Արջը 7 երգ գիտի, 7-ն էլ մեղրի մասին. Հեղինե Բիշարյանը` վարկային ծրագրերի մասին

Այսօր` փետրվարի 4-ին, ԱԺ-ում շարունակվում է ՀՀ նախագահի ներկայացրած ՀՀ և Վերակառուցման ու զարգացման միջազգային բանկի միջև  2015 թ օգոստոսի 26-ին ստորագրված «Կենսական նշանակության ճանապարհային ցանցի բարելավման ծրագրի համար լրացուցիչ ֆինանսավորում» վարկային համաձայնագիրը: Փաստաթղթով նախատեսվում է, որ ՎԶՄԲ-ն  25 տարի մարման ժամկետով Հայաստանին կտրամադրի 40 մլն ԱՄՆ դոլարի չափով վարկ:  Ծրագրի նպատակն է բարելավել ընտրված կենսական նշանակության ճանապարհները, մասնավորապես գյուղական համայնքներն արդի ճանապարհային ցանցի միջոցով կապել մայրուղիներին և հանրապետական ու միջպետական նշանակության  ճանապարհներին: ԱԺ «Օրինաց երկիր» խմբակցության ղեկավար Հեղինե Բիշարյանը նշեց, որ խեղճ պատգամավորները ընկել են հայտնի պատմության օրը, երբ ասում են արջը 7 երգ գիտի, 7-ն էլ մեղրի մասին՝ ստացվում է, որ քննադատությունները, մոտեցումները բոլորինը նույնն է: «Հիմա հաջողվել է մի հատ էլ վարկ բերել, մի մասը հասցեագրված օգտագործման  է գնալու, իսկ մի մասը` մտնում ենք նախընտրական շրջան, ահա մնացածը  թողենք անհասցե: Ինչո՞ւ պետք է հաստատեն մի վարկ, որ չգիտեն ինչի վրա պետք է ծախսվեն: Այս վարկային ծրագիրը քաղաքականություն է, միայն գումար չէ, պետության սոցիալական վիճակի խնդիր չէ: Սրա տակ դրված են խորը քննարկված, մշակված ծրագրեր, թե ինչ պետք է արվի, ինչու համար ենք այս գումարները բերում»,- հայտարարեց նա: