Ռազմաքաղաքական օղակը սեղմվում է Արցախի խնդրի շուրջ

Թեժ կետերը, թմրանյութերի անօրինական շրջանառությունը, ահաբեկչությունը, Արևմուտքի հետ Ռուսաստանի ու դաշնակիցների դիմակայությունը 2017թ. կազդեն ՀԱՊԿ անդամ երկրների անվտանգության վրա, կարծում է ՀԱՊԿ գլխավոր քարտուղար Նիկոլայ Բորդյուժան։ «Ես երեք կատեգորիայի խնդիր եմ տեսնում, որոնց մենք կբախվենք։ Առաջինը թեժ կետերն են կամ չկարգավորված հակամարտությունները՝ Աֆղանստան, Ղարաբաղ, Դոնբաս, Մերձդնեստր, Սիրիա, նաև կազդեն Իրաքը, Եմենը։ Երկրորդ խմբի խնդիրները ավանդական բնույթի են՝ թմրանյութերի անօրինական շրջանառություն, ահաբեկչություն, տեխնածին բնույթի արտակարգ իրավիճակներ»,- ասել է նա լրագրողներին Պետդումայում։  Երրորդ խմբի խնդիրների թվում նա նշել է Արևմուտքի հետ Ռուսաստանի ու դաշնակիցների դիմակայությունը, ահաբեկչության դեմ պայքարում համագործակցության բացակայությունը և այլն։ «Այս ամենը, այսպես, թե այնպես, կազդեն մեր պետությունների անվտանգության վրա»,- հավելել է Բորդյուժան։ Մի կողմից Մոսկվան ու Բաքուն, կարծես, փոխհարաբերությունների ճշգրտման փուլում են` կապված Հայաստանի «Իսկանդեր Մ» համակարգերի տրամադրման հետ կապված, մյուս կողմից, կարծես, բոլորն են հասարականում, որ ԼՂ խնդրի բանակցությունները փակուղի են մտել: Դա օրերս, անգամ արձանագրեց Սերժ Սարգսյանը Ստեփանակերտում մշակութային գործիչների հետ հանդիպմանը: Մոսկվան էլ մի կողմից արձանագրում է ԼՂ խնդրի` թեժ լինելը, բայց Բաքվի հետ շարունակում ռազմատեխնիկական հարցերով բանակցությունները, փորձելով մեղմել Ալիևի զայրույթը` ՌԴ-ի կողմից «Իսկանդեր Մ» համակարգերի տրամադրման առիթով: Սա վտանգավոր իրավիճակ է ոչ միայն ռազմաքաղաքական իրողությունները հաշվի առնելով, այլև հոգեբանական մթնոլորտի տեսանկյունից: Առանց այն էլ, հայկական կողմը չունի այն համոզվածությունը, որ Ադրբեջանի կողմից ագրեսիայի նոր փուլի դեպքում` Ռուսաստանը «միջնորդից» կվերածվի Հայաստանի ռազմավարական դաշնակցի: Ավելին, ավելի մեծ է համոզմունքը, որ ռազմական գործողությունների վերսկսման դեպքում Մոսկվան կխաղա չեզոքություն, չցանկանալով փչացնել հարաբերությունները Ալիևի հետ: Հիշեցնենք, որ Բաքվում է Ռուսաստանի Դաշնության փոխվարչապետ Դմիտրի Ռոգոզինը, որտեղ այսօր կկայանա ռուս-ադրբեջանական միջկառավարական հանձնաժողովի նիստը, որի շրջանակում կողմերը քննարկելու են երկկողմ համագործակցության զարգացման հեռանկարները՝ այդ թվում նաև ռազմատեխնիկական ոլորտում: Ինչպես հայտնել է Независимая Газета-ն, Ռուսաստանի Դաշնության փոխվարչապետ Դմիտրի Ռոգոզինը հանդիպելու է Ադրբեջանի նախագահ Իլհամ Ալիևին և, ենթադրաբար, քննարկման առանցքային թեման է լինելու ռազմատեխնիկական համագործակցությունը: Երեկ էլ Kommersant թերթը բացահայտ նշել էր, որ Ադրբեջանի նախագահ Իլհամ Ալիևի հետ, քննարկման հիմնական թեման լինելու է Ռուսաստանի կողմից Ադրբեջանի աշխարհաքաղաքական գլխավոր հակառակորդին՝ Հայաստանին, «Իսկանդեր-Մ» օպերատիվ-մարտավարական հրթիռային համալիրների մատակարարումը. «Ռուս բանակցողների հիմնական խնդիրներից մեկը կլինի պարզաբանելը Ռուսաստանի դիրքորոշումը՝ կապված այս տարի Հայաստանին «Իսկանդեր-Մ» օպերատիվ-մարտավարական հրթիռային համալիրներ մատակարարելու հետ։ Ադրբեջանցի գործընկերները շատ բացասական են արձագանքել իրադարձությունների նման զարգացմանը՝ Լեռնային Ղարաբաղի հակամարտության համատեքստում»,-ասվել էր հոդվածում։ Եթե իսկապես կայանա ռուս-ադրբեջանական ռազմատեխնիկական նոր գործարք և  Ադրբեջանին Ռուսաստանի կողմից զենքի նոր խմբաքանակ տրամադրվի, ապա դա կդառնա Մոսկվայի կողմից հստակ նոր «քարտ բլանշ» Ալիևին` դիմելու նոր ռազմական գործողությունների ընդդեմ Լեռնային Ղարաբաղի: Թամար Բագրատունի