Ի՞նչ են բերել Բաքու` Լավրովի հետ հանդիպումից հետո

Թուրքիայի արտգործնախարար Մևլյութ Չավուշօղլուն աշխատանքային այցով ժամանել է Ադրբեջան, որտեղ իշխանությունների հետ հանդիպմանը տարածաշրջանային հարցերից բացի` Լեռնային Ղարաբաղի խնդիրն է քննարկել: Ադրբեջանի նախագահ Իլհամ Ալիևն ընդունել է Թուրքիայի արտգործնախարար Մևլյութ Չավուշօղլուն։ Հաղորդվում է, որ հանդիպմանը Ալիևն ու Չավուշօղլուն քննարկել են մի շարք հարցեր։ Այլ մանրամասներ չեն հաղորդվել։ Այնուհետև տեղի է ունեցել Թուրքիայի ու Ադրբեջանի արտգործնախարար Մևլյութ Չավուշօղլուի ու Էլմար Մամեդյարովի հանդիպումը, որից հետո Մամեդյարովը հայտարարել է, որ իրենք քննարկել են նաև «Բաքու-Թբիլիսի-Կարս» երկաթուղու ու «Անդրանատոլիական» գազատարի (TANAP) նախագծերը։ Մամեդյարովի խոսքերով՝ TANAP նախագծի իրագործումն իրականացվել է 50 տոկոսով։ Չավուշօղլուն իր հերթին հայտարարել է, որ TANAP-ն իրենց համար առաջնահերթ առաջադրանք է. «Ադրբեջանական գազը նախ կհասնի Թուրքիա, ապա՝ Ադրբեջան»։ Չավուշօղլուն հավելել է, որ իր ադրբեջանական վերջին այցից հետո Թուրքիայում իրականացվել է ռազմական հեղաշրջման փորձ, և իրենք գոհ են FETÖ-ի դեմ Ադրբեջանի մղած պայքարից. «Թուրքիան ու Ադրբեջանը մեկ ազգ են, երկու պետություն»։ Սակայն, պաշտոնական հանդիպումների մասին սուղ տեղեկությունների ֆոնին Թուրքիայի արտգործնախարարը, կարծես, որոշել է լրացնել բացը... Չավուշօղլուն հայտնել է, որ Ալանիայում ռուս գործընկեր Սերգեյ Լավրովի հետ հանդիպման ժամանակ բարձրացրել է ղարաբաղյան հակամարտության թեման, աջակցել Մոսկվայի ջանքերին։ Ռուսաստանի և Թուրքիայի արտգործնախարարներ բանակցություններ էին անցկացրել Ալանիայում հինգշաբթի օրը։ Այնուհետև ուրբաթ երեկոյան Թուրքիայի արտգործնախարարը ժամանել էր Բաքու։ Ի՞նչ է բերել Բաքու Չավուշօղլուն` Լավրովի հետ հանդիպումից հետո` հարցն ամենակարևորն է: Ինչպես երևում է, Չավուշօղլուն դատարկաձեռն չի եկել Բաքու... «Ռուսաստանի արտգործնախարար Սերգեյ Լավրովի հետ հանդիպմանը ղարաբաղյան թեման բարձրացվել է։ Ռուսաստանը զբաղված է ղարաբաղյան հարցի կարգավորմամբ։ Ընդգծվել է այդ հակամարտության կարգավորման կարևորությունը։ Մենք աջակցում ենք այդ ուղղությամբ Ռուսաստանի ջանքերին»,-ասել է Չավուշօղլուն Բաքվում կայացած մամլո ասուլիսում՝ հավելելով, որ հակամարտությունը պետք է կարգավորվի Ադրբեջանի տարածքային ամբողջականության շրջանակում։ Այս շաբաթ կկայանա ԵԱՀԿ արտգործնախարարների խորհրդի նիստը, և Բաքուն, փաստորեն, Թուրքիայի միջոցով «խաղում է»` Մոսկվայով: Այսինքն, ցույց տալով, որ այս պահին Մոսկվան է ԼՂ կարգավորման «մոդերատորը», ինչը, ըստ Թուրքիայի և Ադրբեջանի` նշանակում է, որ ԼՂ խնդիրը պետք է լուծվի, իբր` «Ադրբեջանի տարածքային ամբողջականության» պահպանման շրջանակներում: Մինչ Բաքուն` Մոսկվա-Անկարա դաշտում սպասում է իր համար ցանկալի «պտուղներին», Մամեդյարովը հանկարծ հիշել է Կասպրշիկի գրասենյակի ընդլայնման մասին, և ոչ միայն, ներկայացրել է նաև Ադրբեջանի նախապայմանը... Մամեդյարովը հայտարարել է, որ Ադրբեջանը դեմ չէ ԵԱՀԿ գործող նախագահի անձնական ներկայացուցիչ Անջեյ Կասպրշիկի գրասենյակի ընդլայնմանը. «Ինչ վերաբերում է Կասպրշիկի գրասենյակի ընդլայնմանը, առաջին հերթին պետք է զբաղվենք տրամաբանական հարցերով։ Մենք դեմ չենք գրասենյակի ընդլայնմանը, սակայն նախ անհրաժեշտ է զորքերը դուրս բերել մեր տարածքներից»։ Այլ կերպ ասած` պաշտոնական Բաքուն մերժել է նաև Կասպրշիկի գրասենյակի ընդլայնման առաջարկը, որն արվել էր մայիսին: Ստացվում է, որ պաշտոնական Բաքուն պաշտոնապես մերժում է Կասպրշիկի գրասենյակի ընդլայնման, ինչպես նաև` սահմանային միջադեպերի հետաքննության մեխանիզմների ներդրման առաջարկները: Կարևորն այն է, որ Ադրբեջանը հույսը չի կորցնում Մոսկվայի աջակցությունը ստանալու ճանապարհին: Ահա, այստեղ` միշտ պատրաստ են... Հավատում են Մոսկվայի «ջանքերին»: Թամար Բագրատունի