Չեմ կարծում, որ հայրս երբեւիցե կփորձի թողնել քաղաքականությունը
ՀՀ կառավարությանն առընթեր պետգույքի կառավարման վարչության պետ Արման Սահակյանը, ում գլխավոր պաշտոնը կյանքում թերեւս հոր՝ Գալուստ Սահակյանի որդին լինելն է, քանզի նրա հոր գլխավոր պաշտոնն էլ Գալուստ Սահակյան լինելն է, առաջիկա խորհրդարանական ընտրություններին կմասնակցի, եթե քաղաքական որոշում լինի։ Քաղաքական որոշումը՝ մի կողմ, իսկ ինքը ցանկանո՞ւմ է։ Սահակյանը կարծում է, որ քաղաքականության մեջ ցանկություններով պետք չէ առաջնորդվել։ «Եթե քաղաքականության մեջ ես, ու կա քաղաքական թիմ, ուրեմն դու պիտի ենթարկվես թիմի որոշմանը»,-երեկ մեզ հետ զրույցում ասաց նա։ Նկատենք, որ բոլոր հանրապետականներն են այդպես ասում՝ ինչ թիմը որոշի, այն էլ կանեն։ Հետաքրքիր նվիրվածություն է թիմին՝ ստորադասելով սեփական ցանկությունները։ Նկատենք, որ նոր Սահմանադրությամբ ընտրությունները կանցկացվեն բաց՝ ռեյտինգային, եւ փակ՝ համամասնական ցուցակներով։ Եվ ռեյտինգային ընտրակարգով պայքարի ելածների համար բավականին բարդ փորձություն է սպասվում, քանզի ստիպված են լինելու մեկ խոշորացված ընտրատարածքում նույն թիմից մի քանի հզոր խաղացողներ պայքարել իրար դեմ, վերջում էլ հարց է, թե ով կանցնի, ով կմնա։ Արման Սահակյանից հետաքրքրվեցինք՝ ինքը պատրա՞ստ է ռեյտինգային ընտրակարգով մասնակցել ընտրություններին իր տարածքում (Աջափնյակ համայնքից է)։ Բավարար ռեյտինգ իր մեջ տեսնո՞ւմ է այսօր, որ կարողանա բավարար չափով ձայներ հավաքել։ «Իհարկե տեսնում եմ։ Ուրեմն հավատացած եղեք՝ եթե չտեսնեմ էդ ձայները, ես երբեւիցե չեմ փորձի մասնակցել։ Եթե հիշում եք, 2003 թվականին ես ինքս Աջափնյակում, որպես թաղապետի թեկնածու, մասնակցել եմ ընտրություններին եւ մոտ 15 հազար ձայն եմ տարել»։ - Բայց հիմա կարծես ավելի բարդ է լինելու, Աջափնյակի հետ մեկ ընտրատարածքում են լինելու նաեւ Արաբկիրն ու Դավթաշենը, որտեղ խոշոր խաղացողներ կան, լուրջ մրցակիցներ։ Հեշտ կլինի՞ Ձեզ համար։ - Դե, մենք էլ կփորձենք։ Չեմ ասում, որ հեշտ կլինի, բայց, համենայնդեպս, եթե լինի համապատասխան քաղաքական որոշում, կփորձեմ։ Չեմ կարծում, որ հնարավորություն չեմ ունենա կուսակցության համար որոշակի ձայներ ապահովելու։ - Ինքներդ Ձեր հեղինակությա՞մբ, թե՞ դրան կնպաստեն նաեւ Ձեր հոր հեղինակությունն ու անցած ճանապարհը։ - Իմ հոր հեղինակությունն ու անցած ճանապարհն ինձ համար շատ թանկ են եւ, բնականաբար, հաստատ կօգնեն։ - Իսկ ինքը՝ Գալուստ Սահակյանը, մտադրություն ունի՞ մնալ քաղաքականության մեջ։ - Այդ հարցը կարող եք ուղղել իրեն, բայց, համենայնդեպս, ես կարծում եմ՝ այո, ունի։ Եվ այդ ուժն ունի, եւ ներուժն ունի։ - Զրուցե՞լ եք իր հետ այս թեմայով, ի՞նչ կարգավիճակով է ցանկանում մնալ քաղաքականության մեջ։ - Չեմ զրուցել․․․ ընտրություններից հետո կերեւա։ Նյութի աղբյուրը ` hraparak.am
Հետևեք մեզ Viber-ում
