Դավթաշեն վարչական շրջանի ղեկավարի հանձնարարականն արհամարհեցին

Դավթաշեն վարչական շրջանի 4-րդ թաղամասում՝ Անձնագրային և վիզաների վարչության շենքի հարևանությամբ կա մի ահռելի փոս, որն ամեն օր շարունակում է լցվել աղբով: 2014թ. հունիսի 10-ին նամակով դիմեցի քաղաքապետին՝ ուշադրություն հրավիրելով այս տհաճ իրողության վրա: Պատասխան նամակից տեղեկացա, որ թաղամասի հ. 17/4 հասցեում գտնվող հողամասը սեփականության իրավունքով պատկանում է «Բոստան» ՍՊԸ-ին, որն այդտեղ բազմաֆունկցիոնալ շենքի կառուցման թույլտվություն է ստացել քաղաքապետարանից: Մինչ օրս քաղաքաշինական որևէ գործունեություն չի իրականացվել տեղում, իսկ Դավթաշեն վարչական շրջանի ղեկավարը դեռևս 2014թ. սեփականատիրոջը ծանուցել է սեղմ ժամկետներում տարածքը բերել պատշաճ սանիտարական վիճակի և այն օգտագործել ըստ նշանակության: Մինչդեռ ականատեսները վկայում են, որ այսօր աղբն այնտեղ դատարկվում է նույնիսկ բեռնատարներով: Անահիտ Բախշյան Երևանի ավագանու «Բարև Երևան» խմբակցության անդամ