Արթուր Բաղդասարյանը կշահարկի՞ Գյումրու թիվ 38 դպրոցի տնօրենի պաշտոնանկությունը
Գյումրու թիվ 38 դպրոցի բորբոքված կրքերն առայժմ հանդարտվել են: Տնօրենի ժամանակավոր պաշտոնակատար Արփինե Նիկողոսյանին հաջողվել է աշխատանքային բնականոն գործընթաց ապահովել դպրոցում, իսկ նախկին տնօրեն Գոհար Շահբազյանը, ով պաշտոնավորման ժամկետի ավարտից հետո Շիրակի մարզպետ Հովսեփ Սիմոնյանի որոշմամբ աշխատանքաից ազատվել էր / նրա՝ տնօրենի պարտականությունները կատարելու վերաբերյալ ժամանակավոր պայմանագիր չէր կնքվել/ առայժմ հեռացել է դպրոցից՝ կրկին վերադառնելու խոստումով: Հիշեցնենք, որ հիշյալ դպրոցում տնօրենի ժ/պ էր նշանակվել Գյումրու թիվ 42-ի փոխտնօրեն Արփինե Նիկողոսյանը, որը սկզբում առաջացրել էր դպրոցի ուսուցիչների բողոքը: Նրա դեմ դպրոցի դռները փակել էին և թույլ չէին տվել ներս մտնել, իսկ նախկին տնօրենը անգամ հրաժարվել էր հանձնել դպրոցի կնիքն ու բանալիները: Այս հարցը լուծում ստացավ միայն իրավապահների միջամտությունից հետո: Մինչ այդ կոլեկտիվը բաց նամակով դիմել էր ՀՀ վարչապետին՝ պահանջելով բեկանել մարզպետի որոշումը: Թեպետ իրավական տեսանկյունից օրենքի խախտում չի կատարվել, օրենքը թույլ է տալիս պայմանագրի ժամկետի ավարտից հետո նշնակել պաշտոնակատար, որն ամենևին էլ պարտադիր չէ, որ լինի նախկին տնօրենը: Թիվ 38 դպրոցի ուսուցչական կոլեկտիվն իր նամակում նշել էր, որ իրենց նախկին տնօրենը ունի բոլոր արժանիքները շարունակելու պաշտոնավորումը, ուստի հենց ինքն էլ պետք է նշանակվեր ժամնակավոր պաշտոնակատար, մինչև տեղի կունենար տնօրենի ընտրություն: Դժգոհող մանկավարժներից որոշներն էլ նշել էին, թե պատճառը քաղաքական է՝ դաշնակցական մարզպետը տնօրեն է դարձնում յուրայիններին: Մարզպետն ու տնօրենի նոր ժամնակավոր պաշտոնակատարի կողմանակիցներն էլ հակադարձում են, թե Արփինե Նիկողոսյանը ՀՅԴ անդամ չէ: Մինչդեռ պաշտոնից ազատված նախկին տնօրեն Գոհար Շահբազյանն Արթուր Բաղդասարյանի «Հայկական վերածնունդ», կուսակցության անդամ է՝ նախկին ՕԵԿ-ական: Նա Գյումրու վերջին ՏԻՄ ընտրությունների ժամանակ «Հայկական վերածնունդ» կուսակցության ցուցակով ներկայացված է եղել, որպես ավագանու թեկնածու: Եվ հենց այս հանգամանքն էլ նախկին տնօրենն ու նրա մերձավորները դարձրել են քաղաքական շահարկումների թեմա: Նրանք շատ բաց տեքստով հայտարարում են, որ դաշնակցական մարզպետը Արթուր Բաղդասարյանի կուսակցից ազատվել է քաղաքական նկատառումներով: ՕԵԿ-ի և Արթուր Բաղդասարյանի հետ ունեցած կապերը ժամանակին լայնորեն օգնել են սույն տիկնոջը և նա կարողացել է, բոլոր տեսակի խնդիրները շրջանցելով մեկ տասնամյակից ավելի մնալ դպրոցի տնօրեն, ընհուպ մինչև «ջրելով» իր անվան հետ կապված մի սկանդալային դատական պատմություն: Նա այս ընթացքում հասցրել է դպրոցը լցնել իր ծանոթ- բարեկամներով. դպրոցում աշխատում են նրա դուստրը, դստեր տեգրը, այլ հարազատներ և բարեկամներ, ովքեր էլ նախաձեռնել են վարչապետին ուղղված դիմնում բողոքը և դռները նորեկի առջև փակելու ակցիան: Տեղեկություններ կան, որ Գոհար Շահաբազյանը մտադրություն է ունեցել իրենից հետո դպրոցում տնօրեն դարձնել իր աղջկան, որն այս դպրոցում պատմության ուսուցչուհի է աշխատում: Այս մտադրությունը սակայն դուր չի եկել դաշնակցական մարզպետին և նա այնտեղ ուղարկել է իր կադրին: Ի դեպ, տեղեկություններ կան, որ ընդունում հանձնումից հետո դպրոցում թերություններ են ի հայտ եկել, որոնք առայժմ չեն բարձրաձայնվում: Նախկին տնօրենը սակայն չի ընկրկում, նա հայտարարել է, որ պատրաստվում է մասնակցել հունվարի 27-ին կայանալիք տնօրենի թափուր տեղի համար հայտարարված մրցույթին: Ամենյան հավանակնությամբ Գյումրու թիվ 38 դպրոցի տնօրենի ընտրության հարցը դեռ կդառնա Արթուր Բաղդասարյանի համար ճարտասանության հատուկ թեմա: Գյումրիում խոսում են, որ նա խորհրդարնական ընտրությունների ժամանակ այս հարցը պատրաստվում է դարձնել հրապարակային պոպուլիզմի նյութ՝ հայտարարելով, որ ինքը մնացել է միակ և անկրկնելի ընդդիմադիրը և իշխանությունները աներևակայելի հալածանքներ են սկսել իր թիմակիցների դեմ: Դավիթ Մանուկյան