Սուրիկ Խաչատրյանին պատժո՞ւմ են, թե ինքն է պատժում
Նոր տարին ազդարարվեց անհավանական լուրով՝ Սյունիքի նախկին մարզպետ Սուրիկ Խաչատրյանը՝ հռչակավոր Լիսկան հրաժարականի դիմում ներկայացրեց Սյունիքի ՀՀԿ կառույցի ղեկավարի պաշտոնից։ Խաչատրյանը հրաժարականը հիմնավորեց առողջական խնդիրներով․«Պատճառը իմ առողջական վիճակն է, որ ես չեմ կարող հասցնել: Ես 6 ամիս առաջ սրտի բավականին լուրջ վիրահատություն եմ տարել: Իսկ եթե ես չեմ կարող գոնե ամիսը մի անգամ գնալ էդ կառույցի ղեկարներին հավաքեմ, քննարկենք, խոսենք, անիմաստ չի՞»,- tert.am-ի հետ զրույցում ասել է ՀՀԿ-ի երբեմնի կարկառուն դեմքերից մեկը։ Ընդամենը շաբաթներ առաջ նա չէր թաքցնում, որ նախապատրաստվում է ընտրական պայքարին, իսկ այսօր արդեն բոլորովին այլ բան է ասում: «Ես չեմ առաջադրվելու առաջիկա ընտրություններում: Չեմ ուզում պատգամավոր դառնամ: Շաբաթվա մեջ 5 օր գամ, ԱԺ-ում նստեմ, որ ի՞նչ: Ես խորհրդարանից եմ գնացել մարզպետի պաշտոնի: Եթե էն ժամանակ ես ինձ խորհրդարանում տեսնեի, խորհրդարանից չէի գնա»,-ասում է Խաչատրյանը՝ փորձելով ընդգծել, որ ինքն է հրաժարականի դիմում ներկայացրել։ Սուրիկ Խաչատրյանի պաշտոնանկության վերաբերյալ բազում վարկածներ են շրջանառնում։ Առաջինի համաձայն՝ իշխանությունները որոշել են սրբագրումներ կատարել և չեն շրջանցել նաև Սուրիկ Խաչատրյանին։ Բանն այն է, որ մարզպետի պաշտոնից ազատելուց հետո Սուրիկ Խաչատրյանը հօդս էր ցնդեցրել իշխանությունների՝ բարեփոխումների մասին թմբկահարությունները։ Այդ պաշտոնանկությունից հետո Սուրիկ Խաչատրյանն անձամբ հայտարարեց, որ դեռ վերադառնալու է ու ակտիվ մասնակցություն է ունենալու ընտրական գործընթացներին, իսկ վերջերս էլ մամուլում տեղեկություններ հայտնվեցին, որ Խաչատրյանը թեկնածություն է առաջադրլեու ՀՀԿ ռեյտինգային ցուցակով։ Ուշագրավ է, որ վերադարձի մասին հայտարարությունը Սուրիկ Խաչատրյանն արել է ոչ վաղ անցյալում՝ հոկտեմբերի 27-ին, երբ քաղաքական էլիտան, այդ թվում նախկին մարզպետն այցելել էին Եռաբլուր։ Այսինքն, այդ ժամանակ Լիսկան արդեն վիրահատության էր ենթարկվել ու առողջական խնդիրներ ուներ։ Թե ինչու է որոշել հիմա հրաժարական ներկայացնել,ինչպես ինքն է հայտարարում, դժվար է ասել։ Թեպետ կան նաեւ լուրեր, համաձայն որոնց՝ Սուրիկ Խաչատրյանն իսկապես ինքնակամ է հրաժարականի դիմում ներկայացրել։ Նա նեղ միջավայրում սրտնեղել է իշխանության՝ իր նկատմամբ «անարդարացի» որոշումից՝ ասելով, թե ինչի՞ մենակ ինքն էր կրիմինալ մարզպետը, որից ազատվեցին։ Նա որոշել է «կոնտր» քայլ անել հարազատ կուսակցության հանդեպ ու հրաժարականի դիմում է գրել։ Ինչպես բոլոր ընտրություններն են ցույց տվել, ՀՀԿ-ն Սյունիքում ամենաբարձր թվով ձայներն է հավաքել, իսկ այդ արդյունքները վերագրվել են Սուրիկ Խաչատրյանին, որը ավանդական մեթոդներով, ահաբեկելով տիրացել է սյունեցիների մեծամասնության քվեներին։ Ըստ երեւույթին նա որոշել է իր կշիռը բարձրացնել, այսկերպ հասկացնել, թե ընտրություններին «ձեռքերը լվանալու է»՝ փաստի առաջ կանգնացնելով ՀՀԿ-ին։ Սակայն հարցազրույցում վստահեցրել է, որ աշխատելու է հարազատ կուսակցության համար, որքան առողջականը թույլ տա։ Հիշեցնենք, որ երբ Կարեն Կարապետյանը նշանակվեց ՀՀ վարչապետ իր բարձրացրած կադրային փոփոխությունների ալիքը չշրջանցեց նաեւ Սուրիկ Խաչատրյանին։ Տեղեկություններ տարածվեցին, թե Կարեն Կարապետյանը նպատակադրվել է ձերբազատվել բոլոր տխրահռչակ պաշտոնյաներից։ Սակայն, մինչ պաշտոնանկությունը Սուրիկ Խաչատրյանը գրեթե կասկած չուներ, որ ինքը մնալու է իր պաշտոնում, նա այդ մասին հայտարարեց անգամ ՀՀԿ խորհրդի նիստերից մեկի ժամանակ, սակայն կյանքը ցույց տվեց, որ իշխանության շահը մեծ «զոհեր» է պահանջում։ Հավանաբար Խաչատրյանն էլ իր հերթին փորձում է վերագտնել դիրքերը ու իշխանություններին մղել իրեն խնդրագիր ներկայացնելու գործին։ Խնդիրն այն է, որ գործող մարզպետ Վահե Հակոբյանը, որը Սյունիքի ՀՀԿ կառույցի ղեկավարի պաշտոնն է այժմ զբաղեցնում, վստահեցրել է,որ կկարողանա մարզում հավաքել ՀՀԿ-ի համար անհրաժեշտ ձայները: Սակայն քաղաքական որոշ չրջանականեր,հատկապես Սուրիկ Խաչատրյանը և իր մտերիմները որոշ շրջանակներում վստահեցնում են,որ Վահե Հակոբյանը ձախողելու է խորհրդարանական ընտրությունները։ Ի դեպ,լուրեր են պտտվում այն մասին,որ Սուրիկ Խաչատրյանին ոչ միայն մազպետի ,այլև ՀՀԿ տարածքային ղեկավարի պաշտոնից ղեկավարի պաշտոնից ազատելու հարցը բազմիցս պնդել է վարչապետ Կարեն Կարապետյանը ,հիմնավորելով որ տպավորություն չստեղծվի որ իր գործողությունները իմիտացիա են և ժամանակավոր: Անի Սահակյան