Տեր-Պետրոսյանը սիրաշահում է իշխանություններին, որ մի քանի հոգու մանդատի հարց լուծի

ՀԱԿ  համագումարում Լևոն Տեր-Պետրոսյանի հնչեցրած ելույթի մեխը, թե Հայոց պետականաշինության հիմքում ընկած է «Ղարաբաղյան ստատուս-քվոն պահպանելու և հարյուր տարի էլ շրջափակումների պայմաններում զարգանալու ռազմավարությունը» և «Ղարաբաղի հարցի լուծման այլ տարբերակ, քան փուլայինը, գոյություն չունի», արդեն օրեր շարունակ հանրության քննարկման առարկան են դարձել՝ հողեր հանձնելու ներկայացմամբ: Քաղաքագետ Լևոն Շիրինյանի կարծիքով մեկնարկել է հողերը հանձնելու ուղղությամբ հասարակության տրամադրությունները ստուգելու գործընթացի երրորդ փուլը:Քաղաքագետը հիշեցնում է ապրիլյան  քառօրյա պատերազմն ու դրան հաջորդած զարգացումները՝ ներկայացնելով առաջին ձախողված փուլը. «Ժողովուրդը և բանակը մեկ մարդու նման կանգնեցին և թույլ չտվեցին մեր հանձնվելը՝ սկսեցին փոխզիջումներից խոսել: Այդ գործընթացը բերեց հանգեցրեց «Սասնա ծռերի» ապստամբությանը, նրանց սատար կանգնեց ժողովուրդը: Եվ նախագիծն էլի տապալվեց»,- մանրամասնում  է Շիրինյանը շարունակելով. «Հիմա երրորդ փուլն է սկսվել, թե այսքան տարածք պետք է հանձնվի, այլ տարբերակ չկա, թե կոնֆլիկտը փոխզիջում է ենթադրում»: Քաղաքագետը հարց է բարձրացնում՝ իսկ ինչ է զիջելու Ադրբեջանը, ինչո՞ւ առաջինը մենք պետք է զիջենք, ոչ թե իրենք. «Շքահանդեսը բացեց հանրապետության հիմնադիր նախագահը, որովհետև ամեն մարդ ռիսկ չի անի պերճախոսությամբ պետության շահերի դավաճանություն կազմակերպել»: Քաղաքագետը  կարծում է, որ Լևոն Տեր-Պետրոսյանն այսպիսով փորձում է սիրաշահել իշխանություններին ու հաջորդ խորհրդարանում իր մի քանի հոգու մանդատի  հարցը լուծել.<<Տեր Պետրոսյանը մի դարդ ունի, ինձ թվում է նա այդ ելույթն ունեցավ, որ իր 2-3 հոգուն տեղավորի, բայց ինքը մոռանում է, որ խորհրդարանական հանրապետություն ենք դառնում ու տեղավորելը շատ դժվար է լինելու, մանավանդ նման ելույթից հետո>>: Քաղաքագետի կարծիքով թե՛ փաթեթային, թե՛ փուլային լուծումները երբեք արդյունք չեն տվել, պարտվողական թեզեր են: Լևոն Շիրինյանի խոսքով՝ հայ-թուրք-ադրբեջանական հարաբերությունների լուծումը փոխզիջման տարբերակ  չունի։Քաղաքագետը կարծում է, որ մենք պետք է փոխենք մեր թե՛ արտաքին, թե՛ ռազմական քաղաքականությունը։ «Չափազանց վտանգավոր մոտեցումներ ունենք, պարտադիր չէ, որ միշտ  պաշտպանվենք,  պիտի նախահարձակ լինենք, ռազմատենչների կողքին խաղաղասիրությունը դա հիվանդություն է և չափազանց վատ հետևանքների է հանգեցնում: Չպետք է քննարկեն՝ քանի շրջան տան, որ լավ ապրեն: Աշխարհի որևէ այլ երկրում նման տեսակ հիվանդությամբ տառապող քաղաքական գործիչներ չես տեսնի»,- ասաց նա։ Քաղաքագետը կոչ է անում՝ եթե խաղաղություն ես ուզում, պետք է պատրաստ լինես պատերազմի: Հիմնադիր նախագահը մասնավորապես ասել էր.« Ղարաբաղի հարցի լուծման այլ տարբերակ, քան փուլայինը, գոյություն չունի։ 18 տարի առաջ ասում էիք՝ կա, հիմա ցույց տվեք: Գոյություն չունի: Այն, ինչ-որ դրված է հիմա սեղանին, նույն փուլային տարբերակն է: Այսօր բանակցությունների սեղանին, ըստ էության, դրված է կարգավորման փոխզիջումային նույն առաջարկը, ինչ 1997 թվականին: Այն է՝ որոշ տարածքների զիջման դիմաց Ղարաբաղին միջազգայնորեն ճանաչված միջանկյալ կարգավիճակ շնորհելու, իսկ վերջնական կարգավիճակի հարցը ապագային թողնելու տարբերակը՝ երաշխավորված ղարաբաղա-ադրբեջանական շփման գծում խաղաղապահ ուժերի տեղակայմամբ։ Սա է, ուրիշ բան չկա: Ոչ մի հեքիաթի չհավատաք: Վաղը կբերեն, կտեսնեք: Ես նույնիսկ հիմքեր ունեմ կասկածելու, որ 1997 թվականից ցածր կարգավիճակ ունի այսօրվա լուծումը»,- հայտարարել էր Տեր-Պետրոսյանը: Ավելին՝ առաջին նախագահն ընդգծել էր, թե այս պահը բաց թողնելու դեպքում հաջորդ տարբերակը Հայաստանի համար ավելի վատն է լինելու: Անի Սահակյան