Կարեն Կարապետյանի հարկադրված խոստովանությունը

ԶԼՄ-ների ղեկավարների հետ Կառավարության ղեկավարի հանդիպումն առանձնահատուկ համարել չի կարելի, Կարեն Կարապետյանը մեծ հաշվով չարեց որեւէ հայտարարություն, որը լրատվական դաշտում փոթորիկ կառաջացներ, բոլորը կխոսեին ու կքննարկեն նրա սենսացիոն հայտարարությունը, կամ էլ գոնե նոր բան ասած կլիներ: Չիշտ հակառակը, անդավաճան մնալով իր ոճին Կարեն Կարապետյանը նույն լակոնիկ ոճով, իր կողմից կարճ հարցուպատասխանով աչքկապոցի արեց, որեւէ երեւույթի խորքերը չներթափանցեց ու հանես եկավ բացառապես մակերեսային հայտարարություններով: Քաջ գիտակցելով, որ վերլուծող մարդկանց հետ է հանդիպել, այդ մասին զրույցի ընթացքում հայտարարեց նաեւ վարչապետը, ու ցանկացած խոսքն անալիզի կենթարկվի, թերեւս այս պատճառով չցանկացավ բացել իր հոգու խորքերը: Դրանից բացի Կարեն Կարապետյանը այլ միջավայրի ներկայացուցիչ չէ, նա եղել է ու հիմա էլ փորձելու է էլ ավելի խորը արմատներ ձգել իշխանության տիրույթում: Ու որ ինքը այս միջավայրի հարազատ ներկայացուցիչն է ու մեխանիկորեն շարունակելու է նախորդների սկսած գործը, թերեւս չհերքեց նաեւ կառավարության ղեկավարը Հայելի-ի պնդումներն անարձագանք թողնելով: Անշուշտ իր՝ <<դրսի մարդ>> լինելու մտացածին բնորոշումը, ինչպես նաեւ իմիջը, անմիջականությունը մի քայլ վեր է հանել, քան շարքային ՀՀԿ-ականներն են, բայց մեծ հաշվով Կարեն Կարապետյանն անկարող է լինելու անել բաներ, որոնք կվտանգեն իր թիմի՝ իշխանության գոյությունը: Օրինակ անգամ Գագիկ Ծառուկյանի վերադարձի մասին <<օլիգախատյաց>> Կարեն Կարապետյանը պահեց չեզոքությունը, քանի որ դա ըստ լուրերի իշխանությունների հետ համաձայնեցված սցենար է: «Հայելու» հարցին ի պատասխան՝ Կարեն Կարապետյանը հայտնեց, որ անձնական հանդիպումներ է ունենում Գագիկ Ծառուկյանի հետ, սակայն չի քննարկել քաղաքականություն նրա վերադարձի հարցը: «Ի՞նչ հարցեր եք քննարկում,- հետաքրքրվեց «ՀԺ»-ի տնտեսական մեկնաբանը:- Ամենախոշոր գազալցակայանները ոնց որ թե նրանն են, այդ հարցերը կա՞ն»: «Հայկ, քեզ ո՞նց է թվում՝ ես որ մարդկանց հետ հանդիպում եմ, անպայման պիտի գազի՞ց խոսեմ»: «Դե, տասնհինգ տարի դրանից եք խոսել»,- պատասխանեց Հայկ Գեւորգյանը: «Դե, հոգնել եմ, այ մարդ»,- պատասխանեց Կարեն Կարապետյանը : Մի քանի ուշագրավ ու անկեղծ պատասխաններ , այնուամենայնիվ, հնարավոր եղավ կորզել Կարեն Կարապետյանից: Օրինակ, անսպասելի անկեղծ էր, երբ պատասխանեց հարցին՝ «Հանրապետականին անդամակցելուց հետո Ձեր վարկանիշը, Ձեր կարծիքով, անկո՞ւմ է ապրելու, թե՞ ոչ»: «Կարծում եմ, այո»,- ասաց վարչապետը, որը ՀՀԿ համագումարի օրը տրամագծորեն հակառակ կարծիք էր հայտնել: Բայց դժվարացավ ենթադրել, թե որքան կլինի այդ անկումը. «Հաջորդ հարցմանը կստուգենք»: Դե իսկ անկեղծության գագաթնակետը 2018-ի պլանների, ավելի ճիշտ ցանկությունների մասին բարձրաձայնումն էր: Կարեն Կարապետյանը ի պատասխան ասաց, որ Հանրապետության նախագահի հետ չի քննարկել, թե ինչքան է ինքը պաշտոնավարելու. «Եթե ես ասեի, որ 3, 4 կամ 5 տարի պաշտոնավարելու եմ, ասելու եք` բա որ արդյունավետ չլինեք, չարիք դառնաք կառավարման տեսանկյունից... Ես չեմ եկել 6 ամիս աշխատելու: Եթե ժողովուրդը, հանրության տարբեր շերտեր հասկանան` մենք յուրաքանչյուր օր ճիշտ ուղղությամբ ենք գնում, կփորձենք աշխատել երկարատև»: <<Հայելու>> ճշտող հարցը, թե 2018-ից հետո էլ ինքը կլինի՞ վարչապետ, Կարեն Կարապետյանը շրջանցեց, պնդմանը անկարող եղավ չարձագանքել և միայն ավելացրեց. «Արդյունավետ աշխատելու դեպքում 2018-ից հետո էլ ինձ տեսնում եմ վարչապետի պաշտոնում»: Նշենք, որ ՀՀԿ համագումարի ժամանակ Սերժ Սարգսյանը հայտարարել էր, որ խորհրդարանական ընտրություններում հաջողության հասնելու դեպքում Կարեն Կարապետյանը կմնա իր պաշտոնում: Նախագահը, սակայն, չէր խոսել 2018թ.-ից հետո ստեղծվող իրավիճակի մասին: Կարապետյանի արձագանքից կնշանակի, որ 2018-ից հետոյի մասին Սերժ Սարգսյանի հետ հստակ պայմանավորվածություն չի եղել, այլապես Կկարապետյանը միանգամից վերջ կդներ այդ հարցին, ինչը մեծ հաշվով ձեռնտտու է իշխանության համար այն տեսանկյունից, որ Կարեն Կարապետյանը դեռեւս չի հասցրել վարկաբեկվել, ունի ավելի բարձր հեղինակություն, քան Սերժ Սարգսյանը, դրանից բացի Սերժ Սսարգսյանի հետագա պաշտոնավարման հարցը դարձել է քաղաքական շրջանակների քննադատության թիրախ: Կարեն Կարապետյանը, ըստ էության, բարձրաձայնեց իր սեփական ցանկության մասին: Անի Սահակյան