Կարեն Կարապետյանի ընկերը խրախուսում է կոռուպցիան

Կառավարության ծրագիրը քննարկելիս, երբ պատգամավորները դժգոհություններ էին հայտնում, որ Կարեն Կարապետյանի ներկայացրած ծրագրում կոռուպցիայի դեմ պայքարը դետալային արձանագրում չի ստացել, վարչապետը նեղսրտած հակադարձում էր, թե կոռուպցիայի դեմ պայքարը շատ ստանդարտ է լինելու: <<Մենք ֆիքսել ենք ոնց ենք պայքարելու: Կանենք, թե չենք անի՝ դուք կտեսնեք >>,- ինքնավստահ հայտարարեց նորանշանակ վարչապետը: Մոտ երկու ամիս է անցել այդ ներկայացումից եւ, ահա, պարզ է դառնում, թե Կարապետյանի կաբինետը ինչպես է պայքարելու կոռուպցիայի ստվերի դեմ: Կարելի է միանշանակ պնդել, որ առողջապահության ոլորտում պայքար չի լինելու: Այդ մասին գրեթե բաց տեքստով հայտարարել է առողջապահության նախարար Լեւոն Ալթունյանը,որը վարչապետի մանկության ընկերն է ու ինչպես իր նշանակման առաջին օրերին խոստովանեց անձամբ, նոր կառավարության միլիոնատերերից մեկը: Տարեվերջյան ասուլիսի ժամանակ լրագրողներից մեկը նախարարին հիշեցրեց վերջերս իր իսկ կողմից հնչեցրած ստվերային շրջանառության մասին: Մասնավորապես՝ 120 միլիարդ դրամի ստվերային շրջանառություն կա առողջապահության ոլորտում՝ հետաքրքրվելով՝ նախարարությունն ի՞նչ քայլեր է նախատեսում այդ գումարները ստվերից հանելու, եւ եթե դա կոռուպցիայի դրսեւորում է, գուցե համապատասխան մարմիններին դիմեն: Նախարար Ալթունյանը ցնցող բացատրություն է գտել կոռուպցիան գեղեցիկ փաթեթավորելու կամ այն օրինականացնելու համար.«Նախ դա ես չեմ ասել, Համաշխարհային բանկի վերլուծական թվերն են, ես կրկնել եմ», իր խոսքերից հետ է կանգնել Ալթունյանը, ապա զավեշտալի պատասխան տվել.<< Իհարկե, այդ շրջանառության մեջ կոռուպցիոն ռիսկեր կան, բայց ոչ ամբողջ շրջանառությունն է կոռուպցիա: Զգալի մասը քաղաքացիների ցանկությունն է, դրանք վճարումներ են, որոնք քաղաքացիներն անում են իրենց բարի կամքով»,- ասել է Ալթունյանը: Դժվար թե նախարարը չգիտի, թե քաղաքացիները երբ ու ինչ իրավիճակներում են հարկադրված լինում <<բարի կամք դրսեւորել>>: Ասենք, ինչպես կարող են այդ կամքը չդրսեւորել, երբ հիվանդը ծայրահեղ ծանր վիճակում վիրահատական սեղանին պարտավոր է այնքան սպասել, քանի դեռ հիվանդատերերը չեն հասցրել բժիշկների կողմից պահանջվող գումարը, կամ ինչպես կարելի է <<բարի կամք>> չդրսեւորել, երբ բժիշկը պնդում է, թե հիվանդի կյանքը կախված է իրենից ու պահանջների սարսափելի ցանկ ներկայացնում: Ալթունյանն ինքն էլ պատրաստ էր ամբողջովին թաթախվել կոռուպցիայի մեջ, եթե չլիներ չար մամուլը ու աղմուկ չբարձրացներ նրա մտադրությունների մասին: Անցած ամիս հայտնի դարձավ, որ պետության կողմից երաշխավորված անվճար բժշկական օգնության և սպասարկման շրջանակներում բնակչության սոցիալապես անապահով և հատուկ խմբերում ընդգրկված քաղաքացիների դժվարամատչելի ախտորոշիչ հետազոտությունների իրականացման համար ՀՀ առողջապահության նախարարությունը 25 բժշկական կազմակերպության հետ լրացուցիչ համաձայնագրեր է կնքել, ընդհանուր՝ 134,0 մլն դրամի չափով։ Ըստ մամուլի հրապարակումների՝ ամենամեծ հատկացումը՝ 24 միլիոնը, բաժին էր հասնելու «Վարդանանց» բժշկական կենտրոնին, որը պատկանում է «ԱՐԻՆՏԵՐԼԵՎ» ՍՊԸ-ին, իսկ այս ընկերությունը հիմնադրել է ՀՀ առողջապահության նախարար Լևոն Ալթունյանը։ Լևոն Ալթունյանը պետական պաշտոնը կօգտագործեր սեփական բիզնեսն ամրապնդելու համար, ինչը կոռուպցիայի դասական դրսևորում է, եթե չլիներ մամուլի բարձրացրած աղմուկը ու թվերը փոփոխության չենթարկվեին: Նման դեպքերում՝ քաղաքակիրթ երկրներում նախարարն առնվազն պաշտոնանկ կարվեր՝ դրանից բխող բոլոր հետանքներով, քրեական պատասխանատվություն եւ այլն։ Առհասարակ Կարեն Կարապետյանի համար իր ընկերը գլխացավանք է դարձել, Ալթունյանն իր տեղում չպետք է լիներ գոնե հղի կանանց մահվան առիթով հնչեցրած ցինիկ արտահայտության համար։ Սակայն եթե այդ պարագայում խնդիրը բարոյական հարթության մեջ էր, որ Ալթունյանը ավելի կարեւոր խնդիրներ էր տեսնում ու մեկ-երկու մահացած հղիների դեպքերը չէին հուզում,ապա կոռուպցիայի ու դրա դեմ պայքարի մասին ալթունյանական պատկերացումները բավարար են նրան դուրս մղելու կառավարության կազմից: Ուշագրավ է,երբ ամփոփիչ ասուլիսում նրանից հետաքրքրվում են, թե ինչու, ի վերջո, ինքն արժանացավ Կարեն Կարապետյանի ամենաանհաջող կադր պիտակավորմանը, գուցե իր մոտեցումնե՞րն են խորթ հասարակության համար, թե՞ այլ պատճառներ կան, նախարարն արձագանքում է, որ իբր նման պիտակների մասին չի լսել, քանի որ քիչ է հետաքրքրվում իր մասին խոսակցություններով: Անի Սահակյան