Օբամայի վարչակազմի բարձրաստիճան ներկայացուցիչը վկայակոչում է Հայոց Ցեղասպանությունը

ՄԱԿ-ում Միացյալ Նահանգների դեսպան Սամանթա Փաուերը Օսմանյան կայսրությունում 1915 թվականի իրադարձությունները որակել է ցեղասպանություն։ «Արդյո՞ք ԱՄՆ հեռացող նախագահի վարչակազմը լուռ ճանաչում է Հայոց Ցեղասպանությունը»,- հարցադրում է առաջ բերում «The Associated Press»գործակալությունը, նշելով, թե՝ Փաուերն այս մասին հայտարարել է Հոլոքոստը վերապրած, խաղաղության Նոբելյան մրցանակակիր Էլի Ուեյզլի գործունեությանը նվիրված միջոցառման ժամանակ։ Աղբյուրի փոխանցմամբ, իր ելույթում Փաուերը հիշատակել է աշխարհում տիրող անարդարությունների մասին, այդ ցանկում ընդգրկելով նաև «հայերի դեմ իրագործված ցեղասպանության ժխտումը»։ Այս համատեքստում գործակալությունը տարակուսում է, թե արդյո՞ք Փաուերի հայտարարությունը կարող է նոր լարվածություն ի հայտ բերել ԱՄՆ դաշնակից Թուրքայի հետ հարաբերություններում, հաշվի առնելով պատմական իրողության մասին Օբամայի վարչակազմի զգույշ ձևակերպումները, որոնք տեղ են գտել նրա ապրիլքսանչորսյան ուղերձներում։ Գործակալությունն առավել ուշագրավ է համարում այն փաստը, որ Փաուերը հանդիսանում է ԱՄՆ երկրորդ ամենաբարձրաստիճան դիվանագետը։ Նշվում է նաև, թե մինչ Օբամայի վարչակազմում պաշտոն ստանձնելը Սամանթա Փաուեըը բազմիցս անդրադարձել է Հայոց Ցեղասպանությանը և պաշտոնավարման ընթացքում նույնիսկ ոչ հրապարակային լոբբինգ իրականացրել Օբամայի կողմից Հայոց Ցեղասպանությունը ճանաչելու ուղղությամբ։ Սամանթա Փաուերի խոսնակ Կուրտիս Կուպերը գործալությանը տված պարզաբանման մեջ պնդել է, թե Փաուերի հայտարարությունը չի արտացոլում Հայոց Ցեղասպանության հարցում Օբամայի վարչակազմի դիրքորոշման փոփոխություն, իսկ դեսպանի հղումը արվել է Նոբելյան խախաղության մրցանակակրին պատվելու համատեքստում, որ կոչված է եղել ցույց տալու զանգվածային ջարդերի ու կրկնվող անարդարությունների դեմ պայքար մղելու օրինակ։ ԱՄՆ պետքարտուղարության պաշտոնական ներկայացուցիչ Մարկ Տոները ևս ստիպված է եղել անդրադառնալ հարցին, ևս հերքելով հարցի շուրջ պաշտոնական դիրքորոշման որևէ փոփոխություն։ «Նախագահը և վարչակազմի այլ բարձրաստիճան պաշտոնյաներ բազմիցս ոգեկոչել և ընդունել են Օսմանյան կայսրության վերջին տարիներին կոտորված և աքսորված 1,5 միլիոն հայերի պատմական փաստը, հայտարարելով, որ փաստերի ամբողջական, անկեղծ և արդար ընդունումը բխում է բոլորի շահերից»,- ասել է Տոները։ Լրատվամիջոցը հիշատակում է դեռևս 2008 թվականին ԱՄՆ նախագահի թեկնածու Բարաք Օբամայի` Հայոց Ցեղասպանությունը պաշտոնապես ճանաչելու նախընտրական խոստումը, որն այդպես էլ ի կատար չածվեց։