Ցանկանում եք հերքել, թե իշխանության հետ ինչ-որ ձևով շաղկապված արհեստական ընդդիմություն եք. նախարարը՝ Նիկոլ Փաշինյանին

Ինչպես արդեն նշել էինք ընդդիմադիր պատգամավոր Նիկոլ Փաշինյանն ԱԺ-կառավարություն հարց ու պատասխանի ժամանակ այսօր դիմեց կառավարությանը. «Շարունակվում են օդում կախված մնալ չստուգված լուրերը ԱԺ պատգամավոր, մի քանի ոլորտներում մենաշնորհային դիրք ունեցող սեփականատեր Սամվել Ալեքսանյանի կողմից չմուծված միլիարդավոր դրամ հարկերի, տարեցների կենսաթոշակներից ու երիտասարդների կրթվելու իրավունքից գողացված միլիարդները չնչին, այսպես կոչված, բարեգործության, օրինակ, անվճար լավաշ բաժանելու անվան տակ քողարկելու մասին»: Պաշտոնական պատասխան տալուց հետո Կառավարության աշխատակազմի ղեկավար- նախարար Դավիթ Հարությունյանը նշել է նաև իր անձնական տեսակետը՝ Նիկոլ Փաշինյանի հարցերի հետ կապված. «Անձամբ կցանկանամ ասել, որ սա առաջին հարցը չէ, որ նույն ֆորմատով ներկայացնում եք ԱԺ-ում: Ձեր նման հարցերի իմաստը, համենայն դեպս, ինձ համար հասկանալի է: Կարծում եմ, որ ձեր հարցերի իրական նպատակն այն է, որ Դուք ցանկանում եք այդ ձևով հերքել այն տարածված լուրերը, թե Դուք իշխանության հետ ինչ-որ ձև շաղկապված եք և արհեստական ստեղծված ընդդիմություն եք: Կարծում եմ, որ եթե դա էր ձեր նպատակը, ասեմ, որ ինձ գոնե համոզել եք, որ արհեստական ընդդիմություն չեք և հորդորում եմ՝ այս ամբիոնի մոտ այլևս այդ ուղղությամբ ջանքեր չգործադրեք»: Փաշինյանն էլ ասել է, որ եթե հարցերի ոճը դուր չի գալիս, ապա առաջինը դա պետք է ասել Սերժ Սարգսյանին, և նա բացատրի. «Այս բառերով և մի քիչ փոխած խոսելով` արդյո՞ք նա նպատակ էր հետապնդում ապացուցելու, որ ինքը ՀՀ-ում կոռուպցիայի, կաշառակերության հետ կապ չունի և արդյոք նա Ձեզ ապացուցել է: Իսկ ես կարծում եմ, որի ինքս ապացուցելու բան չունեմ, այլ Դուք ապացուցելու բան ունեք, որ կողմնակիցների մասին օդում կախված լուրերը ճշտվեն, սակայն չեք կարող ապացուցել այն, ինչ ձեզանից պահանջվում է, որովհետև ձեր իշխանության ներկայացուցիչներն ամեն ինչ ապացուցել են իրենց կյանքով և ապրելով»: