Նվեր Մնացականյանը՝ «Ուրվագիծը» վարելու եւ «Կենտրոն» հեռուստաընկերություն տեղափոխվելու մասին

«Կենտրոն» հեռուստաընկերության «Ուրվագիծ» հաղորդաշարի հեղինակ-վարող Պետրոս Ղազարյանն ազատվել է աշխատանքից: Լուրեր են շրջանառվում, որ նրան կփոխարինի Հանրային հեռուստաընկերությունից վերջերս ազատված` «Հարցազրույց» հաղորդաշարի հեղինակ Նվեր Մնացականյանը: Araratnews.am-ի հետ զրույցում Մնացականյանը չհերքեց, որ «Կենտրոն» հեռուստաընկերությունից առաջարկ է ստացել: Ներկայացնում ենք նրա հետ մեր զրույցը: Պարոն Մնացականյան, դուք «Կենտրոն» հեռուստաընկերությունից աշխատանքի առաջարկ ստացե՞լ եք: Այո՛: «Ուրվագիծ» հաղորդաշա՞րն եք վարելու: Չէ՛, չէ՛, դրա հետ կապ չունի: Ուղղակի հանդիպել ենք, քննարկել, բայց դեռ որոշակի ոչինչ պարզ չէ: «Կենտրոն» հեռուստաընկերությունն առաջիկա օրերին հայտարարություն կանի: Այսինքն՝ ձեր՝ այնտեղ աշխատանքի անցնելը կապ չունի՞ Պետրոս Ղազարյանի աշխատանքից ազատվելու հետ: Չէ՛, չէ՛: Եվ «Ուրվագիծը» չեք վարելու: Ես կապ չունեմ «Ուրվագծի» հետ: Այսինքն՝ դուք աշխատանքի առաջարկ ստացել եք այս պատմությունից առա՞ջ: Չեմ էլ հիշում` ո՛ր օրն է եղել: Իսկ ի՞նչ գնահատական կտաք տեղի ունեցածին: Տեղյակ չեմ, չեմ նայել, լսել եմ եւ թռուցիկ բաներ տեսել էդ հաղորդումից: «Կենտրոն» հեռուստաընկերության պաշտոնական էջից Պետրոս Ղազարյանի հաղորդումը հեռացվեց. սա խոսքի ազատության բացակայության մասի՞ն չի վկայում: Չեմ կարող ասել: Եթե հաղորդումը դիտած լինեի եւ որևէ հիմնավորում ունենայի, կպատասխանեի ձեր հարցին, բայց հաղորդմանը ծանոթ չեմ: Ձեր քննարկումների արդյունքի մասին ե՞րբ նորություն կլինի: Առաջիկա օրերին: araratnews.am