«Ինջիրլիք»-ը ՆԱՏՕ-ինը չէ. Թուրքիա

« «Ինջիրլիք»-ը ՆԱՏՕ-ի բազան չէ, և բոլորը պետք է իրենց համար հստակ գիտակցեն դա։ ՆԱՏՕ-ի երկրների զինծառայողները «Ինջիրլիք»-ի ավիաբազայում գտնվում են Թուրքիայի թույլտվությամբ: Թուրքիան այդ հարցի շուրջ բանակցություններ է վարում ԱՄՆ-ի ու միջազգային դաշինքի մյուս երկրների հետ։ Եթե այդ երկխոսությունը սպառնա Թուրքիայի շահերին և բանակցություններն ավարտվեն անարդյունք, ապա Անկարան կդիտարկի հնարավոր բոլոր տարբերակները»,- Haber Türk հեռուստաալիքին տված հարցազրույցի ժամանակ հայտարարել է   Թուրքիայի պաշտպանության նախարար Ֆիքրի Ըշըքը : Նախարարն ընդգծել  է, որ առաջին ահաբեկչությունները Թուրքիայում կատարվել են 1980-ական թվականներին, և դրանք հաճախակիացել են Պարսից ծոցի պատերազմից հետո. «Ահաբեկչության երկրորդ ալիքը բաժին է ընկել Իրաքի օկուպացմանը հաջորդած ժամանակաշրջանին։ Ձախ հոսանքի ահաբեկիչներին միացել են ԴԱԻՇ-ի ահաբեկիչները։ Եվս մեկ գլխացավանք են դարձել Ֆեթհուլլահ Գյուլենի ահաբեկչական հոսանքի կողմնակիցները։ Թուրքիան 100 տարի անց վերստին հայտնվել է պատմական տուրբուլենտության գոտում։ Հստակ առաջադրանք է դրվել՝ նվազագույնի հասցնել Անկարայի մասնակցությունը տարածաշրջանային գործընթացներին»։