Ռուսաստանի զենքի «բիզնեսը» կծաղկի, Իլհամն էլ գոհ կմնա

Մոսկվան և Բաքուն մի շարք հարցեր են լուծել, որոնք նախկինում բանավեճեր են առաջացրել, հայտարարել է ՌԴ փոխվարչապետ Դմիտրի Ռոգոզինը, որը Բաքվում օրերս մասնակցում էր Ադրբեջանի և Ռուսաստանի միջև տնտեսական համագործակցության միջկառավարական հանձնաժողովի 16-րդ նիստին։ «Մենք շատ ժամանակ ենք ծախսել բանակցությունների վրա, լուծել են մի շարք հարցեր, որոնք բարդ բանավեճերի առիթ էին հանդիսացել»,-ասել է Ռոգոզինը և Ադրբեջանի փոխվարչապետ Յաղուբ Էյուբովին հրավիրել է Սանկտ-Պետերբուրգ՝ մասնակցելու 21-րդ էներգետիկ ֆորումին։ Էյուբովն իր հերթին ընդգծել է, որ Ռուսաստանը անվտանգության երաշխիք է տարածաշրջանում։ Նրա խոսքով՝ Ադրբեջանի և Ռուսաստանի հարաբերությունները հասել են ռազմավարական գործընկերության մակարդակի։ Ռուսաստանի փոխվարչապետ Դմիտրի Ռոգոզինի ներկայիս այցը Ադրբեջան իսկապես տարբերվում է նախորդ այցերից, գրել են Բաքվում գործող «Ատլաս» քաղաքական հետազոտությունների կենտրոնի վերլուծական նյութում։ Դրանում հիշեցվում է, որ Ռոգոզինի ադրբեջանական այցը հաջորդեց Իսրայելի վարչապետ Բենիամին Նեթանյահուի ադրբեջանական այցին և ընդգծվում է, որ Ռուսաստանը չի ցանկանում կորցնել ադրբեջանական շուկան։ Հաղորդվում է, որ Ադրբեջանի կողմից Իսրայելից ժամանակակից ռազմական տեխնիկա գնելը կարող է հարուցել Կրեմլի բնական մտահոգությունը։ Նյութը գրվել է Ռոգոզինի ադրբեջանական այցից առաջ, դրանում չի բացառվել, որ Ռոգոզինը կարող էր Ադրբեջանում քննարկել երկու կարևոր հարցը։ Դրանցից մեկը վերաբերում է Բաքվին «Իսկանդեր Մ» համալիրների վաճառքի հնարավորությանը, որպիսիք նա ավելի վաղ վաճառել է Հայաստանին։ Երկրորդ կարևոր հարցն այն է, որ Նեթանյահուն Բաքվում հայտարարել է, որ Իսրայելը ցանկանում է իր գազը Եվրոպա արտահանել այն խողովակաշարով, որը կառուցում են Ադրբեջանն ու Թուրքիան։ Սա նույնպես կարող է մտահոգել Ռուսաստանին, քանի որ TAP և TANAP խողովակաշարերի կառուցման դեպքում լուրջ այլընտրանք կհայտնվի «Թուրքական հոսք» գազատարին, որը պատրաստվում է կառուցել Ռուսաստանը։ Փաստացի, Ռուսաստանն ու Ադրբեջանը թևակոխում են հարաբերությունների կարգավորման նոր «մեղրամիսի» փուլ: Ռոգոզինի հայտարարություններից դատելով` կարելի է եզրակացնել, որ Մոսկվայի ու Բաքվի լուծած «մի շարք հարցերը», որոնք բարդ բանավեճերի առիթ էին հանդիսացել, Հայաստանին «Իսկանդեր Մ» համալիրների վաճառքն էր: Այժմ, ըստ ամենայնի, Ռուսաստանն Ադրբեջանին նույնպես «Իսկանդեր Մ» համալիրների կվաճառի: Դրա հավանականությունն իսկապես ռեալ է: Մոսկվան չի ցանկանում կորցնել ռազմավարական գործընկեր Ադրբեջանին, որը ոչ մի փող չի խնայի նույնպես «Իսկանդեր Մ» ձեռքբերելու համար: Իսկ Մոսկվան միթե կարո՞ղ է մերժել Ալիևին... Իհարկե ո՛չ: Հետևաբար, կարող ենք առաջիկայում ականատես դառնալ, իսկապես, Ադրբեջանին Ռուսաստանի կողմից «Իսկանդեր Մ» վաճառելու գործարքին: Եվ ընդհանրապես, սպառազինության վաճառքի նոր գործարքների պատասխանատու Ռոգոզինի այցը Բաքու` հենց վկայում էր այն մասին, որ Ռուսաստան-Ադրբեջան մակարդակում սկսվելու է զենքի վաճառքի նոր գործարքների շուրջ համաձայնություն կայացնելը: Վերջին մի քանի տարում Ռուսաստանի կողմից Ադրբեջանին վաճառված 5 միլիարդ դոլարի զենքը, դեռ ավարտը չէ... Առաջիկայում, ինչպես ասում են`և՛ Մոսկվայի զենքի «բիզնեսը» կծաղկի, և՛ Իլհամը գոհ կմնա... Մետաքսյա Շալունց