարությունը հաշվի առնելով` կարելի է արձանագրել, որ հայկական կողմի նկատմամբ դիրքորոշման կարծրացում է տեղի ունենում ու դա վատ է: ԱՄՆ կառավարությունը հակված է Լեռնային Ղարաբաղի հակամարտության խաղաղ կարգավորմանը ԵԱՀԿ Մինսկի խմբի համանախագահների միջնորդությամբ, APA գործակալությանը հայտնել է ԵԱՀԿ Մինսկի խմբի ամերիկացի համանախագահ Ռիչարդ Հոգլանդը: Նա նշել է, որ համանախագահները պատրաստ են աշխատել կողմերի հետ հակամարտության երկարաժամկետ լուծման ուղղությամբ. «Հրադադարի ռեժիմի պահպանման, Վիեննայում և Սանկտ Պետերբուրգում կայացած վեհաժողովների ժամանակ ձեռք բերված պայմանավորվածությունների լիարժեք իրականացման ուղղությամբ միջոցներ ձեռնարկելու հարցերը քննարկելու նպատակով՝ մենք շարունակում ենք խրախուսել առաջին իսկ հնարավորության դեպքում հանդիպման նկատմամբ (Հայաստանի ու Ադրբեջանի) նախագահների և արտգործնախարարների հետաքրքրվածությունը»,- ընդգծել է նա: Նախ, դեկտեմբերի 29-ին տեղի ունեցած միջադեպից հետո, փաստորեն 2 շաբաթ անց են համանախագահները հայտարարություն անում, սա արդեն ոչ օպերատիվության դրսևորում է: Բացի այդ, այն հասցեական չէ, բնականաբար, այն պատճառով, որ նրանք չեն ուզում է՛լ ավելի բարդացնել իրավիճակը: Այսինքն, հերթական չեզոք հայտարարությամբ են հանդես գալիս` իրավիճակը չլարելու համար: Բայց մի՞թե դա հետագա լարումները կանխում է: Հերթական անգամ հասցեականությունից խուսափելը` Ալիևին հերթական անգամ «երես տալու» OK է: Այս անգամ, փաստորեն, միջնորդները «չեն նկատել» դիվերսիոն գործողության փորձ կատարած կողմին, բայց նկատել են, որ ՀՀ զինված ուժերը դեռ պահում են մարտում սպանված ադրբեջանցի զինծառայողի դիակը: Ինչո՞ւ ենք այս իրավիճակում հայտնվել.... Որովհետև չեն ուժեղացվում զինադադարի ռեժիմի պահպանման և այդ խախտումները նվազեցնելու մեխանիզմները` Ալիևի «ձեռամբ»: Թվում է, ամեն ինչ շատ պարզ է, բայց իրավիճակը համառորեն տեղից չի շարժվում արդեն 8-9 ամիս... Մետաքսյա Շալունց