Դաշնակցությունում դեպրեսիան խորանում է
Մաս կազմելով իշխանությանը, ձայն տալով Սահմանադրությանը, նոր «Ընտրական օրենսգրքին» հին ընկերներ դաշնակցականները հազիվ թե գուշակեին, որ արդյունքում իրենք կմնան փլատակների տակ: Այնինչ դաշնակցականների վերջին ամիսների պահվածքից արդեն տեսանելի է, որ ՀՅԴ-ն մնացել է իշխանության կոկորդում ու հին ընկերներին այլ բան չի մնում քան իրենց ավանդական կուսակցությունը թողած գովերգել Սերժ Սարգսյանին ու նրա իշխանությանը ապագա խորհրդարանում մի քանի տեղ մուրալու հեռահար նպատակով ։ Մի քանի օր առաջ Աղվան Վարդանյանը տարեվերջյան ամփոփիչ ասուլիսում համոզում էր, թե որքան կարեւոր է նոր համակարգում ՀՅԴ-ի ներկայացվածությունը՝ երկրում ներքին կայունություն կապահովվի, զարգացման նախադրյալներ կստեղծվեն եւ այլն, եւ այլն․․․Որքան գնում է, Դաշնակցության դեպրեսիան ավելի խորանում է։ Այս Բնապահպանության ՀՅԴ-ական նախարար Արծվիկ Մինասյանն է գովաբանել Սերժ Սարգսյանին ու կուսակցակցության ուղենշային փաստաղթերի շարքում հիշատակել Սերժ Սարգսյանի փետրվարյան հայտնի ելույթը։ Մինասյանն անդրադարձել է նաեւ ներքաղաքական թեմաների՝ ասելով, որ ինքը ոչ միայն ակտիվորեն մասնակցելու է առաջիկա խորհրդարանական ընտրություններին, այլեւ առաջ է տանելու ՀՅԴ գաղափարները ու ոչ միայն․«Ես՝ որպես Սահմանադրությունն ընդունող և օրենք հարգող մարդ, շարժվելու եմ օրենքով: Չի կարելի անընդհատ խոսել մի թեմայի մասին առանց իրավական հիմքերի վերանայված փաթեթին ուշադրություն դարձնելու: Հետևաբար իմ առաջարկը, հորդորը խնդրանքն, ամեն ինչ տեղափոխենք իրավական հարթություն և միայն այդ ժամանակ կունենանք իրավական պետություն»։ Թե ինչ օգուտներ է քաղում Դաշնակցությունն իր գործունեությունից և արդյո՞ք իր գործունեությունից ՀՅԴ-ն առաջիկա խորհրդարանական ընտրություններին կարող է ավելի շատ քվե ակնկալել, Արծվիկ Մինասյանը չի ցանկացել էլ ավելի բարդացնել ՀՅԴ-ի վիճակը ու շրջանցել է բուն հարցը․ «Բնականաբար, լինելով քաղաքական պաշտոնում նշանակված անձ և լինելով ՀՅԴ անդամ՝ ես ակտիվորեն ոչ միայն պետք է մասնակցեմ առաջիկա ընտրություններին, այլև պետք է առաջ տանեմ իմ կուսակցության գաղափարները: Բնականաբար, մեր ընտրողների մի զգալի մասի ձայները պայմանավորված են այն կուսակցության պատասխանատուի աշխատանքով և այն անձով, որի վարքագիծը կապված է կուսակցության վարքագծի հետ: Ես ամեն ինչ անելու եմ, որ մեր ընտրողները տեսնեն, որ այն, ինչ հայտարարվում է, Դաշնակցության կողմից չի մնում թղթի վրա»,- ասել է Մինասյանը և հայտարարեց, որ իր համար գոյություն ունի երեք առաջնորդող փաստաթուղթ՝ առաջինը՝ Սահմանադրությունը, երկրորդը՝ Սերժ Սարգսյանի փետրվարի 12-ի ելույթը, և ՀՀԿ-ՀՅԴ համագործակցության հուշագիրը: Իսկ այդ հուշագիրը նախատեսում է զարգացում բոլոր ոլորտներում, և Մինասյանի հավաստմամբ՝ ինքը ջանք ու եռանդ չի խնայելու այդ զարգացումն ապահովելու համար: Նախարարը ըստ էության գուժել է Դաշնակցության՝ որպես կուսակցության լուծարումը, այլապես այդ փաստաղթերի շարքում կհիշատակեր կուսակցության ծրագրի մասին։ Հին ընկերները հասկանում են, որ ասպարեզ իջեցված նոր-նոփ ընդդիմադիրների կողքին այլեւ ավելորդ են ու իշխանությունը չի պատրաստվում ուսերին բեռ անել 2017-ի ընտրություններ գնալիս։ Առաջիկայում ՀՅԴ-ականները կարող է Սերժ Սարգսյանի պաշտամունքի օրեր հայտարարել ու ներկուսակցական մրցույթ՝«Ով այնպիսի մի գովք անի․․․» վերտառությամբ։ Անի Սահակյան
Հետևեք մեզ Viber-ում
