Տարվա լեզվակռիվների պերճանքն ու թշվառությունը. տեսանյութ

2016-ին քաղաքական կյանքն էլ բացառություն չդարձավ, պաշտոնյաները, պատգամավորները հաճախակի բարձր լարում ապահովեցին հրապարակային ռազբորկաներով, լեզվակռիվներով: Ռեկորդակիրն, անշուշտ, հայրենի խորհրդարանն է: Այստեղ են տեղի ունենում ամենահիշարժան, ամենատեսարժան , ամենաանհավանական լեզվակռիվները: Նիկոլ Փաշինյանի եւ Զարուհի Փոստանջյանի միջեւ տեղի ունեցածն, իրոք, անսպասելի էր, որպես կանոն Նիկոլի ու Զարուհու կռիվն իշխանության դեմ է, նրանք են իշխանության նախագծերի անողոք քննատադները , բայց Նիկոլ Փաշինյանի տարօրինակ դիրքորոշումը հունից հանեց Զարուհի Փոստանջյանին: Քննարկվում էր Պաշտպանության նախարարի հեղինակած 1000-դրամների անվանումը ստացած զոհված եւ վիրավոր զինծառայողների ընտանիքներին տրվող աջակցության մասին աղմկահարույց նախագիծը ու թեպետ շաբաթներ շարունակ ընդդիմադիր բազմաթիվ գործիչներ, ակտիվ հանրությունը բողոքի ալիք էր բարձրացրել, քանզի որքան էլ ողջունելի էր գաղափարը, այդուհանդերձ կշեռքի մյուս նժարին կոռումպացված ու միլիոնատեր գեներալիտետն էր, ուստի ընդվզում կար ու պահանջ՝ բանակից խլածը վերադարձնելու: Փաշինյանն ահա, այս իրավիճակում ելույթ ունեցավ՝ հայտնելով իր աջակցությունը նախագծին, քանզի այդ գումարները, ասաց, տրվելու են զոհված ու վիրավոր զինծառայողների ընտանիքներին. «Սուտ ես ասում, ո՛չ, էդպես չի, չի կարելի այդպես ասել… դու շատ լավ գիտես՝ ուր են գնալու այդ գումարները, Սերժի գրպանն է գնալու այդ գումարները… », հանկարծ տեղից ցատկելով գոռգոռաց Զարուհին.«Թույլ տուր՝ բացատրեմ…»,- անակնկալի եկավ Նիկոլ Փաշինյանը, բայց այդպես էլ Զարուհու համար ընկալելի բացատրություն չներկայացրեց: Նիկոլ Փաշինյանի 2016-ի ռեկորդակիր կարելի է համարել, նա աջուձախ քլնգում էր բոլորին ու վեճի բռնվում ընդդիմադիր գործընկերների հետ, ըստ էության կայանալու եւ իր հռչական մեկ ընդդիմության գաղափարը կյանքի կոչելու խնդիրն էր ի կատար ածում: ՏԻՄ ընտրությունների նախաշեմին նրա եւ Լուսավոր Հայաստան կուսակցության ղեկավար Էդմոն Մարուքյանի հեռահար կռիվն այնքան թեժացավ, որ դրսից մարդիկ խառնվեցին, Թեւան Պողոսյանը հրավիրեց հաշտության՝ գինեխմության ներքո: Փաշինյանը Մարուքյանին ոչ միայն ընդդիմադիր թեստեր առաջադրեց՝ կասկածի տակ դնելով իր այժմյան դաշնակցի իսկական ընդդիմություն լինելու հանգամանքը, այլեւ անցավ տղայական ռազբորկայի. «Ուրեմն, ի նկատի ունենալով նաեւ ինձ ասում է, Էրեւանից մարդիկ են եկել, Վանաձորում քաղաքական քարոզարշավ են տանում, իբր էրեւանից եկածներն ի՞նչ գործ ունեն Վանաձորում, սենց բան մեկ էլ Մալաթիա Սեբաստիայում էի լսել, երբ Ալեքսանյանի կողմնակիցներն ասում էին՝ էս մեր թաղն ա, կենտրոնից կամ Լենինգրադյանից եկել եք մեր թաղում քարոզարշա՞վ եք անում: Այս թեմային չէի անդրադառնա, բայց չեմ հասկանում հիմա էլ Վանաձորում ուզում են Մարուքյանների կլա՞ն ստեղծել: Ասենք, նոր Սուրիկ Խաչատրյան է ուզում ՀՀ-ում ձեւավորվի, որ էս մեր Վանաձորն է, երեւանցիները չկան: Էդմոն Մարուքյան, եթե երեւանցի ենք, չպիտի՞ գանք ստեղ, ուրեմն սրանից հետո Էրեւան չմտնես, ձեր քուչից, ընդհանրապես դուրս չգաս, ամոթ էլ ա, այ քեզ բան>> ի պատասխան Մարուքյանի հարցազրույցի հայտարարեց Փաշինյանը: Այս տարվա ընթացքում նրա դռբի տակ ընկավ նաեւ Նաիրա Զոհրաբյանը: Կռվախնձորը չարաբաստիկ Ընտրական օրենսգիրքն էր, որի ընդունման համար իշխանություն-ընդդիմություն