Նվաստացման վերջին «խազը»
Երեկ, Սանկտ-Պետերբուրգում ևս Հայաստանի ներկայացուցիչը ՀԱՊԿ գլխավոր քարտուղարի պաշտոնում չհաստատվեց: Ռազմաքաղաքական դաշինքի գլխավոր քարտուղարի փոփոխության հարցը կդիտարկվի հաջորդ տարվա ապրիլին՝ կազմակերպության հաջորդ գագաթնաժողովին, լրագրողների հետ զրույցում տեղեկացրել է ՀԱՊԿ գործող գլխավոր քարտուղար Նիկոլայ Բորդյուժան: «Պայմանավորվել ենք, որ ապրիլին տեղի կունենա հավաքական անվտանգության հերթական նիստը, որտեղ ամբողջապես կդիտարկվի գլխավոր քարտուղարի հարցը: Այսօր հարցը չի դիտարկվել, քանի որ քվորում չկար: Դուք գիտեք, որ կազմակերպության անդամ երկրներից մեկի պատվիրակությունն այս աշխատանքային հանդիպումներին չէր մասնակցում», հավելել է Բորդյուժան: Իսկ ՀԱՊԿ-ի պետերբուրգյան գագաթնաժողովին չէր մասնակցում Բելառուսը: Ամենաուշագրավն այն էր, սակայն, որ Ռուսաստանի նախագահի խոսնակ Դմիտրի Պեսկովը հայտարարել էր, թե Բելառուսի ղեկավարի բացակայությունը չի խոչընդոտի նախատեսված փաստաթղթերի ստորագրմանը, քանի որ դրանք նախապես համաձայնեցված էին և կուղարկվեն Բելառուս՝ ստորագրման համար: Հիմա էլ, փաստորեն, Լուկաշենկոյի բացակայությունն է հերթական պատճառը դարձել, որ Հայաստանի ներկայացուցիչը ՀԱՊԿ գլխավոր քարտուղարի պաշտոնում չհաստատվի... Ոչ վաղ անցյալում Հայաստանը չստանձնեց ՀԱՊԿ քարտուղարությունը նաև երկու ամիս առաջ Երևանյան գագաթնաժողովի ժամանակ, երբ առողջական խնդիրներ ունենալու պատճառաբանությամբ չէր մասնակցում Ղազախստանի նախագահ Նուրսուլթան Նազարբաևը: Նիստի ավարտին հայտնի դարձավ, որ գլխավոր քարտուղարի նշանակման հարցն օրակարգից դուրս է եկել: Նախագահ Սարգսյանը հայտարարեց, որ գլխավոր քարտուղարի փոփոխության հարցը քննարկվելու է Սանկտ Պետերբուրգում կայանալիք գագաթնաժողովին: 2003 թվականից ՀԱՊԿ գլխավոր քարտուղարի պաշտոնը զբաղեցնում է Ռուսաստանի ներկայացուցիչ Նիկոլայ Բորդյուժան, դեռ մեկ տարի առաջ քարտուղարության ղեկավարումը ռոտացիոն կարգով պետք է փոխանցվեր Հայաստանի ներկայացուցչին, սակայն որոշում կայացվեց հարցը մեկ տարով հետաձգել: Եվ ամենակարևորը` թե ինչու պետերբուրգյան հավաքին ներկա չէր Բելառուսի նախագահը, հայտնի չէ: Դմիտրի Պեսկովը նշել էր, որ Լուկաշենկոյի բացակայության պատճառների մասին լավ կլինի խոսի բելառուսական կողմը: Ընդ որում, Բելառուսի ղեկավարի պաշտոնական կայքը տեղեկացնում է, որ Լուկաշենկոն երեկ Մինսկում ընդամենը ինչ-որ աշխատանքային քննարկման է մասնակցել, աշխարհացունց գրաֆիկ չի ունեցել: Հիշեցնենք ընդամենը, որ ՀԱՊԿ-ի շրջանակներում Հայաստանի ռազմաքաղաքական դաշնակիցը հանդիսացող Բելառուսի ղեկավարը մի քանի շաբաթ առաջ պաշտոնական այցով գտնվում էր Ադրբեջանում և հայտարարեց, որ ինքը վարձահատույց կլինի իրեն շնորհված «Հեյդար Ալիև» շքանշանի համար և ադրբեջանամետ հայտարարություն ընդունեց Լեռնային Ղարաբաղի հակամարտության վերաբերյալ: Ինչպես երևում է, նա վարձահատույց եղավ... Ամեն ինչ շատ պարզ է: Ադրբեջանը մտահոգություն է հայտնել Բելառուսին ու Ղազախստանին, ինչու չէ` նաև Ռուսաստանին, նրանք էլ ամեն անգամ Հայաստանի ներկայացուցչի հաստատման հարցը արգելափակում են: Ու այս ամենը` ՀԱՊԿ անդամ չհանդիսացող Ադրբեջանի քմահաճությամբ: Այսինքն, Ադրբեջանը, ՀԱՊԿ-ի անդամ չլինելով, ՀԱՊԿ-ում ունի ավելի մեծ ազդեցություն, քան Հայաստանը: Մնում է մեկ հարց` դեռ որքա՞ն ժամանակ պետի Հայաստանը նսեմացվի «դաշնակիցներ» կոչված այդ կառույցներում: Այդ կառույցներում առանձին «դաշնակիցների» պահվածքը արդեն իսկ բավարար է հասկանալու համար, թե ինչու Հայաստանը չպետք է լինի նման կառույցներում: Եթե դրանք ենք մեր «դաշնակիցները», մեզ այլևս թշնամիներ հարկավոր չեն... Թամար Բագրատունի
Հետևեք մեզ Viber-ում
