Սեյրան Օհանյանի խորհրդավոր լռությունն ու նրա դղյակների հավատարիմ պաշտպանները
Ազգային ժողովում ՀՀ նախագահի նախկին ներկայացուցիչ,նախագահի աշխատակազմի ղեկավարի նախկին տեղակալ Վիկտոր Դալլաքյանի «Երրորդ հանրապետություն» կուսակցության շուրջ ամիսներ խմորվող ինտրիգներն ավարտվեցին։ Այսօր կուսակցության համագումարն ընթացավ առանց աշխարհացումց իրադարձությունների, ներկա չէր պաշտպանության նախկին նախարար Սեյրան Օհանյանը, որի մասին մամուլը ամիսներ շարունակ գրում էր։ Հերթական համագումար, ավանդական մոտեցումներ, միաձայն քվեարկություններ։ Վիկտոր Դալլաքյանը ինչպես նախորդ երկու ասուլիսներին շեշտեց իշխանության վերարտադրության վտանգավորության հարցը․ «Գործող վարչախմբի ինքնավերարտադրության ձգտումն այսօր ՀՀ ազգային անվտանգությանը սպառնացող լրջագույն մարտահրավեր է: ՀՀ ԱԺ-ի 2017 թվականի ընտրությունները վճռորոշ են լինելու ոչ միայն Հայաստանի, այլեւ Արցախի հետագա ճակատագրում»,- ելույթ ունեցավ Վիկտոր Դալլաքյանն ու նշեց, որ իշխանությունները կեղծելու են ընտրությունները, իսկ իրենց ընձեռնված հնարավորությունը պահանջում է ողջ ազգի համախմբում: Դալլաքյանը շեշտեց, որ պետք է մի կողմ դնել գաղափարական տարաձայնությունները։ Ի հեճուկս համագումարի միապաղաղության, հետաքրքիր եւ աշխույժ ճեպազրույց ծավալվեց համագումարից հետո լրագրողների եւ կուսակցության նորընտիր նախագահ Վիկտոր Դալլաքյանի առջեւ։ Դալլաքյանը վերստին հայտարարեց Սեյրան Օհանյանի հետ համագործակցության մասին, ասաց, որ համագործակցությունը գնալով էլ ավելի է խորանում, հերքեց տարածված մի շարք տեղեկություններ, մասնավորապես, որ հանդիպում է եղել երկրորդ նախագահ Ռոբերտ Քոչարյանի եւ իր միջեւ, որ Քոչարյանն է ուղղորդում Սեյրան Օհանյանին։ Վիկտոր Դալլաքյանը խորամանկ մարտավարություն էր որդեգրել, ոչ այնքան հաճելի հարցերի դեպքում նա հայտարարում էր, որ Օհանյանի փաստաբանը չէ, իսկ հարցերը հիմնականում Օհանյանին էին վերաբերում, նրա ծրագրերին եւ առհասարակ, բայց մեծ հաշվով նա փաստաբանություն էր անում, հասցրեց անգամ պաշտպանական ճառ հնչեցնել։ Դալլաքյանը համոզմունք հայտնեց, որ դեռեւս մի քանի ամիս առաջ պաշտպանության նախարարի պաշտոնը զբաղեցրած Սեյրան Օհանյանը պատասխանատվություն չի կրում երկրում ստեղծված ծանրագույն վիճակի համար․«Նա բացարձակապես մեղք չունի», պնդեց Դալլաքյանը հավելելով․ «Ինչ վերաբերում է, թե Օհանյանը իր գործունեության ընթացքում ինչ քայլեր է իրականացրել Հայաստանում տեղի ունեցող իրադարձությունների վերաբերյալ, այդ հարցերը կարող եք ուղղել պարոն Օհանյանին։ Հայաստանի իրավիճակի գնահատականը տվել է գործող վարչապետը, երբ նշանակվելուց հետո հայտարարեց, որ Հայաստանի տնտեսությունը գտնվում է ծայրաստիճան ծանր վիճակում։ Երկրում ստեղծված ծանր իրավիճակի համար որեւէ պատասխանատվություն չի կրում Սեյրան Օհանյանը»,-ասաց Դալլաքյանը: Դալլաքյանը հրաժարվեց պատասխանել հարցին, թե գիտի՞ արդյոք՝ ինչ միջոցներով է կառուցվում Սեյրան Օհանյանին Վահագնի թաղամասում գտնվող դղյակը։Վիկտոր Դալլաքյանը հայտարարեց, թե ապրիլյան պատերազմում նույնպես գործող նախարար Սեյրան Օհանյանը բացարաձակապես մեղք չի ունեցել։ Նա բացառեց, որ պաշտպանության նախկին նախարարի հետ համագործակցությունը որեւէ փուլում կարող է խաթարվել. «Կարծում եմ, որ մեր համագործակցությունը ոչ միայն կշարունակվի, այլեւ կխորանա եւ առաջիկայում ականատեսը կլինեք»: Վիկտոր Դալլաքյանը այդ ճեպազրույցի ժամանակ էլ հիշեցրեց, որ իր եւ Սեյրան Օհանյանի մոտեցումներն ու գնահատականները երկրում ստեղծված իրավիճակի վերաբերյալ համընկնում են։ Հետաքրքիր է մինչեւ երբ է Սեյրան Օհանյանը ուրիշների թիկունքի ետեւից մեսիջներ ուղղելու, իսկ միգուցե ինքը հասկանո՞ւմ է, որ անհնար է լինելու անձամբ հերքել անհերքելին։ Անի Սահակյան
Հետևեք մեզ Viber-ում
