Կառավարությանը ճամփել բախտ բացողի, թե՞ մոմ թափողի մոտ
Հայաստանը հերթական վարկային ծրագիրն է քննարկում։ Ֆինանսների փոխնախարար Արմեն Հայրապետյանն այսօր ԱԺ-ի քննարկմանը ներկայացրեց վարկային համաձայնագիր՝ ՀՀ կառավարության եւ Զարգացման ֆրանսիական գործակալության միջեւ ստորագրված, որով ՀՀ կառավարությանը կտրամադրվի 40 մլն եվրո վարկ: Այն ուղղվելու է հարկաբյուջետային, սոցիալական եւ շրջակա միջավայրի կայունության խթանման եւ մրցունակության ամրապնդման համար: Փոխնախարարի խոսքով բյուջետային աջակցության, այլ ոչ թե նպատակային վարկ է, երբ բյուջեն դեֆիցիտ է ունենում, տարբերությունը կարող են լրացնել. «Այս 40 մլն եվրոն 2016-ին նախատեսված ֆինանսական դեֆիցիտը փակելու հարցն է լուծում» պարզաբանեց կառավարության ներկայացուցիչը։ ԲՀԿ -ական Միքայել Մելքումյանը հորդորեց պարզաբանել՝ «բյուջեի փողը չի հերիքո՞ւմ, փակում եք բացը», որ սոցիալական ու շրջակա միջավայրի փաթեթավորմամբ եք ներկայացնել. «Վարկով կարո՞ղ եք աշխատավարձ տալ պետական հիմնարկներին»: Փոխնախարարը բացատրեց. «Եթե ծրագրային ժամանակահատվածում նախատեսում ենք, որ եկամուտները լինելու են 80 միավոր, ծախսերը լինելու են 100 միավոր, 20 միավոր ֆինանսավորման խնդիր կա: Կամ ներքին աղբյուրներից ենք փակում, կամ արտաքին աղբյուրներից գնում ենք վարկ ենք վերցնում»: Հետեւաբար, կոնկրետ ասել, թե ինչի վրա են ծախսելու գումարը՝ հնարավոր չէ, բյուջեի աջակցման համար է: ԲՀԿ խմբակցության ղեկավար Նաիրա Զոհրաբյանը մտահոգություն հայտնեց, որ եթե հատենք արտաքին պարտքի ռիսկային սահմանը, ի՞նչ ենք անելու, որովհետեւ որեւէ տեսանելի հույս, որ ՀՀ-ում առաջիկա տարիներին լուրջ ներդրումներ կարվեն՝ չկա: Փոխնախարարը պատասխանեց, որ կիսում է մտահոգությունը, որ երկիրը ներդրումների կարիք ունի: Հայրապետյանն ասաց նաեւ, որ եթե Հայաստանին չվստահեին, պարտք չէին տա, հետեւաբար իրենց քաղաքականության կուրսին դեռ հավատում են: ՀԱԿ խմբակցության քարտուղար Արամ Մանուկյանն նկատեց, որ դեֆոլտից խուսափելու համար դրսից ներարկումներ է անում այս կառավարությունը։ Նա խնդրեց նախորդ կառավարությունից գոնե 1 տարբերություն նշել, ի՞նչ կոնցեպցիա ունի այս կառավարությունը, որը չուներ Հովիկ Աբրահամյանի կառավարությունը․ «Որեւէ դեֆոլտի խնդիր չկա, որովհետեւ ֆինանսների կառավարման տեսանկյունից մենք բարձիկներ ենք անվանում իրենց՝ միջոցներ ենք կուտակում կայունացման հաշվի վրա»: Անդրադառնալով Ֆինանանսների ներկա եւ նախկին նախարարության մոտեցումների տարբերությանը՝ Հայրապետյանը նշեց, որ իրենց նախարարության մոտեցումները փոխվում են այնքանով, որքանով կառավարության նպատակադրումներն են փոխվում. «Նոր կառավարության մոտեցումներն են՝ հարկային թափանցիկություն, զգուշավոր պարտքային քաղաքականություն: Ինչ վերաբերում է պետական պարտքի սպասարկումներին, ապա դրանց թիվն իսկապես բավականին բարձր է՝ իննսուն-հարյուր միլիարդ դրամ, որը կազմում է մեր բյուջեի ծախսերի ինը տոկոսը»: Փոխնախարարի անհիմն արդարացումները նորից ելույթի մուսա առաջացրեցին Նաիրա Զոհրաբյանի մոտ․ «Կառավարության ներկայացուցիչը ցնցող հայտարարություն արեց, ինչը ստիպեց, որ ելույթ ունենամ: Առաջին անգամ հնչեց, որ տնտեսական անկումն ու աճը կախված է հաջողության հետ, այսինքն՝ աստղերը լավ կդասավորվեն, կառավարությունը կգնա մոմ թափողի, գրբացի մոտ, լավ կլինի այդ օրը, կլինի տնտեսական աճ, չի լինի, չի լինի տնտեսական աճ: Վստահությունը, կոռուպցիայի, ստվերի, մենաշնորհների դեմ պայքարն առոչինչ է, կարևորը հաջողությունն է»,- ասաց Նաիրա Զոհրաբյանը: Պատգամավորը նշեց, թե այնպիսի տպավորություն է, որ իշխանության ու կառավարության համար մի տարբերակ կա, այն էլ ամեն բան կախված է հաջողությունից: «Եթե այդպես է, ես հուշում եմ հասցեն՝ Երրորդ մաս, Հռիփսիկ տոտա, լավ մոմ է թափում, գնացեք Կառավարությամբ, թող բախտ բացի, մոմ թափի՝ կլինի հաջողություն, թե՝ ոչ, կունենա՞նք տնտեսական աճ: Սա է միակ ճանապարհը, շնորհակալ եմ ձեր անչափ անկեղծության համար»,- նկատեց նա: Արձագանքեց նիստը նախագահող ԱԺ փոխնախագահ Էդուարդ Շարմազանովը. «Այս ի՞նչ գովազդ արեցիք, տիկի՛ն Զոհրաբյան, Հռիփսիկ տոտային: Հիմա Ձեր փայն ինչքա՞ն է սրա մեջ»: Անի Սահակյան