ԱԺ-ի ծեծկռտուքն ու շմայսների առատությունը

Նախկին դաշնակցական, նախկին «ժառանգական» ներկայումս իշխանական հովերում ծվարած Ռուբեն Հակոբյանն այսօր գերազանցել է Հանրապետական բռնարարներին ու բռնություն կիրառել «Հրապարակ» թերթի լրագրող Վահե Մակարյանի նկատմամբ:Պատգամավորին թերևս դուր չի եկել լրագրողի հարցերը, որից հետո նա կանչել է նրան առանձնազրույցի: Լրագրողը պատմել է լրատվամիջոցներին, որ Ռուբիկ Հակոբյանը լրագրողների հետ դաշնակցության գաղափարախոսությունից է խոսելիս եղել և նշել է, որ ինքը այդ գաղափարախոսությունն իր մեջ կրում է: Ինքն էլ հետաքրքրվել է, թե որն է այդ գաղափարախոսությունը, կարո՞ղ է պատգամավորը մեկ բառով ձևակերպել այն: Սրան ի պատասխան՝ Ռուբիկ Հակոբյանը հորդորել է լրագրողին գնալ և գրքեր կարդալ: Ապա հարցից սրտնեղած վիրավորական տոնով լրագրողին սկսել է «դասեր տալ»՝ նշելով, որ նա հասկանալու հետ կապված խնդիրներ ունի եւ այլն: Այնուհետև պատգամավորը լրագրողին կանչել է «ռազբորկի» եւ ուղեկցել ԱԺ այն հատվածը, որտեղ որ տեսախցիկ չկա: Եվ անսպասելի հարվածներ հասցրել և հայհոյել։ «Ինքն իրեն խուլիգանի նման է պահել». բռնությունից հետո այսպես արձագանքեց Ռուբիկ Հակոբյանն իր ու Վահե Մակարյանի միջեւ տեղի ունեցած միջադեպի վերաբերյալ: «Նա իրեն խուլիգանի նման է պահել: ժուռնալիստիկայի հետ կապ չունի, լրագրության հետ կապ չունի, փորձել է էթիկայի դասեր տալ, սովորեցնել, բայց դա չի ստացվի»,-ասաց Ռուբիկ Հակոբյանը: Դիտարկմանը՝ դա արդարացնո՞ւմ է, որ պատգամավորը հարվածի լրագրողին, Ռուբիկ Հակոբյանը հակադարձեց. «Իսկ դուք տեսե՞լ եք»: Դա ասելուց հետո նա մտավ դահլիճ: Երբ Մհեր Սեդրակյանը՝ Թոխմախի Մհերը սպառնում էր մեկ ուրիշ լրագրողի ծնոտ կոտրել, լրագրողական հանրույթը պայթում էր զայրույթից, պահանջում իշխանություններին կարգի հրավիրել։ Փաստորեն, մեր ընդդիմության շարքերում թոխմախների ու շմայսների պակաս չկա, դեռ ավելին, եթե Հանրապետականները ընդամենը սպառնում են, Ռուբիկ Հակոբյանը նաեւ իրագործում է։ Գուցե Ռուբիկ Հակոբյանին ագրեսիվ է դարձրել իր քաղաքական ապագայի նկատմամբ անորոշությունը։ Հակոբյանը հավանաբար կորցրել է պատգամավոր մնալու բոլոր հույսերը, եւ այդ հուսահատության պահին լրագրողի ցանկացած հարց իր ականջին խորթ է թվացել։ Ի դեպ, այսօր մամուլում տեղեկություններ կային, որ ՀՅԴ-ն անգամ փակել է դռները Հակոբյանի առաջ եւ չի պատրաստվում նրան հետ ընդունել։ Դժվար է պատկերացնել մի ուժ, որը համաձայնի այդ աղմուկից հետո իր շարքում ներառել Հակոբյանին, թերեւս բացառությամբ ՀՀԿ-ի, որի արժանիքներից մեկը նման պատգամավոր, կուսակից ունենալն է։ Անի Սահակյան