Ո՞րն է Կարեն Կարապետյանի հաջողակ լինելու բանաձևը

Հայկական բարեգործական ընդհանուր միության (ՀԲԸՄ) կազմակերպած Հայաստանի երկարաժամկետ սոցիալ-տնտեսական զարգացման թեմայով հարց ու պատասխանի ժամանակ վարչապետ Կարեն Կարապետյանը հայտարարել է, որ հաջողակ լինելու դեպքում ինքը ցանկություն ունի երկար ժամանակով աշխատել որպես ՀՀ վարչապետ: Կարեն Կարապետյանին հարց է ուղղվել` նա լինելու է Հայաստանի հանրապետական կուսակցության վարչապետի թեկնածուն մինչև հաջորդ համապետական ընտրություննե՞րը, թե՞ մինչև 2018 թվականը. «Այսպես պատասխանեմ հարցին. ես եկել եմ ընդամենը 6 ամիս աշխատելո՞ւ` ո՛չ: Ցանկություն ունե՞մ երկարատև աշխատելու` եթե հաջողակ լինեմ, ապա այո՛, բայց ես չեմ կարող բեռ դառնալ, եթե չլինեմ արդյունավետ»,– հայտարարել է վարչապետը: Հիշեցնենք, որ նախագահ Սերժ Սարգսյանը նոյեմբերի 26-ին ՀՀԿ 16-րդ համագումարի ընթացքում հայտարարել է, որ եթե գալիք ընտրություններում ՀՀԿ-ն վստահության քվե ստանա, ապա կառավարությունը կրկին կգլխավորի վարչապետ Կարեն Կարապետյանը՝ շարունակելով իրագործել արդեն իսկ նախանշված ծրագիրը: 2017 թվականի խորհրդարանական ընտրություններից հետո իր՝ վարչապետ դառնալու հավանականության մասին Սերժ Սարգսյանի՝ ՀՀԿ համագումարում արած հայտարարությունից հետո Կարեն Կարապետյանն առաջին անգամ է անդրադառնում: ՀՀԿ համագումարում Սերժ Սարգսյանը Կարեն Կարապետյանի՝ վարչապետ դառնալու մասին խոսելիս «եթե»-ներ չմատնանշեց, մինչդեռ ինքը՝ Կարեն Կարապետյանը, իր երկարատև պաշտոնավարման համար շատ կոնկրետ պայման է նշել՝ լինել հաջողակ: Հայաստանի նման երկրներում, որտեղ երկրի արտաքին պարտքը հատել ՀՆԱ-ի 50 տոկոսի սահմանը, աղքատության ցուցանիշը գերազանցում է 30 տոկոսը, արտագաղթի ծավալներն օրեցօր մեծանում են, իսկ երկիրը գտնվում է մշտական շրջափակման մեջ՝ չունենալով արտաքին աշխարհի հետ ո՛չ ծովային, ո՛չ էլ լիարժեք երկաթուղային ճանապարհ, հատկապես վարչապետի համար հաջողակ լինելը շատ բարդ, կարելի է ասել անիրատեսական գործ է: Հայաստանում գոնե առաջիկա 2-3 տասնամյակում թերևս հնարավոր չէ լինել հաջողակ վարչապետ, առավել ևս, որ բացարձակապես չափելի չեն հաջողակ լինելու  արդյունքները: Ակնհայտ է, որ անգամ շատ լավ աշխատելու դեպքում վերը թվարկած խնդիրները չեն կարող կարճ ժամկետում գոհացուցիչ լուծում ստանալ՝ անկախ վարչապետի անձից: Եվ ուրեմն ի՞նչ է նկատի ունեցել Կարեն Կարապետյանը՝ ասելով՝ կմնամ, եթե հաջողակ լինեմ: Հնարավոր է, որ նա այս կերպ ապահովագրել է ինքն իրեն, եթե հետագայում այնուամենայնիվ որոշի վարչապետ չաշխատել, նա շատ հանգիստ կարող է հիշատակել «կմնամ, եթե հաջողակ լինեմ» հայտնի հայտարարությունը և ասել, որ ինքն արել է այն, ինչ ասել էր: Այս պահի դրությամբ հաջողակ լինելու բանաձևը Կարեն Կարապետյանը սկսել է պետական ուռճացված համակարգը կրճատելուց: Նա արդեն լուծարել է պետական գերատեսչություններ, մի շարք ԾԻԳ-երի, հայտարարել է, որ մնացածները ևս կիսով չափ պետք է կրճատվեն: Պետական կառավարման համակարգի՝ նախարարությունների աշխատակազմերում սպասվում են 25-30 տոկոս կրճատումներ, լուծարվում կամ միավորվում են ՊՈԱԿ-ներն ու ԾԻԳ-երը: Քննադատությանը, թե կրճատումների հետևանքով գործազրկության մակարդակն է մեծանում, Կարեն Կարապետյանը պատասխանել է, որ գործազրկության դեմ պայքարի համար պետք է նախ աշխուժացնել բիզնեսը. «Կրճատումներով գործազրկությունը շատացնո՞ւմ եմ, մյուս կողմից մշտական բողոքներ են հնչում ոչ արդյունավետ կառավարման մասին. ես կրճատե՞մ, թե՞ պահեմ: Եթե իրենք արդյունավետ չեն, իզուր աշխատավարձ ես տալիս, արդյունք չեն տալիս, պահե՞մ: Համենայնդեպս, ես վստահ եմ, որ մենք ճիշտ ենք անում»,- ասել է նա: Կարապետյանը նաև ասել է, թե փորձելու են բռնել գործ անող մարդու ձեքռը, պիտի բարելավեն կյանքը, որ արտագաղթը նվազի…. Ասել է նաև, որ իսկապես ուզում է Հայաստանը դարձնել ավելի լավ երկիր: Բայց ո՞ր վարչապետն է հակառակն ասել:   Դավիթ Մանուկյան