համաձայնություն կայացվեց, իսկ Փաշինյանը այս գծի մեջ չէր ու իրեն կարող էր թույլ տալ քննադատություն եւ իշխանության, եւ ընդդիմության հասցեին: Եթե ՕԵԿ-ին ու ՀԱԿ-ին Փաշինյանն անդրադարձավ ոչ անվանական, ակնարկներով, որոնցից պարզ էր, թե ում մասին է խոսքը, ապա ԲՀԿ-ին ու նրա ղեկավարին հիշեց անվանական։ «Մի կուսակցություն էլ կա, վեր ա կենում ստեղից ասում ա՝ աղանդավորական խմբակները, աղանդավորական խմբակները․․․ Ու սա ասում ա մի կուսակցություն, որի ամբողջ կենսագրությունը, մինչև բոլորովին վերջերս կամ գուցե նաև մոտ ապագայում, կառուցված է մեկ անձի՝ առավոտյան, միջօրեի և երեկոյան պաշտամունքի վրա։ Ախր չի կարելի, էլի։ Էն առաջին ընթերցման ժամանակ տիկին Զոհրաբյանը էս ամբինից ասում էր՝ մենք գիտենք ձեր չափը, ձեր պայմանավորվածությունները, թե դուք մինչև ուր կարաք խոսաք․․ ախր լավ էլ չի ասել՝ իրիկունը ինքն իրա ձեռքով զանգում, ասում ա՝ Հովիկ Արգամիչը ջղայնացել ա, որ ես «բամփել» բառն եմ օգտագործել, խնդրում եմ՝ հանկարծ չհրապարակեք էդ բառերը, խնդրում եմ, Հովիկ Արգամիչը ջղայնացել ա»,-հայտարարեց Փաշինյանը։ Զոհրաբյանն էլ ելույթ խնդրեց ու ասաց, որ Փաշինյանը ստում է, բայց և խոստովանեց, որ նման բան եղել է։ « Այո, ես խնդրել եմ իմ լրագրող գործընկերներին իմ նշյալ ելույթի հետ կապված որոշ պարբերություն չտեղադրել, իմ գործընկերները ընդառաջել են ինձ, բայց ինչ որ հնչեց էստեղ, բացարձակ սուտ և ապատեղեկատվություն է՝ նշելով նշյալ մարդկանց անունները»,-ասաց Զոհրաբյանը։ Խորհրդարանից դուրս ոչ պակաս ռազբորկա ծավալվեց ֆեյսբուքյան գրառման պատճառով, քաղաքագետ Ստյոպա Սաֆարյանն էր պատգամավոր Ուրիխանյանի մասին գրառել: Հակամարտությունը սկսվեց գարնանից,Սաֆարյանը վստահ է, որ էլեկտրոնային լրատվամիջոցներում նյութեր են հրապարակվել, որոնք կրել են զրպարտչական բնույթ, քաղաքագետը համոզված է, որ պատվիրատուն այն ժամանակ դեռ ԲՀԿ անդամ Տիգրան Ուրիխանյանն է: Բանը հասավ նրան, որ Ուրիխանյանը հրապարակայնորեն չ…խ անվանեց Սաֆարյանին, վերջինն էլ Ուրիխանյանի խոսքը բնորոշել <<շմայսերեն արտաթորանք>>:Վեճը հասավ դատարան ու դեռ ընթացքի մեջ է, պատգամավորը պահանջում է ներողություն խնդրել: Երեւանի ավագանու նիստի ժամանակ Անահիտ Բախշյանի ներկայացրած շինթույլտվության փաստաթղթի վերաբերյալ հարցն էլ այնքան բարկացրեց Տարոն Մարգարյանին, որ քաղաքապետը Բախշյանին մեղադրեց զոհվածների ընտանիքների վրա իր PR-ն անելու մեջ«Ձեր ձենին կարոտ չենք», նետեց Մարգարյանը նաև «անբարոյական» անվանեց այն քաղաքացիներին, որոնց շենքի հետ կապված խնդիրն էր փորձում բարձրաձայնել ավագանու անդամը: ՀՀԿ խմբակցության ղեկավարի ու Զարուհի Փոստանջյանի միջեւ տեղի ունեցածը թերեւս ամենատհաճն էր, Գլխավոր դատախազ Արթուր Դավթյանի ծրագրի քննարկման ընթացքում ելույթ ունենալով Բաղդասարյանը շատ տգեղ արձագանքեց Փոստանջյանի կոչին.<< Մեկ ուրիշը չգիտես ում է ուզում տրվել եւ կոչ է անում, որ գան Ազգային ժողովը գրավեն, որ իրենք տրվեն: Մենք ցանկություն չունենք գերի ընկնելու, ոչ էլ տրվելու, ով ցանկանում է, կարող է ինքնակամ տրվել, բայց ոչ ԱԺ-ն գրավելու արդյունքում »: Հրանտ Բագրատյան-Վարդան Այվազյան մշտնջենական բանավեջի հերթական արարն էլ այս տարում եղավ: Այվազյանն այնքան բորբոքվեց, որ լքեց նիստերի դահլիճը, կրքերը փորձեց հանդարտեցնել Խաչատուր Քոքոբելյանը՝ Բագրատյանին հետ պահելով:  Հույս ունենանք, որ հաջորդ տարում բանավեճերը կլինեն միայն գաղափարական: Անի Սահակյան