Սերժ Սարգսյանը դժգոհ է Տիգրան Սարգսյանից
Սերժ Սարգսյանն իր աշխատավայրում բավականին խորհրդանշական հանդիպում և երկխոսություն է ունեցել ԵԱՏՄ կոլեգիայի նախագահ, Հայաստանի նախկին վարչապետ Տիգրան Սարգսյանի հետ: Հանդիպման ընթացքում, ինչպես նշվում է նախագահի լրատվական ծառայության տարածած հաղորդագրության մեջ, քննարկվել են ԵԱՏՄ զարգացման արդի միտումները համաշխարհային տնտեսական բարդ իրավիճակի պայմաններում, ինչպես նաև ԵԱՏՄ-ին Հայաստանի անդամակցության ազդեցությունը մեր երկրի տնտեսության վրա: «Մենք միասին Եվրասիական տնտեսական միությանը Հայաստանի միանալու գործընթացի ակունքներում էինք, և այդ միությանն անդամակցելով՝ ակնկալիք ունեինք էապես բարելավել Հայաստանի տնտեսական վիճակը: Ցավոք, անդամակցությունը համընկավ միջազգային տնտեսական գործընթացների հետ, որոնք բացասաբար ազդեցին երկրի տնտեսության վրա, և մեր քաղաքացիների վերաբերմունքը Եվրասիական տնտեսական միությանը դեռևս, մեղմ ասած, սպասողական է, թեև չանդամակցելու պարագայում, ես վստահ եմ՝ բացասական մոտեցումներն ավելի շատ կլինեին»,- Տիգրան Սարգսյանի հետ զրույցի ժամանակ ասել է Սերժ Սարգսյանը: Փաստացի Հայաստանի նախագահը շատ բաց տեքստով ասել է, որ Հայաստանի բնակչությունը դժգոհ է ԵԱՏՄ-ից, ասել կուզի նաև Տիգրան Սարգսյանից: Սա Տիգրան Սարգսյանի ԵԱՏՄ –ում ծավալած գործունեության առնչությամբ շատ կոնկրետ դժգոհություն է: Հայաստանի հանրությունը դժգոհություններ ունի շատ ու շատ հարցերի առնչությամբ, սակայն դրանք պաշտոնական հանդիպումների Սերժ Սարգսյանը որպես կանոն չի բարձրայանում: Այս անգամ հանրության անունից նա փաստացի հայտնել է իր սեփական դժգոհությունը: Դժգոհելու առիթ Սերժ Սարգսյանը իհարկե ունի՝ Հայաստանի տնտեսության վրա ԵԱՏՄ-ի անդակացության հետևանքներն առայժմ միանշանակ բացասական են: Անդամ երկրներից դեպի Հայաստան կատարվող ներմուծումների ժամանակ մաքսատուրքերի զրոյական դրույքաչափերի սահմանումը բացասական հետևանքն է ունեցել պետական եկամուտների վրա, իսկ ընդահանուր տարածքից ՀՀ բյուջե ակնկալվող մուտքերը նախատեսվածից մի քանի անգամ պակաս են եղել՝ պայմանավորված Ռուսաստանի տնտեսական վիճակի վատթարացամամբ: Միակ դրական իրողությունը, որով կարող էր փոխհատուցվել ԵԱՏՄ անդամակցության բացասական հետևանքները, հայկական ապրանքների արտահանումն է դեպի Ռուսաստան և միության անդամ այլ երկրներ: Բայց այստեղ էլ էական առաջընթաց ու լուրջ ձեռքբերումներ կարելի է ասել չկան: ԵԱՏՄ 150 մլն-անոց շուկան հայկական ապարանքի սպառման ծավալների աճ այդպես էլ չապահովեց: Հակառակը, հայկական ապրանքը ռուսական շուկայում լուրջ խոչընդոտների է հանդիպում: Տնտեսական մրցակցության պաշտպանության պետական հանձնաժողովը վերջերս հայտարարեց կոնկրետ ռուսական ընկերությունների անուններ, ոքվեր անօրինական ճանապարհով խոչընդոտել են հայկական ապարանքի իրացմանը: Ի՞նչ է արել ԵԱՏՄ կոլեգիայի նախագահ Տիգրան Սարգսյանը ԵԱՏՄ տարածքում հայ տնեսվարողներին աջակցելու և հայկական ապրանքի իրացման շուկաների ընդլայնմանը նպաստելու առումով: Ըստ էության ոչ մի շոշափելի բան: Ժամանակին, երբ Տիգրան Սարգսյանը ՀՀ վարչապետն էր, շատ էր խոսում Հայկական աշխարհ վիրտուալ գաղափարի մասին: Դժվար է ասել՝ հիմա, երբ նա ԵԱՏՄ կոլեգիայի նախագահն է, կրու՞մ է իր մեջ Հայկական աշխարհի գաղափարը: Եթե այո, դա պետք է երևար Հյաստանի տնտեսության վրա ազդեցությունից: Դավիթ Մանուկյան