Ես ալավերդցի եմ, հարց կա...

ԱԺ-ում շարունակվում է հերթական քառօրյան: Քննարկման է ներկայացվել Ասիական զարգացման բանկից 112 միլիոն դոլար վարկ վերցնելու նախագիծը, որի շուրջ ընթացող քննարկումները բավականին բուռն են: Քննարկման ընթացքում պատգամավորները սկսեցին ռեպլիկներ բաց թողնել, ինչը դուր չեկավ ԱԺ փոխխոսնակ Էդուարդ Շարմազանովին, ով իր արտահերթ ելույթում ընդգծեց, որ  եթե վարկ է վերցվում, ապա կարելի է հոգալ նաև Գյումրիի և Վանաձորի տնակներում ապրող մարդկանց խնդիրները: «Ինձ համար հավասար նշանակություն ունեն թե՛ Գյումրին, թե՛ Վանաձորը, և թե՛ մնացած բոլոր քաղաքները»,- հավելեց նա և պատգամավորներին կարգի հրավիրեց: Հովհաննես Մարգարյանն էլ նշեց, որ ժամանակին Լինսի հիմնադրամը ճանապարհաշինության ոլորտում ավելի քիչ գումարներով ավելի մեծ գործեր էր անում: Շարմազանովն էլ հակադարձեց, որ պատգամավորների` Երևանն այլ քաղաքների հետ համեմատության մեջ դնելը գավառական մտածելակերպ է: «Չի կարելի մեր երկրում բաժանում կատարել երևանցի, վանաձորցի, գյումրեցի: Ես ալավերդցի եմ, բայց բոլորիս աչքի լույսը Երևանն է, ինչ-որ մեկի մոտ հարց կա՞: Երևանը վերջին մի քանի տարում չէ, որ դարձել է 1.5 միլիոնանոց: Ամենավտանգավորը գավառական մտածողությունն է, որ մայրաքաղաքի շահերը հակադրում են մարզերին, քանի որ դա նույնն է, թե ասես՝ մո՞րդ ես շատ սիրում, թե՞ հորդ: Ընդունում եմ, որ, միգուցե, համաչափ զարգացում չկա, սակայն կանգնել նման բան ասել ու ասել՝ էտ հիմքով դեմ եմ քվեարկելու, դա անընդունելի է: Ի դեպ, վարկ տալիս են նրան, ով կարող է մարել, իսկ դա ասել է Չերչիլը»,- հայտարարեց նա: