2016-ի ամոթալի իրադարձությունները
Չնայած մեր իշխանությունը վերից վար ազգային ամոթ է, բայց տարվա ընթացքում տեղի ունեցան որոշ ամոթալի իրադարձություններ, որոնք մերկացրեցին այս կամ այն պաշտոնյայի, գեներալի, իշխանությանն առհասարակ: Ոստիկանության ՊՊԾ գնդի գրավման փաստը աշխարհի ուշադրությունը կենտրոնացրեց փոքրիկ Հայաստանի վրա ու աշխարհը մեզ ընկալեց որպես տեռորիստների երկիր, որտեղ իշխանությունը բռնապետական մեթոդներով է կառավարում երկիրը, ուստիեւ մարդկանց այլ բան չի մնում, քան ահաբեկչությունը: Սա անասելի ծանր հարված էր նաեւ Ոստիկանապետ Վովա Գասպարյանին ուղղված: Տարածաշրջանի ամենամեծաթիվ ոստիկանական համակարգն ունեցող մեր երկրում ի զորու չեղան մի գունդ անգամ պահել-պաշտպանել, որը սովորական տարածք չէր, այնտեղ պահվում է հսկայական քանակության զենք-զինամթերք,բոլորն ապշած էին՝ մեկ հարց էր ամենքին հուզում՝ իսկ եթե ոչ թե հայերից , այլ հակառակորդ ազգերից ձեւավորված խումբ մտներ գնդի տարածք… Ապրիլյան պատերազմը լակմուսի թուղթ դարձավ իշխանության ու հասրակության համար, պատերազմին անպատրաստ իշխանությունների փրկօղակը հասարակության միասնականությունն ու սահմանը պահող հայ զինվորի տոկունթյունն էր, բայց արի ու տես քառօրյայի ընթացքում էլ երկիրն իշխողներն անդավաճան մնացին իրենց ձեռագրին: Իսկ պայթյունն անխուսափելի էր: Արցախի հերոս հրամանատար Վահան Բադասյանը պատերազմի թեժ մարտերից օրեր անց հայտարարությամբ հանդես եկավ, թե գեներալ Մանվել Գրիգորյանը թալանով է զբաղված եղել, հերոս չէ, զենքը ձեռքին չի կռվել եւ այլն: Ասաց նաեւ, որ Մանվելը, Լիսկաները չեն կռվում, գալիս նկարվում-գնում են: Բադասյանը պատմեց, թե ինչպես է գեներալ Մանվելը հայհոյել զինվորներին Հադրութում, երբ ճանապարհը նեղ է եղել ու չի կարողացել իր ողջ շքախմբով լայն ճանապարհով անցնել: Ավելի ուշ Բադասյանը դիմակազերծեց նաեւ ՀՀ զինված ուժերի Գլխավոր շտաբի պետ, Արցախի բանակի նախկին նախարար Մովսես Հակոբյանին: Վահան Բադասյանը Facebook-ի իր էջում` դիմելով նորանշանակ վարչապետ Կարեն Կարապետյանին, գրել էր. «Հարգարժան պարոն վարչապետ, ՀՀ զինված ուժերի Գլխավոր շտաբի պետը, լինելով նախկինում ՀՀ ՊՆ ՆՏԱԴ-ի պետ-փոխնախարար, չարաշահելով իր պաշտոնական դիրքը, խախտելով գնումների մասին օրենքը, շուկայականից զգալի բարձր գներով իր ձեռնարկության եւ ՊՆ-ի միջեւ կնքել է ցորենի գնման պայմանագիր, ինչի արդյունքում՝ բանակից յուրացվել է մի քանի տասնյակ միլիոն դրամ»: Բադասյանը հայտարարեց նաեւ, որ Մոսիի հացի գործարաններն են Արցախի որոշ զորամասերի հաց մատակարարում: Մանվել Գրիգորյանի հրոսակախումբը այդ բացահայտումից ամիսներ անց նոր ահաբեկչություն ձեռնարկեց գեներալի որդու՝ քաղաքապետ Կարեն Գրիգորյանի մրցակցի դեմ: ՏԻՄ ընտրություններ էին, բայց մինչ ընտրությունները կրտսեր Գրիգորյանն ու իր բանդան առեւանգեցին, դաժան ծեծի ենթարկեցին Արթուր Թումանյանին, բնականաբար, մնացին անպատիժ: Բայց ամենախայտառակը, անշուշտ, Ազգային ժողովում դեկտեմբերին տեղի ունեցած միջադեպն էր, Հայաստանի օրանսդիր մարմնում առաջին անգամ պատգամավորը ծեծեց լրագրողի, Հրապարակ օրաթերթի լրագրող Վահե Մակարյանի հարցերը դուր չէին եկել պատգամավոր Ռուբիկ Հակոբյանին, կանչել էր անշառ մի տեղ ու հարվածել աչքին, գլխին: Առողջապահության նախարար Լեւոն Ալթունյանին ուղղված ամոթանքները որեւէ մեկին ծեծելու համար չէին, նա անհարգալից էր խոսել մահացած հղիների մասին՝ ասելով, որ մեկ-երկու հղիների դեպքերով չի զբաղվում, թող <<մորգը>> զբաղվի: Բնականաբար ինչպես նախորդ, այնպես էլ անցնող տարում իշխանությունն անամոթաբար անազատության մեջ պահեց դերասան Վարդան Պողոսյանին, Շանթ Հարությունյանին, Վոլոդյա Ավետիսյանին: Անի Սահակյան