Ունենք ֆինանսական խնդիր ու փորձում ե՞նք դա լուծել. Թևան Պողոսյանը՝ 18 տարեկան բոլոր տղաներին բանակ տանելու օրենքի մասին

Կառավարությունն առաջարկում է «Զինվորական ծառայություն անցնելու մասին» օրենքում փոփոխություններ եւ լրացումներ կատարել: Ռազմաբժշկական ֆակուլտետում պետության հաշվին սովորողները, որոնք հետո հրաժարվում են զինվորական ծառայությունից, պետք է վճարեն տույժ: «Մենք սրանով ինչի՞ն ենք փորձում նպաստել. որ բանակում բժշկական ծառայության որակը բարձրանա, դրա խնդիրն է մեր առջև դրված, թե՞ ունենք ֆինանսական խնդիր ու փորձում ենք դա լուծել: Եթե բանակում բժշկի աշխատավարձն այնպիսին լիներ, որը մրցունակ կլիներ ընդհանուր առողջապահական համակարգի հետ, ապա քաղաքացիական բժիշկներն իրենք կուզենային այնտեղ ծառայել»,- այսօր ԱԺ նիստի ժամանակ քննարկվող օրենքի նախագծի վերաբերյալ նման կարծիք հայտնեց պատգամավոր Թևան Պողոսյանը: Այնուհետև հետաքրքրվեց, թե պայմանագիրը, որը կնքվում է, հնարավոր չէ՞ պայմանագրով այդ հարցերը կարգավորել, նաեւ պարտավորությունները նախատեսել, որ մարդն իմանա ինչի է գնում: «18 տարեկանը լրացել է, գնում եք ծառայում եք գալիս եք, նրանից հետո կլինեն այլ գայթակղիչ մեխանիզմները, որոնցով շատերը կցանկանային դառնալ ռազմական բժիշկ: Սա պետք է լինի մոտեցումը»,- ասաց նա: Թեւան Պողոսյանը հարցրեց՝ թե ամբողջական որքա՞ն տույժ է նախատեսվում այն սովորողների համար, որոնք չեն ուզում ծառայել՝ սովորելուց հետո: Պաշտպանության փոխնախարար Արա Նազարյանը պատասխանեց, որ ամեն տարվա համար տույժը 1 մլն 100 հազար դրամի կարգի է, ամբողջ ուսումնառության համար կազմում է մոտ 8 մլն դրամ: «Ես հուսով եմ, որ պաշտպանության նոր նախարարի այն գաղափարը, թե բանակը պետք է դառնա շարժիչ ուժ երկրի զարգացման համար, ինքներս մեզ լուրջ կվերաբերվենք ու դա իրագործելու համար փոփոխությամբ կգանք: Եթե փոփոխություններ էլ անենք, էլի սողանքներ կմնան, բայց զգում եմ, որ սողանքները փակելու ձեր ցանկությունը լուրջ է: Մենք ինքներս պետք է սկսենք աշխատել ինստիտուտների փոփոխությունների համար»,- հայտարարեց Թևան Պողոսյանը: