Թրամփի մարդը` Մոսկվայում
Ամերիկացի կոնգրեսականներ Էլայջա Կամինգսը և Էրիկ Սլոուելը Կոնգրեսի ներկայացուցիչների պալատ են ներկայացրել օրինագիծ, որն առաջարկում է ստեղծել ԱՄՆ նախագահական ընտրություններին ցանցահենային հարձակումների միջոցով ՌԴ կառավարության միջամտության վերաբերյալ հետաքննության հանձնաժողով, հաղորդում է Wired-ը։ Ավելի վաղ ԱՄՆ հատուկ ծառայությունները Ռուսաստանին պաշտոնապես մեղադրել են երկրի նախագահական ընտրությունների վրա ազդելու փորձերի համար, Կրեմլում հերքել են մեղադրանքները։ Ընտրություններից հետո Սպիտակ տունը խոստովանել է, որ քվեարկության օրը հաքերային բարձր ակտիվություն չի եղել։ Կոնգրեսականների խոսքով՝ հանձնաժողովն անկախ, ակտիվ կերպով կքննի Միացյալ Նահանգների ընտրությունների վրա ազդելու, դեմոկրատիայի դեմ հարձակում գործելու Ռուսաստանի կողմից իրականացված փորձերը, ինչպես նաև հստակ առաջարկներ կանի ապագայի համար։ Մինչ ամերիկյան գործող վարչակազմը շարունակում փնտրել Ռուսաստանի մեղսակցությունը ամերիկյան նախընտրական պրոցեսների վրա` այսօր հայտնի դարձավ, որ ԱՄՆ նախագահական ընտրությունների ժամանակ Դոնալդ Թրամփի խորհրդական Քարտեր Փեյջը ժամանել է Մոսկվա՝ հանդիպելու ռուս գործարարների ու քաղաքական գործիչների հետ։ «Ես կհանդիպեմ ազդեցիկ գործարարների ու գաղափարական առաջնորդների հետ»,- ասել է Փեյջը։ Նա նշել է, որ Մոսկվայում կմնա մինչև դեկտեմբերի 13-ը։ Սա արդեն իսկ ուշագրավ քայլ է: ԱՄՆ նորընտիր նախագահը` դեռ պաշտոնապես չստանձնած նախագահի պաշտոնն` արդեն իսկ բանագնացներ է գործուղում Մոսկվա, վստահաբար, շոշափելու Մոսկվայի տրամադրությունները, ինչու չէ` Թրամփի «մեսիջները» հասցնելու Պուտինին: Իսկ ամերիկյան կողմը շարունակու է ՌԴ-ի հետ հնարավոր բանակցությունների եզրեր գտնելու պատրաստակամության մասին հայտարարություններ անել: ԱՄՆ Պետդեպարտամենտի պաշտոնական ներկայացուցիչ Մարկ Տոները նշել է, որ Վաշինգտոնը պատրաստ է շարունակել բանակցությունները Մոսկվայի հետ, եթե դրանք լինեն կառուցողական. «Մենք դեռևս չենք գտնվում այն կետում, երբ կարող ենք ասել, որ բանակցությունները կառուցողական կլինեն։ Երբ հայտնվենք այդ կետում, կբանակցենք»,-ասել է Տոները։ Իր հերթին ՆԱՏՕ-ի գլխավոր քարտուղար Յենս Ստոլտենբերգը ասել է, որ ՆԱՏՕ-ն չի ցանկանում և չի ձգտում առճակատման Ռուսաստանի հետ Մերձբալթյան տարածաշրջանում, սակայն ստիպված է արձագանքել ՌԴ-ի «հաստատակամությանը»։ «Բալթյան երկրներում վերջին տարիներին Ռուսաստանի կողմից զինված ուժերի թվաքանակի շատացումը դրդում է մեզ համաչափ պաշտպանական գործողություններ ձեռնարկել։ Մենք չենք ցանկանում և չենք ձգտում առճակատման, սակայն մենք պետք է արձագանքենք, երբ տեսնում ենք ավելի հաստատակամ Ռուսաստան, որը գործում է Ուկրաինայում, ինչպես նաև կուտակում է իր զինված ուժերը»,-ասել է Ստոլտենբերգը։ ԱՄՆ-ի նախագահական ընտրություններից հետո` ամերիկյան գործող վարչակազմը շտապում է թե՛ խստացնել պատժամիջոցները Ռուսաստանի նկատմամբ, թե՛ մյուս կողմից չայրել «կամուրջները»: Սա վկայում է այն մասին, որ Թրամփի նախագահությունը էականորեն ազդեցություն է ունենալու Ռուսաստանի հետ հարաբերությունների ճշգրտման հարցում: Թամար Բագրատունի
Հետևեք մեզ Viber-ում
