Նորից անարգանք ԱԺ-ի հանդեպ
Եկող տարվա բյուջեի քննարկումն ԱԺ-ում կիսադատարկ դահլիճում ընթացավ։Կառավարությունը այս անգամ էլ ԱԺ-ի հանդեպ չդրսեւորեց հարգալից վերաբերմունք ու նախարարներից մի քանիսն էին ներկա քննարկմանը։ Ամենաակտիվը խմբակցություններից ԲՀԿ-ն էր, Միքայել Մելքումյանի ելույթի ժամանակ կարելի է ասել օդը սառել էր. «Ես ներկայացրել եմ 101 առաջարկ, կարծես, 8-ն եք ընդունել»,- Ֆինանսների նախարար Վարդան Արամյանին բողոքում էր Միքայել Մելքումյանը, այնինչ նրա խոսքով՝ իր նախագծում անհեթեթությունների մի ողջ շղթա կա։ «Նվազագույն աշխատավարձի մասով ասում եք՝ «այսքան փող է պետք, որտեղի՞ց»։ Ինչի դուք կարծում եք, որ նվազագույն աշխատավարձը բարձրացնեք, լրացուցիչ պահանջարկ չի՞ ձևավորվելու, որ գնան այդ փողերը ծախսեն, հետո դրանցից հարկեր գան բյուջե, ու ունենանք տնտեսական ակտիվություն։ Նախորդ անգամ Դուք ասացիք, որ տույժ ու տուգանքների մասով ունեք շատ կոմպետենտ տեղակալ, որ իբր պետք է զանգ տար, քննարկեինք, չեղավ դա։ Էս ի՞նչ աշխատաոճ է, այսինքն՝ դուք մի բան եք հայտարարում, հետո դա չի արվում, դա նորմա՞լ եք համարում»,- ասաց նա։ «Պարոն Արամյան, Դուք գիտությունների թեկնածու եք, չէ՞»,- արձագանքելով նախարարին՝ ասաց Մ. Մելքումյանը։ -Դուք ի՞նչ է, ուզում եք ստվերային տնտեսությունը մնա՞, չգիտե՞ք, որ նվազագույն աշխատավարձը, որ ֆիքսված է, մարդիկ այդքան չեն ստանում։ Դուք՝ որպես քաղաքական մեծամասնության ներկայացուցիչ, ձախողել եք ձեր 5-ամյա ծրագիրը»,- հայտարարեց Մ. Մելքումյանը։Վ. Արամյանն էլ ասաց, որ, եթե իմանար՝ ստվերն ինչքան է, այն կդադարի ստվեր լինելուց ՀԱԿ խմբակցության ղեկավար Լևոն Զուրաբյանն էլ ասաց, որ մինչև 2019 թվականը իշխանությունների պլանավորած աճի տոկոսները մեր տնտեսությունը տանում են դեպի դեֆոլտ և տնտեսական կոլապս։ «Նախորդ իմ ելույթից մի քանի օր անց պարզվեց, որ վարչապետ Կարեն Կարապետյանը կիսում է իմ այս գնահատականը։ «Բլումբերգին» տված նոյեմբերի 21-ի հարցազրույցում նա ասաց՝ «Հայաստանի արտաքին պարտքը կազմում է 5.8 միլիարդ, այն դեպքում, երբ երկրի ՀՆԱ-ն կազմում է 10 միլիարդ դոլար, և 2017 թվականի 3.2 տոկոս աճը չի կարող ապահովել կենսամակարդակի նշանակալից բարելավում։ Մենք ունենք նաև արտաքին պարտք, որն աճում է ավելի արագ, քան ՀՆԱ-ն»։ Շատ հստակ գնահատական է, որից հետևում է, որ վարչապետը շատ սթափ պատկերացնում է, թե որն է գլխավոր խնդիրը ՀՀ-ի առաջ ծառացած։ Հարց է ծագում, եթե դուք այսքանը հասկանում եք ու ուզում եք, որ մենք հաստատենք այս թվերը, որոնց համաձայն՝ մենք անդունդ ենք գնում, դուք ասում եք՝ կամ դուք չունեք երկրի կառավարման ծրագիր, կամ՝ որ դուք սրանով ցանկանում եք, որ մենք ձեզ հետ միասին կիսենք երկիրն աղետի տանելու ծրագրի համար պատասխանատվությունը։ Բնականաբար, մենք երբեք նման բան չենք անի, ոչ էլ ձեզ խորհուրդ կտայի»,- հայտարարեց ՀԱԿ ղեկավարը։ Լ. Զուրաբյանի խոսքով՝ սա ընդամենը խոստովանություն է սեփական անկարողության մասին. «Մենք սրան դեմ ենք քվեարկում ու կոչ ենք անում ժողովրդին օգտագործել 2017 թվականի ապրիլին իրենց տրված շանսը, ազատվել մեր տնտեսությունը խեղդող այնպիսի իշխանություններից, ինչպիսին դուք եք»։ Հեղինե Բիշարյանն էլ դժգոհությունների մի ողջ շղթա թվարկեց սկսած աղետի գոտին չվերացնելու, ավելին նոր գոտիներ առաջացնելու՝ ի դեմս դատարկվող ու ավերվող գյուղերի, վերջացրած ավանդական դարձած ավանդների վերադարձի խնդրի մասին հիշատակելով, ապա նկատեց, որ նոր կառավարությունը ոչ թե գործ է անում, այլ «գարդիրոբ» է ցույց տալիս։Հրանտ Բագրատյանն էլ Արամյանին մեղադրեց հին գիտելիքներով առաջնորդվելու մեջ:«Եվրոբոնդերի մասին եք բացատրություններ տալիս՝ ի պատասխան պատգամավորի հարցին: Արդեն 3 տարի է՝ Եվրոպան գտնվում է բացասական տոկոսադրույքների մեջ... Դա կոչվում է ոչ ճշմարտություն, սուտ: 2016-ի բազան չի լինելու 2.2 տոկոս. ես ասել էի նախապես: Բազայի փոփոխությունը չի՞ փոխում պլանները, կառավարությունն այս բյուջեով ընդհանրապես կթաղի տնտեսությունը, նկատի ունեմ ձեզ, Ներսես Երիցյանին ու փոխվարչապետ Վաչե Գաբրիելյանին: Այն հին` 20 տարվա բաներն անընդհատ բերում, բացատրում եք մեզ»,- ասաց պատգամավորը` հավելելով, որ ԱՎԾ-ի ներկայացրած տվյալներն էլ սուտ են: Ֆինանսների նախարարը չհամաձայնեց պատգամավորի հետ, թե սուտ են խոսում: ԱԺ փոխնախագահ Հերմինե Նաղդալյանն էլ կոչ արեց ընդունել բարեկամական ոճով արված հրավերը:Բագրատյանն արձագանքեց. «Ոնց որ ձեռ անեք, տիկի՛ն Նաղդալյան, մենք երկիրը կկորցնենք այսպես, հերիք է: Դուք` հանրապետականներդ, կարծես ամեն ինչ գիտեք ու, առանց խորհրդակցելու, երկիրն արդյունավետ կկառավարեք, այդպես չէ»:Հերմինե Նաղդալյանը պատասխանեց, որ որևէ մեկին երբեք դաս չի տալիս, նույնիսկ եթե կարիքը կա: «Կարող եմ խորհուրդ տալ կամ հորդորել ու այս պահին հորդորում եմ` գործընկերության սոլիդարությունը պահպանել, և ասացի, որ կարծում եմ, որ Ձեր ու պարոն Արամյանի հանդիպումը օգտակար է լինելու»: Անի Սահակյան