Վաշինգտոնի սենսացիոն խոստովանությունն ու ԴԱԻՇ-ի «չկոտրվող ողնաշարը»
ԴԱԻՇ-ի ընդարձակումը, որը զգալի տարածքներ է զավթել Իրաքում և Սիրիայում, դարձել է վերջին երկու տարիներին գլխավոր համաշխարհային խնդիրներից մեկը։ Խմբավորումը, որը ԿՀՎ տվյալներով՝ ունի մոտ 30 հազար գրոհային, զավթված տարածքներում խալիֆայություն է հռչակել։ Օբաման օրերս սենսացիոն խոստովանությամբ է հանդես եկել: Նա խոստովանել է, որ իրեն անակնկալի էին բերել ԴԱԻՇ խմբավորման գործողությունները, որը 2014-ին ընդարձակ տարածքներ էր զավթել Իրաքում, այնուհետև նաև Սիրիայում։ «Խոշոր ցամաքային հարձակումներ կազմակերպելու ԴԱԻՇ-ի հնարավորությունը չի եղել իմ հետախուզական ռադարի էկրանին»,-ասել է Օբաման CNN-ի հետ հարցազրույցում։ Օբաման նշել է, որ իր վարչակազմը մշտապես ձեռնարկել է ԴԱԻՇ-ի դեմ պայքարի լավագույն հնարավոր քայլերը։ Ավելին` Բարաք Օբաման հայտարարել են այն մասին, որ սխալները, որոնք ԱՄՆ-ն թույլ է տվել Իրաքում ռազմական գործողության ժամանակ, դարձել են ահաբեկչական ԴԱԻՇ խմբավորման առաջացման պատճառներից մեկը: «Մենք հրաժարվեցինք կրկնել 2003թ. ներխուժման որոշ սխալներ, որոնք սկզբնապես նպաստեցին կազմակերպության առաջացմանը, որը հայտնի է որպես ԴԱԻՇ: 2014թ. ԱՄՆ-ն ստեղծել է կոալիցիա, որի մեջ մտնում է մոտ 70 երկիր և սկսել է պայքարել Սիրիայում ու Իրաքում ահաբեկիչների դեմ, սակայն ոչ թե ամերիկյան գումարտակների ուժերով, այլ տեղի խմբավորումների, որոնց Վաշինգտոնը աջակցել է սարքավորումներով և հատուկ նշանակության ջոկատներով»,- ասել է Օբաման` հավելելով. «Կոալիցիան արդեն ահաբեկիչներին հասցրել է ավելի քան 16 հազար ավիահարված, իսկ ԴԱԻՇ-ը կորցրել է վերահսկողության տակ գտնվող տարածքների կեսից ավելին։ Վերջին հաշվով, ԴԱԻՇ-ի ողնաշարը կկոտրվի»,- հայտարարել է Օբաման։ Ըստ էության, Օբաման խոստովանել ու արձանագրել է ԴԱԻՇ-ի դեմ ամերիկյան վարչակազմի անարդյունավետ պայքարը, ավելին, այսքան ժամանակ տարած պայքարի արդյունքում, Վաշինգտոնն ամրագրում է, որ ԴԱԻՇ-ի ողնաշարը չի կարողացել կոտրել և որ ԴԱԻՇ-ը տարածում է ստացել, ընդարձակվել: ԱՄՆ նորընտիր նախագահ Դոնալդ Թրամփը դրական է արտահայտվել երկրի գործող ղեկավար Բարաք Օբամայի մասին. «Կարող եմ ասել, որ նա ինձ իրոք դուր եկավ, կարծում եմ՝ ես նրան նույնպես։ Կարծես թե, դա անգամ նրան զարմացրեց»։ Թրամփի խոսքով՝ Սպիտակ տանն Օբամայի հետ կայացած հանդիպումը «հիանալի է անցել»։ Նա նաև նշել է, որ մի քանի հրաշալի հեռախոսազրույց է ունեցել Օբամայի հետ։ Միևնույն ժամանակ Թրամփը հավելել է, որ հակասություններ ունի երկրի գործող ղեկավարի հետ մի շարք հարցերի շուրջ։ Ի դեպ, ամերիկյան Time ամսագիրը տարվա մարդ է հռչակել ԱՄՆ-ի ընտրյալ նախագահ Դոնալդ Թրամփին: Շապիկին տեղադրված լուսանկարի տակ Time-ի խմբագրակազմը մակագրել է՝ «Բաժանված Նահանգների նախագահը»: Ընտրյալ նախագահին նվիրված հոդվածում է ամսագիրը պարզաբանել է՝ Թրամփի ընտրությունը երկիրը բաժանել է երկու հակամարտող ճամբարների: «Ես ոչինչ չեմ արել երկիրը բաժանելու համար», - շտապել է հակադարձել Թրամփը՝ այդուհանդերձ հայտարարելով, որ իր համար մեծ պատիվ է այս իրադարձությունը, և որ իր համար այն մեծ նշանակություն ունի: Դոնալդ Թրամփին նվիրված հոդվածում Time-ը, սակայն դժվարանում է միանշանակ պատասխանել՝ դրակա՞ն, թե՞ բացասական ազդեցություն է թողել աշխարհի վրա Միացյալ Նահանգների քառասունհինգերորդ նախագահը դարձած միլիարդատերի գործունեությունը: Պարբերականը ընդգծում է Թրամփի բազմազան կերպարը՝ աջակիցների համար Թրամփը «երկար սպասված հանդիմանանք է» մեծամիտ իշխող վերնախավին: «2016-ը նրա համար վերելքի տարի էր, 2017-ը կլինի կառավարման տարի, և ինչպես բոլոր նորընտիր առաջնորդները, ինքն էլ հնարավորություն ունի կատարելու խոստումները և արհամարհելու սպասելիքները: Աջակիցներն ու քննադատները միասին են պարզելու, թե որքանով է նա իրականում հավատում այն ամենին, ինչի մասին խոսում էր»,- գրում է Time-ի գլխավոր խմբագիր Նենսի Գիբբսը՝ հավելելով․ - «Շուտով նրա ձեռքի տակ կհայտնվի հզորագույն մահացու զենք և տնտեսական լծակներ, որոնք հնարավորություն են տալիս փոխելու միլիարդավոր մարդկանց կյանքեր»: Հոդվածի հեղինակները գրում են նաև, որ նախկինում Թրամփին համարում էին հայտնի շոումեն, բայց միևնույն ժամանակ վստահ էին, որ իրականում նա իրենից քիչ բան է ներկայացնում: Սակայն քննադատները չէին հասկանում, որ իրենց մեծամտությունը միայն ավելի ուժեղ է դարձրել նրան: Թրամփը կարողացել է օգտվել անգամ թաբլոիդների շապիկներին հայտնվելուց, որպեսզի կարողանա խոսել հասարակ ժողովրդի հետ, նրան հաջողվել է հաղթահարել Միացյալ Նահանգների հիմնական քաղաքական կուսակցությունների թշնամությունը և փոխել իր երկրի քաղաքական ուղեգիծը: Արդյոք Թրամփին կհաջողվի՞ ԴԱԻՇ-ի ողնաշարը կոտրել` ցույց կտա ժամանակը... Ինչպե՞ս, ի՞նչ նոր ռազմավարությամբ է ԱՄՆ-ի նոր նախագահը կատարելու իր նախընտրական խոստումը` կանխել ահաբեկչական այդ հրեշավոր կառույցի գործունեությունը, առայժմ հայտնի չէ: Մետաքսյա Շալունց