Ում է մեղադրում կամ մոլորեցնում Փայտյանը
«Գոմեշի մսի» գործի պատճառով 2012 թվականին ԶՈՒ գլխավոր շտաբի պետի տեղակալի պաշտոնից պաշտոնանակ արված գեներալ-լեյտենանտ Արշալույս Փայտյանը կրկին ասպարեզ է եկել: Դեռեւս 2011թ. մսի մատակարարները խաբել էին ՊՆ-ին՝ տավարի մսի փոխարեն տրամադրելով գոմեշի ավելի էժան միս: Այս գործով մեղադրյալի աթոռին հայտնվեց կապանցի գործարար Ալբերտ Օհանջանյանը, որը ինքնագլուխ չի գոմեշ իրացրել, այլ մատակարարումը եղել է Փայտյանի թույլտվությամբ, որը մատակարարման գծով պատասխանատուն էր: Արդյունքում Արշալույս Փայտյանը ընդամենը հեռացվեց աշխատանքից, իսկ Ալբերտ Օհանջանյանը փոխահատուցեց ՊՆ-ին հասցված վնասը: Թվում էր, թե 2011թ. բացահայտված գոմեշի մսի աղմկահարույց դեպքից, Սերժ Սարգսյանի հայտնի, բարկացած խորհրդակցությունից հետո Փայտյանը պատասխանատվության կենթարկվեր, բայց դա տեղի չունեցավ, Փայտյանը մնաց ազատության մեջ ու շարունակեց զարկ տալ իր ընտանեկան բիզնեսների զարգացմանը, իսկ հիմա անգամ՝ քաղաքական հավակնություններ է ներկայացնում: Նա իր մասին հիշեցրեց մեկ ամիս առաջ, երբ հայտնի դարձավ պաշտոնաթող գնադապետ Արթուր Ալեքսանյանի (Ամարասի Արթուրի) կողմից ստեղծվող նոր նախաձեռնության մասին՝ «Միասնական Արմենիա»: Բանակի կողոպտիչներից մեկը հանկարծ հանդես եկավ բարոյական արժեքներ տարածողի դերում ու սկսեց փիլիսոփայել նորաստեղծ շարժման համամարդկային ու հայրենասիրական նկրտումների մասին: Փայտյանն իր ֆեյսբուքյան էջում գրեց.<< «Միասնական Արմենիա»-ի գաղափարական ուղենիշ-ծրագիրը ոչ միայն ազգային է, այլ համամարդկային: Ազգայինը տեղավորվել է համամարդկայինի մեջ, համատեղվել է հայ տեսակի գենետիկ հատկություններն ու կարողությունները: Կամքն աստծո ու սուրբ պատվիրանների ոգով առաջնորդվելը նշանակում է լինել անբիծ, բացարձակ ճշմարիտ: Դա այն է, ինչ այսօր պետք է աշխարհում առաջինը խաչակնքման իրավունք ստացած, աշխարհով մեկ ցիրուցան եղած մեր ժողովրդին, և դա է առաջարկում «Միասնական Արմենիան» >>: Հիշեցնենք, որ շարժման նախաձեռնողները գերակա նպատակ են հռչակել Հայաստան-Սփյուռք-Արցախ միասնականության գաղափարի կյանքի կոչումը ի դեմս երկպալատ պառլամենտի ձեւավորման, որտեղ ներկայացված կլինեն ոչ միայն Հայաստանից, այլեւ Արցախի ու Սփյուռքի մեր հայրենակիցները: Փայտյանն էլ առիթը բաց չթողեց եւ մարտական ընկերների նախաձեռնության առիթով հիշեցրեց իր մասին՝ հայրենսաիրության ու համամարդկային արժեքների մասին պաթետիկ գրառումով, նա մարտահրավեր նետեց հայտնի ճշմարտությանը, որ կարեւոր ոչ թե մտքերն են, այլ մարդիկ, ովքեր կրում են այդ մտքերը: Ու եթե մարդը վարկաբեկված է, ապա նրա ցանկացած լավ բառ մի փութ մեղրով կուլ չի գնա:Բայց գնաց: Հաջողված փորձից հետո նա հիմա էլ լծվլ է արդարանալու ձին: <<Հրապարակ>> օրաթերթի հետ զրույցում անդրադառնալով գոմեշի մսի պատմությանը Փայտյանը գրեթե սենսացիոն հայտարարություն է արել՝ << …ամբողջ աշխարհն է այդ տեսակ «գոմեշի» միս օգտագործում>>: Ի՞նչ տեսակ է եղել այդ «գոմեշի» միսը հարցին էլ պարզաբանել.<< Ես չգիտեմ, թող մասնագետները ասեն, հրապարակումներ եղան, հոդվածներ գրվեց, որևէ մեկը չէր կարող առանց համապատասխան լաբորատոր ստուգման եզրակացության բանակին տրամադրելու վատ սննդամթերք, այդպիսի բան հնարավոր չէ ու չի էլ եղել>>: Զարմանալի է, որ սա ասում է մի մարդ, ում ստորագրությունն է դրված աղմկահարույց այդ գործի վերաբերյալ բոլոր փաստաղթերում, այսինքն նա է եղել այն պաշտոնյան, ով պատասխանատվություն է ստանձնել այդ մատակաարումների համար, հետեւաբար ինքն էլ պարտավոր էր ի պաշտոնե բոլոր այդ մասնագետներից, որոնց մասին ինքը հիշատակում է պահանջել լաբորատոր փորձաքննության արդյունքներ: Այս հայտարարությունը նշանակում է, որ կամ Փայտյանը հանրությանն անամոթաբար մոլորեցնելու խնդիր է լուծում, կամ էլ ակնարկում է, որ ամեն ինչ նորմալ է եղել, պարզապես իր գլխին սարքել են: Ի դեպ, Միասնական Արմենիա նախաձեռնության մասին Փայտյանը անվանական չի անդրադարձել, ասել է միայն, որ քաղաքականությամբ զբաղվելու մտադրություն չունի, հավանաբար նա ցանկանում է վերադառնալ զինվորական ծառայության ու դրանով է պայմանավորված իր ակտիվացումը: Անի Սահակյան